Ester 2 - Samarenyo Meaning-Based Bible (1984)（MBBSAM）

Nahimo nga Rayna hi Ester

1Niyan, bisan kon hinmugpoy na an kasina han hadi, nagpinan hunahuna gihapon hiya hiunong han ginbuhat ni Vasti ngan hiunong han iya sugo kontra ha iya.

2Sanglit nagsiring in pipira han mga magsaragdon han hadi nga suok ha iya, “Kay ano nga diri ka magpabiling hin maghusay ngan batan-on nga mga uray nga kababayen-an?

3Makakagtudlok ka hin mga opisyal didto han tagsa nga lalawigan han imo ginhadian, ngan sugoa hira hin pagdara han ira hin-agian nga mga maghusay nga kadaragan-an ngadto han urokyan han imo kababayen-an dinhe ha Susa nga kapital nga syudad. Himoa nga ira magbarantay hi Hegai nga yunuko nga imo tinaporan han imo kababayen-an, ngan tagi hira hin mga pagpahusay.

4Niyan kuhaa an imo pinakamahusay ha ira ngan himoa hiya nga rayna nga liwan kan Vasti.”

Nakahunahuna an hadi nga maupay ini nga sagdon, sanglit ginsunod niya ini.

5Didto ha Susa nag-ukoy in usa nga Judiyo nga ginngaranan kan Mardoqueo nga anak ni Jair; sakop hiya han tribo ni Benjamin ngan tulin nira Cis ug Simei.

6Han paghalina ni Hadi Nabucodonosor han Babilonia kan Hadi Joaquin han Juda tikang ha Jerusalem upod in hugpo hin mga bihag, usa ha ira hi Mardoqueo.

7May-ada niya patod nga hi Ester, kanay Hebreo nga ngaran amo hi Hadasa; mahusay hiya nga daraga ngan maupay an katindog han iya lawas. Han kamatay han iya mga kag-anak, ginhablos hiya ni Mardoqueo ngan ginmangnoan hiya sugad hin iya kalugaringon nga anak nga babaye.

8Han pagpagawas na han hadi han iya bag-o nga sugo, ngan damo nga kadaragan-an an gindara ngadto ha Susa, nahiupod ha ira hi Ester. Iginbutang hiya liwat didto han hadianon nga palasyo ha ubos han pagmangno ni Hegai nga tinaporan han urokyan han kababayen-an.

9Naruyagan ni Hegai hi Ester ngan ginpalabi hiya ni Hegai. Gintikangan niya dayon an pagpahusay kan Ester pinaagi hin masahi ngan linain nga pagkaon. Ihinatag ha iya an gimamaupayi nga dapit didto han urokyan han kababayen-an ngan pito nga kadaragan-an nga pinili gud tikang han hadianon nga palasyo an nag-alagad ha iya.

10Niyan, tungod han sagdon ni Mardoqueo, ginhilom la ni Ester nga Judiyo hiya.

11Kada adlaw agsob umagi hi Mardoqueo ha atubangan han bungsaran han urokyan han kababayen-an, basi hibaroan niya kon matiunan-o na an kahimtang ni Ester ngan kon ano an iya dadangatan.

12Naabot hin usa ka tuig an kaiha hin pagpahusay han kababayen-an—mga masahi hin lana hin mirra sulod hin unom ka bulan ngan hin lana hin balsamo sulod hin unom liwat ka bulan. Katapos hito, gindadara ngadto kan Hadi Asuero an tagsa nga babaye.

13Makakagsul-ot an babaye hin bisan ano nga iya karuyagon kon tikadto na hiya ha palasyo tikang han urokyan han kababayen-an.

14Napakadto hiya ha gab-i, ngan ha pagkaaga dinadara hiya ngadto hin lain nga urokyan hin kababayen-an ngan pinapamangnoan hiya kan Saasgas nga yunuko nga tinaporan han mga aruasawa han hadi. Diri na hiya nabalik ngadto han hadi labot kon karuyagan gud hiya ngan ipatawag hiya.

15Inmabot an panahon ni Ester hin pagkadto han hadi. Hi Ester nga anak ni Abihail ngan patod ni Mardoqueo nga naghablos ha iya sugad nga anak niya; hi Ester nga dinayaw han ngatanan nga nakakita ha iya. Pag-abot na han iya turno, iginsul-ot niya an iginsagdon ha iya ni Hegai nga yunuko nga tinaporan han urokyan han kababayen-an.

16Sanglit dida han ikapito ka tuig nga pagkahadi ni Asuero, dida han ikanapulo nga bulan, an bulan han Tebet, gindara hi Ester ngadto kan Hadi Asuero didto han hadianon nga palasyo.

17Naruyagan hiya han hadi labaw han ngatanan nga kadaragan-an, ngan nadaog niya an kanan hadi pagpaura ngan paghigugma labaw han iba nga kababayen-an. Iginbutang han hadi kan Ester an hadianon nga korona ngan ginhimo hiya nga rayna, liwan kan Vasti.

18Niyan naghatag hin dako nga bangkite an hadi hin pagpasidungog kan Ester, ngan gindapit an ngatanan niya nga mga opisyal ngan mga punoan. Iginpasangyaw niya in pyesta opisyal para han bug-os nga ginhadian ngan naghatag hiya hin damo nga mga regalo nga angay hin usa nga hadi.

Gintalwas ni Mardoqueo an Kinabuhi han Hadi

19Hito nga panahon gintudlok na han hadi hi Mardoqueo nga usa nga opisyal han iya pamunoan.

20Hiunong kan Ester, waray pa gihapon niya igpahibaro nga Judiyo hiya. Gintugon hiya ni Mardoqueo nga diri hiya magsumat bisan kan kanay, ngan iya gud ini gintuman sugad han pagsugot niya han gutiay pa hiya ha ubos han iya pagmangno.

21Sulod han panahon nga hi Mardoqueo usa nga opisyal didto han palasyo, hira Bagatan ug Tares nga duha han mga yunuko han palasyo nga nagbantay han aragian ngadto han mga kwarto han hadi nagdumot kan Hadi Asuero ngan nakahunahuna hira hin pagpatay ha iya.

22Hinbaroan ini ni Mardoqueo ngan ginsumatan niya hi Rayna Ester. Nagsumat liwat hi Ester han hadi mahitungod han nahibaroan ni Mardoqueo.

23Nagkamay-ada pag-usisa ngan nasabtan nga matuod an sumat, sanglit ginbitay hira Bagatan ug Tares. Nagsugo an hadi nga igsurat ini nga hinabo dida han opisyal nga mga kasaysayan han ginhadian.