Mga Salmo 78 - Samarenyo Meaning-Based Bible (1984)（MBBSAM）

An Dyos ug an Iya mga Tawo

1Akon mga tawo, pamati han akon pagturon-an,

ngan tigamni an akon mga ginyayakan;

2Kay akon igtutug-an yana ha iyo,

an kadaanan nga mga misteryo.

3Mga butang nga aton hinbabaroan,

tikang han aton mga ginikanan;

4diri ini iglilirong ha aton kabataan,

Sunod nga katulinan amon pagsusumatan.

5Mga tawo han Israel hin balaod gintagan,

ngan hin mga sugo an kan Jacob katulinan;

ginsugo an aton mga ginikanan,

pagtutdo han balaod ha ira kabataan.

6Basi mahibaro an sunod nga katulinan,

matutdoan liwat an ira kabataan.

7Ha Dyos an ira pagtapod igbubutang,

an iya mga buhat diri hingangalimtan,

kundi dayuday han iya mga sugo magtutuman.

8Diri hira magsusubad han ira mga ginikanan,

nga masupilon, maglaris nga katawhan;

kanay pagsarig han Dyos waray karig-onan,

ngan waray ha iya magpadayon hin pagtuman.

9Tulin ni Efraim nga sangkap hin pana,

nanadlagan han pag-araway nira.

10Ginsaaran han Dyos waray nira pagtipiga,

waray nira sugta an mga balaod niya.

11An iya ginbuhat ira hinngalimtan,

sugad han mga milagro nga ira hinkit-an.

12Samtang nagkikita an ira ginikanan,

han mga milagro didto ha Soan.

13Ginbuhag an dagat ug hira tinmalabok,

an tubig daw pader iya ginpatindog.

14Ha adlaw, hin dampog ginmandoan hira,

ngan ha gab-i, may kalayo nga suga.

15Bato ha kamingawan iya ginbuka,

inmawas in tubig nga ginpainom ha ira.

16Tinmubod in burabod tikang han bato,

usa nga salog hin tubig an nahimo.

17Kundi nagpadayon hira hin pakasala,

didto ha kamingawan han Dyos inmato hira.

18An pagsari han Dyos ira gintuyo,

an ira karuyag nga pagkaon hira nangaro.

19Siring nira, “Makakahimo an Dyos nga Ginoo,

ha kamingawan pag-andam hin sasaro?

20Tinuod nga bato an ginbalbag niya,

binmugwak in tubig ngan tigda ginmuwa;

ha iya katawhan nakahatag ba hiya,

hin tinuod nga tinapay ug karne nga sora?”

21Sanglit nasina gud hito an Ginoo,

iya ginsulong hira hin kalayo;

kasina dinmugang

22kay waray nira pagtoo,

ngan pagsarig nga makakatalwas an Ginoo.

23Kundi ngadto ha langit nagsangpit hiya,

ngan nagsugo pagbukas han mga porta.

24Pagkaon ha langit ginhatag ha ira,

han pagpaurani ha ira hin mana.

25Tinapay hin anghel an ira pinangaon,

iginhatag ha ira hin patakas an kada malon.

26Hangin ha sinirangan ginpahuyop niya,

tungod han iya gahom, timog an ginpaguwa.

27Damo nga mga tamsi an iya ginpahugdon,

sugad hin kadamo han baras ha baybayon.

28Ginpahugdon ini ha butnga han ginkampohan,

palibot han mga tulda han kapatagan.

29Sanglit nangaon, nabusog an katawhan,

iginhatag han Dyos an ira kinahanglan.

30Kundi samtang nagpipinangaon hira,

31an Dyos ha ira inalpan hin kasina.

An maisog nga tawo iya ginpukan,

sugad man han kan Israel batan-on nga kalalaken-an.

32Bisan may milagro, an mga tawo nagpinakasala,

ngan nawarayan hin pagtapod ha iya.

33Sanglit usa nga hangos gintapos an kinabuhi nira,

pinaagi hin tigda ug kalit nga disgrasya.

34Kundi kon ginpapatay niya an iba,

may nagbabasol, nabalik ha iya;

nagbabasol hira ngan nag-aampo pa,

hin tinuodtuod ngadto ha iya.

