Ezequiel 3 - Samarenyo Meaning-Based Bible (1984)（MBBSAM）

1Nagsiring an Dyos, “Anak hin tawo, kaona ini nga linikid nga basahan; katapos, pakadto ngan paghimangraw ha mga tawo han Israel.”

2Sanglit ginbungat ko an akon baba ngan iginhatag ha akon hin pagpakaon an linikid nga basahan.

3Nagsiring hiya, “Anak hin tawo, kaona ini nga linikid nga basahan nga akon ihinahatag ha imo; tunla ini.” Kinaon ko ini, ngan natilawan ko nga matam-is sugad hin dugos.

4Niyan nagsiring an Dyos, “Anak hin tawo, pakadto han mga tawo han Israel ngan sumati hira han bisan ano nga akon igpapayakan ha imo.

5Diri ako nagsusugo ha imo ngadto hin nasod nga langyaw kanay pinulongan makuri mo hisabtan, kundi ngadto han mga Israelita.

6Kon sugoon ko ikaw ngadto hin dagko nga mga nasod kanay pinulongan makuri mo masayoran, mamamati hira ha imo.

7Kundi waray han mga tawo han Israel maruruyag hin pamati; kay diri ngani hira namamati ha akon. Magtig-a an ira mga ulo ngan masupilon hira ngatanan.

8Yana hihimoon ko ikaw nga sugad ha ira hin kamatig-a ngan kamakugnot.

9Hihimoon ko ikaw nga sugad hin bato kamadig-on, ngan sugad hin dyamante kamatig-a; ayaw kahadlok hito nga mga masupilon.”

10Nagpadayon an Dyos hin pagsiring, “Anak hin tawo, pamati hin maupay ngan hinumdomi an ngatanan nga akon igsisiring ha imo.

11Niyan pakadto han imo igkasi mga Israelita nga mga bihag ngan sumati hira nga ako, an Ginoo nga Dyos, an nagyayakan ha ira, mamati hira o diri.”

12Niyan ginbayaw ako han espiritu han Dyos, ngan hinbatian ko ha akon luyo an dako nga hagunob hin usa nga tingog nga nasiring, “Pagdayawa an himaya han Ginoo didto ha langit!”

13Hinbatian ko an palapaka han mga pako han mga binuhat ngan an aringasa han mga kaliding, nga sugad hin linog kaaringasa.

14Makusog an pag-abot ha akon han gahom han Ginoo, ngan han gindadara ako han iya espiritu, nabido ngan nasina ako.

15Sanglit inmabot ako ngadto ha Tel Abib, ha ligid han Salog Quebar, diin pag-uokoy an mga bihag, ngan nagpabilin ako didto sulod hin pito ka adlaw. Dako an akon kaguol tungod han akon hinkit-an ngan hinbatian.

Gintudlok hi Ezequiel sugad nga Parabantay(Ezeq. 33:1-9)

16Han paglabay han pito ka adlaw, naghimangraw ha akon an Ginoo.

17Nagsiring hiya, “Anak hin tawo, ginhihimo ko ikaw nga magbarantay han nasod han Israel. Igsusumat mo ha ira an mga pahimatngon nga ighahatag ko ha imo.

18Kon akon igpahibaro nga mapatay in usa nga maraot nga tawo, kundi waray mo hiya sagdoni hin pagbalhin han iya mga paagi basi makatalwas hiya han iya kinabuhi, mapatay hiya nga makasasala pa gihapon, kundi ikaw an mabaton han iya kamatayon.

19Kon magsagdon ka hin usa nga maraot nga tawo ngan diri hiya humunong hin pagpakasala, mapatay hiya nga makasasala pa gihapon, kundi matatalwas an imo kinabuhi.

20“Kon magbuhat hin maraot in usa nga matadong gud nga tawo, ngan igbutang ko hiya dida hin kataragman, mapatay hiya kon diri mo hiya panimangnoon. Mapatay hiya tungod han iya mga sala—diri ko hinunumdoman an mag-upay nga iya ginbuhat—ngan ikaw an may-ada baratonon han iya kamatayon.

21Kon magsagdon ka nga diri magbuhat hin sala in usa nga maupay nga tawo, ngan mamati hiya ha imo ngan diri hiya makasala, mabubuhi hiya, ngan matatalwas liwat an imo kinabuhi.”

Diri Makakayakan hi Ezequiel

22Inmabat ako nga aanhi ha akon an gahom han Ginoo ngan hinbatian ko hiya nga nasiring ha akon, “Buhat ngan gawas ngadto han kahamub-an. Makikighimangraw ako ha imo didto.”

23Sanglit kinmadto ako han kahamub-an ngan hinkit-an ko didto an kalamrag han himaya han Ginoo, sugad gud han paghikit-i ko hini didto ha ligid han Salog Quebar. Hinmapa ako ha tuna,

24kundi sinmulod ha akon an espiritu han Dyos ngan ginpatindog ako. Nagsiring ha akon an Ginoo, “Uli ngan pagsada ikaw didto han imo balay.

25Gagaposon ka hin mga pisi, anak hin tawo, ngan diri ka makakagawas ngadto han mga tawo.

26Diri ka makakayakan basi diri ka makagpahimatngon hini nga magsupilon nga mga tawo.

27Niyan kon maghimangraw na liwat ako ha imo ngan ibalik ko ha imo an pakayakan, pagsusumatan mo hira han igyayakan ko, an Ginoo nga Dyos. Mamamati in pira ha ira, kundi pababay-an ka han iba, kay usa hira nga nasod hin mga magsupilon.”