2 Hadi 15 - Samarenyo Meaning-Based Bible (1984)（MBBSAM）

Naghadi han Juda hi Oseas(2 Cron. 26:1-23)

1Dida han ika-27 ka tuig nga pagkahadi han Israel ni Hadi Jeroboam II, nahimo nga hadi han Juda hi Oseas nga anak ni Amasias.

2An iya panuigon 16 han pagtikang han iya pagkahadi, ngan naghadi hiya ha Jerusalem hin 52 ka tuig. Iroy niya hi Jecolias nga taga-Jerusalem.

3Ginbuhat niya an nakakalipay han Ginoo, kay nagsunod hiya han mga binuhatan han iya amay.

4Kundi waray pagbungkaga niya an pagano nga mga dapit hin pagsingba, ngan nagpadayon hin paghalad an mga tawo hin mga hayop nga tutuboron ngan pagsunog hin insyenso.

5Ginhampak han Ginoo ni Oseas hin sakit nga sanla nga waray na gud hiya maupay ha bug-os niya nga kinabuhi. Nag-ukoy hiya didto han kalugaringon niya nga balay, kinuhaan hiya han ngatanan nga katungdanan, samtang nagdumara han nasod hi Jotam nga iya anak.

6Nahisurat dida han Kasaysayan han Kahadian han Juda an iba pa nga nabuhat ni Oseas.

7Namatay hi Oseas ngan iginlubong hiya didto han hadianon nga mga lubnganan ha Syudad ni David, ngan sinmaliwan ha iya hin pagkahadi hi Jotam nga iya anak.

Naghadi han Israel hi Zacarias

8Dida han ika-38 ka tuig nga pagkahadi han Juda ni Hadi Oseas, nahimo nga hadi han Israel hi Zacarias nga anak ni Jeroboam II, ngan naghadi ini hiya ha Samaria hin unom ka bulan.

9Nakasala hiya han Ginoo sugad han mga una ha iya. Ginsunod niya an magraot nga mga binuhatan ni Hadi Jeroboam nga anak ni Nebat, nga nagtutdo han Israel hin pakasala.

10Ginlingo hi Hadi Zacarias ni Salum nga anak ni Jabes, ginpatay hiya ni Salum didto ha Iblaam, ngan sinmaliwan ha iya hin pagkahadi.

11Nahisurat dida han Kasaysayan han Kahadian han Israel an iba pa nga nabuhat ni Zacarias.

12Sanglit natuman an iginsaad han Ginoo kan Hadi Jehu: “Magigin kahadian han Israel tubtob han ikaupat nga katulinan an imo mga panimalay.”

Naghadi han Israel hi Salum

13Dida han ika-39 ka tuig nga pagkahadi han Juda ni Hadi Oseas, nahimo nga hadi han Israel hi Salum nga anak ni Jabes, ngan naghadi hiya ha Samaria hin usa ka bulan.

14Tikang ha Tersa nasingadto ha Samaria hi Menahem nga anak ni Gadi, ginpatay niya hi Salum, nga sinmaliwan ha iya hin pagkahadi.

15Nahisurat dida han Kasaysayan han Kahadian han Israel an iba pa nga nabuhat ni Salum, lakip in susumaton han iya paglingo.

16Samtang nauli tikang ha Tersa hi Menahem, ginbungkag niya an syudad han Tapua, an mga umurokoy, ngan an nagpapalibot nga katunaan, kay waray man hiya pasudla han syudad. Ginwakay pa ngani niya an mga tiyan han mga burod nga kababayen-an.

Naghadi han Israel hi Menahem

17Dida han ika-39 ka tuig nga pagkahadi han Juda ni Hadi Oseas, nahimo nga hadi han Israel hi Menahem nga anak ni Gadi, ngan naghadi ini hiya ha Samaria hin napulo ka tuig.

18Nakasala hiya han Ginoo, kay nagsunod hiya han magraot nga mga binuhatan ni Hadi Jeroboam nga anak ni Nebat, nga nagtutdo han Israel hin pakasala ngada han iya kamatay.

19Ginsulong an Israel ni Tiglatpiliser nga emperador han Asiria ngan gintagan hiya ni Menahem hin 38 ka tonelada nga salapi basi buligan niya hi Menahem hin pagpadig-on han iya gahom hin pagdumara han nasod.

