Nehemias 1 - Samarenyo Meaning-Based Bible (1984)（MBBSAM）

1Amo ini an susumaton han mga nahimo ni Nehemias nga anak ni Hacalias.

Nabaraka hi Nehemias tungod han Jerusalem

Dida han bulan han Kisleb, han ika-20 ka tuig nga emperador han Persia hi Artajerjes, samtang nakadto ako, hi Nehemias, ha Susa nga kapital nga syudad,

2inmabot hi Hanani, usa han akon kabugtoan tikang ha Juda, upod in pipira ka tawo tikang ha Juda. Ginpakianhan ko hira hiunong han Jerusalem ngan hiunong han amon igkasi mga Judiyo nga binalik na tikang ha paghalina ha ira didto ha Babilonia.

3Ginsumatan ako nira nga nagkukuri gud adton mga nanhisalin nga buhi ngan nahiuli na ngadto han ira kalugaringon nga tuna ngan gintatamay ini hira han mga nag-uokoy nga mga taglangyaw harani ha ira. Ginsumatan liwat ako nira nga ruba pa an mga pader han Jerusalem ngan waray pa maayad an mga ganghaan tikang han pagsunoga han syudad.

4Han pakabati ko hini, linmingkod ngan nagtangis ako.

Nagmabidoon ako sulod hin pira ka adlaw ngan waray gud ako kumaon. Nag-ampo ako ngadto han Dyos,

5“O Ginoo nga Dyos han Langit! Gamhanan ka nga Dyos ngan nahadlok kami ha imo. Gintutuman mo gud an imo ginsaaran hadton mga nahigugma ha imo ngan nagbubuhat han imo mga sugo.

6Tan-awa ako, O Ginoo, ngan pamatii an akon pag-ampo, samtang nag-aampo ako adlaw gab-i para han imo surugoon nga mga tawo han Israel. Gintutug-an ko nga kami, an mga tawo han Israel nakasala ha imo. Nakasala ako ngan an akon kaapoy-apoyan.

7Ginraogdaog ka namon ngan waray namon pagtumana an imo mga sugo. Waray namon pagtumana an imo mga balaod nga ginhatag mo ha amon pinaagi kan Moises, an imo surugoon.

8Hinumdomi yana an imo ginsiring kan Moises: ‘Kon diri kamo, an mga tawo han Israel, magmatinumanon ha akon, igpapasarang ko kamo dida han iba nga mga nasod.

9Kundi kon bumalik kamo ha akon ngan buhaton niyo an akon iginsugo ha iyo, ibabalik ko kamo ngadto han dapit nga ginpili ko nga pagsisingbahan niyo ha akon bisan kon nagsasarang na kamo ha bug-os nga katunaan.’

10“O Ginoo, amo ini an imo mga surugoon, an imo kalugaringon nga mga tawo. Gintalwas mo hira pinaagi han imo dako nga gahom ug kusog.

11Pamatii na yana an akon pag-ampo ngan an mga pag-ampo han iba mo nga mga surugoon nga karuyag magpasidungog ha imo. Ihatag ha akon yana an kumainuswagon ngan malooy gad ha akon an emperador.”

Hadto nga mga adlaw ako an tinaporan han bino han emperador.