Sirac 29 - Samarenyo Meaning-Based Bible (1984)（MBBSAM）

Mga Pahuram ug Pamayad

1Ipakita an imo kalooy hin pagpahuram han imo amyaw kon hiya nagkikinahanglan hin bulig. Nagtutuman ka han mga sugo han Ginoo kon mabulig ka ha iya.

2Kon nagkikinahanglan hiya, ipahuram ha iya. Ngan kon ikaw in nakautang, pagbayad ha labi hin halipot nga panahon.

3Kon tuhayon mo dayon an imo mga katungdanan, dayuday makakahuram ka han imo ginkikinahanglan.

4Damo in mga tawo nga nahuram hin usa nga butang sugad la nga butang nga iya hinagian ngan hiposon, ngan nakakahatag ini hin kabaraka hadton nagpahuram ha ira.

5May-ada mga tawo nga nagpapakalooylooy ha ira mga pagyakan, mayukbo ngan mahapa ha tuna basi la makahuram hira, kundi kon maabot na an panahon hin pagbayad, iglalanganlangan la, masiring nga makuri an ira kamutangan, ngan damo la an pasangil.

6Kon an nagpahuram diri gud mahunong hin pagsukot, palaran hiya kon kabaydan hiya han katunga. Kon diri hiya maniguro nga kabaydan hiya, sugad hin kinawatan hiya han naghuram ha iya ngan, diri man unta kinahanglan, nahimo hiya nga kaaway. An makukuha la ha iya han nagpahuram amo an mga pagpakaraot, mga pagyubit, pagpakaalo, ug an pagtamay, kundi waray bisan ano nga pagpasalamat.

7Damo in tawo nga diri karuyag magpahuram diri tungod kay kuripot hira, kundi tungod kay diri nira karuyag nga paglimbongan hira kon makakahimo la hira hin paglikay.

An Kamahinatagon

8Bisan pa, pagmasinaboton hadton mga kablas. Ayaw hira pagpahinulata han imo kamahinatagon.

9Ginsugo kita han Ginoo hin pagbulig han mga kablas; ayaw naton paghikawi han bulig nga ira ginkikinahanglan.

10Mauruupay pa kon mawad-an ka hin kwarta tungod hin pagbulig hin usa nga bugto o sangkay kay nga pabay-an mo la nga pagtaoyon an kwarta didto ha ilarom hin bato.

11Gamita an imo manggad sugad han sugo han Gihahataasi ha imo; makakahatag ini ha imo hin darudamo nga kaupayan kay hin paghinipos hin kwarta para ha imo la kalugaringon.

12Ihapa nga usa han imo manggad an pakahatag ha mga kablas. Makakapalikay ini ha imo hin damo nga kasamokan

13ngan mauruupay pa nga panalipod han imo mga kaaway kay han madig-on nga taming ug bangkaw.

An Pagpatapod Bahin hin mga Utang

14An maupay nga tawo andam hin pagpatapod bahin han mga utang han iya amyaw. Adton nawad-an gad la hin maupay nga pamurubuot in diri magpapatapod.

15Kon may-ada makialayon ha imo hin pagpatapod, ayaw ini hingalimti; igin-unong niya an iya maupay nga ngaran tungod ha imo.

16May-ada mga makasasala nga diri maaram magbalos ngan tinalikdan nira adton nagpatapod ha ira ngan tungod hini, nawad-an ini hira han ira mga hiagi.

17An pagpatapod bahin hin mga pahuram nakaputo hin damo nga mga maupay an pakabuhi nga mga tawo ngan nakahatag hin damo nga kasamokan ug kagul-anan.

18Damo in mga dagko nga pagkatawo nga nawarayan panimalay tungod hin pagpatapod hin pahuram ngan napirit hin paglakat ngadto ha lain nga mga nasod.

19An makasasala nga naglalaom nga makakaganansya hiya pinaagi hin pagpatapod bahin hin nga pahuram makakasabot pa la hiya nga nahiupod na hiya dida hin mga sumbong ug mga buroka.

20Sanglit buligi an imo amyaw sugad han imo mahimo kundi panalipdi an imo kalugaringon supak han mga kataragman nga mahiupod hini dinhe.

An Panimalay ug an Kamaabiabihon

21An mga kinahanglan han kinabuhi amo an tubig, pagkaon, panapton, ug in usa nga puroy-anan diin waray magsasamok ha imo.

22Mauruupay pa an ka kablas ngan mag-ukoy dida hin rubat nga balay kay hin paglipay didto hin mga dagko nga bangkite hin iba nga mga balay.

23Pagmalipayon han aada ha imo, bisan kon diri ini damo ngan ayaw pamati hadton magpapakaalo han imo balay ug panimalay.

24An pagbarobalhin hin balay amo an makalolooy nga pag-ukoy. Bisan ka diin pakadto, mag-aalang ka hin paghimangraw.

25Gin-aabiabi mo an mga bisita ngan imo hira pinapainom, ngan waray nagpapasalamat ha imo. Lugod ginpapakaalohan ka pinaagi hin pagsiring,

26“Ikaw nga diri taga dinhe, pakadi hin pag-andam han lamesa! Karuyag ko kumaon han imo gin-andam! Dad-a ngadi!

27Iwas dida, ikaw nga diri taga dinhe, may-ada ko importante nga bisita! Maabot an akon bugto ngan kinahanglan ko in kwarta.”

28An diri ha imo pag-abiabiha ha panimalay ug waray hunong hin pagsinukot ha imo han nagpahuram ha imo—mga magkuri ini maantos nga mga butang para hin usa nga tawo nga maupay an pamurubuot.