1Hito manta nga gab-i, waray hingaturog an hadi; sanglit ginsugo niya an iya sekretaryo hin pagkuha han opisyal nga mga sinurat han ginhadian ngan iginpabasa ini ha iya.
2Ginbasa niya an kasaysayan hiunong han paghibaroi ni Mardoqueo han maraot nga plano hin pag-iparatay han hadi—plano nga ginhimo han duha nga mga yunuko han palasyo nga nagbantay han mga kwarto han hadi.
3Pinmakiana an hadi, “Gin-unan-o man naton hin pagpasidungog ngan pagbalos kan Mardoqueo?”
Binmaton an iya surugoon, “Waray gud ginbuhat para ha iya.”
4“Hin-o han akon mga opisyal nga aanhi ha palasyo?” nagpakiana an hadi.
Nasakob pa gud la han bungsaran hi Aman; inmabot hiya hin paghangyo han hadi nga bitayon hi Mardoqueo didto han biritayan nga gin-andam na.
5Sanglit binmaton an mga surugoon, “Aadi hi Aman nga naghuhulat pakigkita ha imo.”
6Sanglit sinmulod hi Aman ngan nagsiring ha iya an hadi, “May-ada usa ka tawo nga karuyag ko gud pagpasidunggan. Ano an angay ko pagbuhaton para hini nga tawo?”
Naghunahuna hi Aman, “Yana, hin-o pa man an karuyag pagpasidunggan han hadi? Ako gud ini, waray iba.”
7-8Sanglit ginbaton niya an hadi, “Ipakuha an hadianon nga panapton para hini nga tawo—mga panapton nga imo ngahaw ginbabado. Pabutangi hin hadianon nga adorno an imo kalugaringon nga kabayo.
9Niyan sugoa in usa han imo gilalabawi nga mga opisyal hin pagbado han tawo hini nga mga panapton, ngan hin pagtugwaya han kabayo nga sasakyan han tawo ha paglatas han plasa han syudad. Magpasangyaw an opisyal samtang nga naglilibot hira: ‘Kitaa niyo kon in-uunan-o han hadi hin pagbalos hin usa nga tawo nga karuyag niya pagpasidunggan!’”
10Niyan nagsiring an hadi kan Aman, “Pagdali ngan kuhaa an panapton ngan an kabayo, ngan ihatag ini nga mga pasidungog kan Mardoqueo nga Judiyo. Buhata para ha iya an ngatanan nga imo iginsiring. Hiaagian mo hiya nga nalingkod didto han aragian han palasyo.”
11Sanglit kinuha ni Aman an mga panapton ngan an kabayo, ngan iginsul-ot niya kan Mardoqueo an mga panapton. Sinmakay han kabayo hi Mardoqueo ngan gintugwayan ini ni Aman paglatas han plasa han syudad, ngan iya ginpasangyaw ha mga tawo samtang nga naglilibot hira. “Kitaa niyo kon gin-uunan-o han hadi hin pagbalos hin usa nga tawo nga karuyag niya pagpasidunggan!”
12Niyan binmalik hi Mardoqueo ngadto han aragian han palasyo, samtang nagdagmit pag-uli hi Aman nga nagtatahob han iya bayhon tungod hin kaawod.
13Ginsumatan niya an iya asawa ngan an ngatanan niya nga kasangkayan han ngatanan nga nahinabo ha iya. Niyan hira ngatanan nagsiring ha iya, “Nagtikang na hin paglupigi ha imo hin gahom ni Mardoqueo. Usa hiya nga Judiyo ngan diri ka gud makakadaog ha iya. Lulupigan ka niya kay an buhi nga Dyos upod ha iya.”
Ginpatay hi Aman14Samtang nagkakarukayakan pa hira, nagkaabot an mga yunuko han palasyo basi dad-on nira hi Aman ngadto han bangkite ni Ester.
Who We AreWhat We EelieveWhat We Do
2025 by iamachristian.org,Inc All rights reserved.