20Nakuha ni Menahem an kwarta han mga riko nga tawo han Israel pinaagi hin pagpirit han tagsa ha ira basi makaamot hin 50 ka bug-os nga salapi. Sanglit inmoli ngadto ha iya kalugaringon nga nasod hi Tiglatpiliser.

21Nahisurat dida han Kasaysayan han Kahadian han Israel an iba pa nga nabuhat ni Menahem.

22Namatay hiya ngan iginlubong, ngan sinmaliwan ha iya hin pagkahadi hi Pecahiyas nga iya anak.

Naghadi han Israel hi Pecahiyas

23Dida han ika-50 ka tuig nga pagkahadi han Juda ni Hadi Oseas, nahimo nga hadi han Israel hi Pecahiyas nga anak ni Menahem, ngan naghadi ini hiya ha Samaria hin duha ka tuig.

24Nakasala hiya han Ginoo, kay nagsunod hiya han magraot nga mga binuhatan ni Hadi Jeroboam nga anak ni Nebat, nga nagtutdo han Israel hin pakasala.

25Ginlingo hi Pecahiyas ni Peka, anak ni Remalias, usa nga opisyal han iya kasondalohan upod in 50 ka tawo nga mga taga-Galaad; ginpatay nira hi Pecahiyas didto han kota han palasyo ha Samaria, ngan sinmaliwan ha iya hin pagkahadi.

26Nahisurat dida han Kasaysayan han Kahadian han Israel an iba pa nga nabuhat ni Pecahiyas.

Naghadi han Israel hi Peka

27Dida han ika-52 ka tuig nga pagkahadi han Juda ni Hadi Oseas, nahimo nga hadi han Israel hi Peka nga anak ni Remalias, ngan naghadi hiya ha Samaria hin 20 ka tuig.

28Nakasala hiya han Ginoo, ngan nagsunod hiya han magraot nga mga binuhatan ni Hadi Jeroboam nga anak ni Nebat, nga nagtutdo han Israel hin pakasala.

29Panahon adto nga hadi hi Peka nga narikopo ni Tiglatpiliser nga emperador han Asiria an mga syudad han Ayon, Abel Bet Maaca, Janoa, Kedes, ug Asor, ngan an katunaan han Galaad, Galilea, ug Neftali, ngan ginhalin ngadto ha Asiria an mga tawo nga ira ginbihag.

30Dida han ika-20 ka tuig nga pagkahadi han Juda ni Jotam nga anak ni Oseas, ginlingo hi Hadi Peka ni Osias nga anak ni Ela, ginpatay niya an hadi ngan ginsaliwanan niya hin pagkahadi.

31Nahisurat dida han Kasaysayan han Kahadian han Israel an iba pa nga nabuhat ni Peka.

Naghadi han Juda hi Jotam(2 Cron. 27:1-9)

32Dida han ikaduha ka tuig nga pagkahadi han Israel ni Peka nga anak ni Remalias, nahimo nga hadi han Juda hi Jotam nga anak ni Oseas.

33Baynte singko an iya panuigon han pagtikang han iya pagkahadi, ngan naghadi hiya ha Jerusalem hin 16 ka tuig. Iroy niya hi Jerusa nga anak ni Sadoc.

34Ginbuhat ni Jotam an nakakalipay han Ginoo, ngan nagsunod hiya han mga binuhatan ni Oseas nga iya amay.

35Kundi waray pagbungkaga an pagano nga mga dapit hin pagsingba, ngan nagpadayon hin paghalad an mga tawo hin mga hayop nga tutuboron ngan pagsunog hin insyenso. Hi Jotam an nagtindog han Amihanan nga Ganghaan han Templo.

36Nahisurat dida han Kasaysayan han Kahadian han Juda an iba pa nga nabuhat ni Jotam.

37Panahon adto han iya pagkahadi nga ginpadara han Ginoo hira Hadi Rasin han Siria ug Hadi Peka han Israel hin pagsulong han Juda.

38Namatay hi Jotam ngan iginlubong hiya didto han hadianon nga mga lubnganan ha Syudad ni David, ngan sinmaliwan ha iya hin pagkahadi hi Acas nga iya anak.