Sirac 19 - Samarenyo Meaning-Based Bible (1984)（MBBSAM）

1Kon buhaton mo ini, diri ka magririko; kon diri ka manginano han talagudti nga mga butang, maghihikaraot ka hin hinayhinay.

2An bino ug an kababayen-an amo an nagtutukso han may buot nga kalalaken-an hin pagbuhat damo nga mga patuyaw. An lalake nga napakadto hin mga kababayen-an nga maraot an bantog, diri na nanginginano han iya kalugaringon,

3ngan tungod hini, ginbabaydan niya han iya kinabuhi. An iya nadudunot nga lawas kakaonon hin mga ulod.

4Linurong la an inapiki nga pagsarig ha mga tawo. Kon nakasala ka, ikaw la ngahaw an maghihimakuri.

5Kon nakakalipay ha imo an pagkamaraot, paghuhukman ka.

Likayi an Paglibak

6Likayi an paglibak nga waray hangkag, ngan malilikyan mo in damo nga kasamokan.

7Ayaw gud liwata hin pagsumat an imo hinbatian, ngan diri ka gud magbabasol.

8Ayaw ini igsumat ngadto han imo kasangkayan o mga kaaway labot la kon makakasala ka kon hilomon mo la ini ha imo kalugaringon.

9Titigamnan ini han bisan hin-o nga makabati ha imo, ngan maiha o madali, pagdudumtan ka tungod hini.

10Hinbatian ba nimo in sumat? Himoa nga matubtob la ini ha imo. Ayaw kahadlok, diri ini makakadaot ha imo.

11An lurong nga tawo nga magsari hin pagtipig hin mga sekreto, mag-aantos sugad hin babaye nga tipag-aranak.

12Ikinapagbati niya hin mga sekreto, sugad ini hin pana nga natusok ha iya paa.

13Pakianhi anay an imo sangkay hiunong hin imo hinbatian nga sayop nga iya nabuhat. Bangin diri ini matuod. Kon matuod man lugaring ini, basi diri na niya pagliwaton,

14pakianhi anay an imo amyaw mahitungod han imo hinbatian nga iya ginyakan nga diri angay. Bangin waray hiya magyakan hini. Kon ginbuhat man niya ini, basi diri na niya pagyaknon liwat.

15Kon hinbatian mo in maraot hiunong hin imo sangkay, pakianhi hiya mahitungod hini. Bangin buwa la ini. Ayaw pagtuod han ngatanan nga imo hinbatian.

16Usahay nahililisa an ginyakan hin usa ka tawo ngan diri niya tinuyo ini. Hin-o ba ha aton an waray makasala hin sugad hini nga paagi?

17Kon hibatian mo in pulong nga makapasina ha imo han imo kahigrani, pakianhi anay hiya san-o mo hiya pagtarhogon. Itubyan ini nga butang ngadto han Balaod han Gihahataasi.Kilalaha an Matuod nga Kinaadman

20Kahadloki an Ginoo ngan tumana an iya Balaod; amo ini an kahingpitan han Kinaadman.

22Bangin hibaroan mo an ngatanan nga angay hibaroan hiunong han pagkamaraot, kundi diri ini makakahimo ha imo nga maaram. Diri subay ha katadongan an pagsunod han sagdon han mga makasasala.

23Mahihimo nga an pagkalisto gamiton para hin maraot nga mga panuyo, kundi may mga tawo nga linurong an panggawi tungod kay diri hira maaram.

24Mauruupay pa in tawo nga may pagkahadlok han Dyos bisan kon diri hiya maaram, kay han gililistohi han mga makasasala.

25Mahihimo nga magin listo in usa ka tawo kundi malimbong la gihapon o makakuha han iya kinaruruyag pinaagi hin pagkamatinahuron.

26May magraot nga mga tawo nga nagpapakita hin masulob-on ug mainampoon nga nawong, kundi nagtatalinguha la hin paglimbong ha imo.

27Ilinilingiw nira an ira mga nawong ngan napasangil nga diri nabati ha imo, kundi masingabot hira ha imo ha takna nga diri mo ginpapaabot.

28Kon diri hira makakagbuhat hin sala yana, tungod hin kakulang hin kusog, bubuhaton nira ini ha syahan nga higayon nga ihatag ha ira.

29Makikilala mo in usa nga tawo pinaagi han iya pamahongpahong. Mahibabaro ka kon may maupay niya nga pagsabot ha syahan nimo nga pagkita ha iya.

30Makilala ka ha iya pinaagi han iya pagbado han iya pagtawa ngan han iya paglakat.