1Inmagi in panahon ngan ginpasidunggan ni Hadi Asuero in usa ka tawo nga ginngaranan kan Aman, anak ni Hamedata nga taga-Bougia, pinaagi hin pagtagi ha iya han katungdanan hin pagkaprimero ministro.
2Ginsugo han hadi an ngatanan nga mga opisyal nga nag-alagad ha iya hin pagpakita han ira pagtahod kan Aman pinaagi hin pagyukbo ha iya atubangan. Ginbuhat ini nira ngatanan labot kan Mardoqueo nga dinmiri pagbuhat hini.
3Ginpakianhan hiya han iba nga mga opisyal nga nag-aalagad han hadi kay ano nga ginsupak niya an sugo han hadi.
4Gin-aghat hiya nira adlaw-adlaw hin pagsugot, kundi waray gud hiya mamati ha ira. Nagsiring hiya, “Judiyo ako ngan diri ako makakayukbo ngadto kan Aman.” Sanglit ginsumatan nira hi Aman nga nasupak hi Mardoqueo han mga sugo han hadi.
5Duro an kapungot ni Aman han iya pakasabot nga diri naluhod ngan nayukbo ngadto ha iya hi Mardoqueo.
6Sanglit nakahunahuna hiya hin pagpatay han ngatanan nga mga Judiyo ha bug-os nga ginhadian han Persia.
7Dida han ika-12 ka tuig nga pagkahadi ni Hadi Asuero, nagsugo hi Aman hin pagripa basi hisabtan kon ano an maupay nga adlaw ug bulan hin pagpatay han mga Judiyo, ngatanan sakob la hin usa ka adlaw. An ika-14 nga adlaw han bulan han Adar amo an napili.
8Sanglit ginsumatan ni Aman an hadi, “May hugpo hin mga tawo nga nagsasarang ha kanasoran han bug-os mo nga ginhadian. Lain an ira mga pamatasan kay hadton iba nga mga tawo. Labot pa, diri nagsusugot hira han mga balaod han ginhadian, sanglit diri ini makakabulig ha imo kon pabay-an mo la hira.
9Kon maruruyag ka, Harangdon nga Hadi, pagpagawas hin sugo nga pamatayon hira. Kon pagbuhaton mo ini, nagpapasarig ako nga makakabutang ako hin 375,000 ka kilo nga salapi ngadto han hiriposan hin mga manggad han hadi.”
10Ginhulso han hadi an singsing nga ginagamit pagtimbre han mga pasangyaw ngan paghimo hini nga opisyal, ngan iginhatag ini ngadto kan Aman basi kasilyohan an sugo nga sinurat kontra han mga Judiyo.
11Ginsiring hiya han hadi, “Ikada la ha imo an salapi; buhata ha ira sumala han imo karuyag.”
12Sanglit dida han ika-13 nga adlaw han syahan nga bulan, gintawag ni Aman an mga parasurat han hadi ngan iginpasurat ha ira in usa nga pasangyaw nga paghuhubaron ngadto han tagsa nga pinulongan dida han ginhadian ngan ipapadara ini ngadto han ngatanan nga mga punoan, mga gobernador, ngan mga opisyal. Ginpagawas ini ha ngaran ni Hadi Asuero ngan ginpadara ngadto han 127 nga mga lalawigan tikang ha India ngadto ha Sudan.
13Gindara ini nga pasangyaw hin mga paradalagan ngadto han tagsa nga lalawigan han ginhadian. Nagsugo ini nga pasangyaw nga sulod hin usa ka adlaw, ha ika-12 nga bulan, an bulan han Adar, pamamatayon an ngatanan nga mga Judiyo ngan babawion ha ira an ira mga hiagi.
Who We AreWhat We EelieveWhat We Do
2025 by iamachristian.org,Inc All rights reserved.
