Josue 23 - Samarenyo Meaning-Based Bible (1984)（MBBSAM）

An Panamilit ni Josue

1Ha sakob hin maiha nga panahon gintagan an Israel han Ginoo hin kamutangan nga himyang kaupay ug waray na kaaway nga nagsamok ha ira. Hini nga panahon lagas na kaupay hi Josue,

2sanglit gintawag niya an ngatanan ha Israel, an mga katigurangan, an mga puno, maghurukom, ug mga punoan han mga tawo ngan nagsiring hiya, “Lagas na ako yana.

3Kinmita na kamo han ngatanan nga mga butang nga ginbuhat han Ginoo nga iyo Dyos, ha ngatanan nga mga nasod tungod ha iyo. An Ginoo nga iyo Dyos nakig-away tungod ha iyo.

4Ihinatag ko nga malon han iyo mga tribo an katunaan han mga nasod nga nahibilin pa sugad man hadton iba nga akon na nakuha, tikang han Salog Jordan ha sinirangan ngadto ha Dagat Mediteraneo ha katundan.

5Iginbuot han Ginoo nga iyo Dyos nga maisol hira ha iyo, ngan iya tatabogon dida ha iyo pagsulong. Magtatag-iya kamo han tuna, sugad han saad han Ginoo ha iyo.

6Sanglit paghirot hin pagtuman ug pagbuhat han ngatanan nga nahisurat dida han basahan han Balaod ni Moises. Ayaw kamo pagpasibaya hin bisan ano nga bahin hini nga basahan,

7ngan diri kamo makigtampo hini nga mga tawo nga nahibilin dida ha iyo o magyakan han mga ngaran han ira mga kadiyosan o maggamit kamo hito nga mga ngaran hin pagsumpa kon pagsingba hito nga kadiyosan kon lumuhod ha ira atubangan.

8Lugod pagmatinumanon han Ginoo, sugad nga nagmatinumanon kamo ngada yana.

9Gintabog han Ginoo in damo nga mga dagko ug gamhanan nga mga nasod samtang nga nasulong kamo ngan waray pa bisan usa nga nakahimo hin pag-asdang ha iyo.

10Bisan hin-o ha iyo makakapadalagan hin usa ka yukot nga mga tawo tungod kay an Ginoo nga iyo Dyos amo an nakikig-away para ha iyo sugad han iya ginsaad.

11Sanglit higugmaa gayud an Ginoo nga iyo Dyos.

12Kon diri kamo maaram umugop, ngan tumanpo kamo han mga nasod nga nag-uokoy dida ha iyo ngan makig-aragsawa kamo ha ira,

13waray ruhaduha an Ginoo nga iyo Dyos diri na magpapaiwas hini nga mga nasod samtang nasulong kamo. Lugod, dako ini nga kataragman para ha iyo, sugad hin bitik kon luong, ug sugad hin kamasakit hin lapdos ha iyo bungkog kon tunok ha iyo mga mata. Ngan magpapadayon ini tubtob nga waray bisan usa ha iyo nga mahisalin dida hini nga maupay nga tuna nga iginhatag ha iyo han Ginoo nga iyo Dyos.

14“Yana inmabot na an takna nga mapatay ako. Ngatanan kamo maaram ha iyo kasingkasing ug kalag nga ihinatag ha iyo han Ginoo nga iyo Dyos an ngatanan nga mag-upay nga mga butang nga iya ginsaad. An tagsa nga saad nga iya ginhimo, natuman; waray hini usa nga waray tumana.

15Kundi sugad nga gintuman niya an ngatanan nga saad nga iya ginhimo ha iyo, iya man liwat pagtutumanon an ngatanan nga iya tarhog ha iyo.

16Kon diri kamo magtuman han ginsaaran nga ginsugo ha iyo han Ginoo nga iyo Dyos hin pagpatuman, ngan kon mag-alagad kamo ngan magsingba hin iba nga kadiyosan, tungod han iya kasina pagsisirotan kamo ngan waray bisan usa ha iyo nga mahibibilin dida hini nga maupay nga tuna nga iginhatag ha iyo.”