35Nanumdom hira nga an Dyos ira darangpan,

ngan an Labi Kamakagarahum ha ira natabang.

36Kundi an ira mga pulong puros buwa,

an ginyakan nira mga ulog-ulog la.

37Nagpadayon hira hin kamalingoon,

ug han ginsaaran diri matinumanon.

38Kundi maloloy-on an Dyos han iya katawhan,

iya ginpapasaylo an ira mga kasal-anan;

waray man niya puoha an ngatanan,

agsob nga an iya kasina iya ginpupudngan.

39Nahinumdom hiya nga an mga tawo magluya,

daw sugad hin hangin lumalabay la.

40Didto ha kamingawan, agsob hira inmato,

ginbido hiya nira hin makadamo.

41Agsob nira an Dyos pagsarihan,

an baraan ha Israel pagpakurian.

42Ira hinngalimtan an iya kagamhanan,

nga amo an nagtalwas ha ira ngatanan.

43Han iya pagbuhat hin mga milagro,

ha patag han Soan, didto ha Ehipto.

44Mga salog ginhimo niya nga dugo,

basi diri makainom an taga-Ehipto.

45Ginpadara in kalangawan hin pagsakit ha ira,

ngan an napaklahan hin pagdaot han ira uma.

46Mga kabalay hin duron iya ginpadara,

nagkaon han tanom ug nagbungkag han uma.

47Tungod han yelo nga mga uran,

namatay an mga ubas ug kaigosan.

48Tungod han hagkot nagpatay an kabakahan,

ngan an ira mga panon ginlintian.

49Tungod han iya kapungot iya hira ginpakurian,

mga anghel nga magburungkag iya hira ginparad-an.

50Gintuman gud niya an iya kasina,

waray hira talwasa, hin peste pinamatay hira.

51Pinamatay mga suhag nga kalalaken-an,

han taga-Ehipto panimalay ngatanan.

52Ngan nag-una hiya han iya katawhan,

daw sugad hira hin kakarnerohan;

ngan iya gud hira gintugwayan,

han paglatas nira han kamingawan.

53Gin-unhan niya, waray nira kahadlokan,

ira kaaway han dagat natak-opan.

54Gindara ngadto ha tuna niya nga baraan,

ngadto han gindaog niya nga kabukiran.

55Gintabog niya an mga kanasoran,

samtang nasulong an iya katawhan;

ngatanan han tribo han Israel tinagan,

hin sadang nira pahuwayan.

56Kundi inmato hira han Dyos nga gamhanan,

sinmupil gud hira, ira ginsarihan;

han iya mga sugo waray hira magtuman.

57Sugad han ira mga ginikanan,

masupilon hira, diri kasasarigan;

sugad hin pana nga may kabalikoan.

58Gin-orit hiya han ira siringbahan,

ngan napungot hiya han ira ladawan.

59Han pakakita han Dyos, napuno hin kapungot,

sanglit an Israel ginsalikway niya hin tinuod.

60Ginbayaan an iya tulda didto ha Silo,

an iya gin-ukyan tampo han mga tawo.

61An mga kaaway iya hira tinugotan,

pagbihag han Kahon han Ginsaaran;

tigaman han iya himaya ug kagamhanan.

62Iya gud napungtan, iya nasinahan,

an kalugaringon niya nga katawhan;

ngan mga kaaway nira iya tinugotan,

nga pamatayon hira ngatanan.

63Kaolitawhan nagkamatay ha pag-awayan,

nga waray nangasawa han ira kadaragan-an.

64Kapadian ginlugos hin pamataya,

waray makagtangis an mga balo nira.

65Ha kataposan an Ginoo nagmata,

daw sugad hin ginmumuokan la;

sugad hiya hin maisog nga tawo,

nga linmaksi tungod han bino.

66An mga kaaway iya ginsibo,

ngadto hin kapukan nga makaaalo.

67Kan Jose katulinan ginsalikway niya,

tribo ni Efraim waray niya pilia.

68Lugod 'say ginpili an tribo ni Juda,

ngan an Bukid Sion nga iya hinigugma.

69Didto pagtindoga an templo niya,

sugad hin urokyan niya didto ha himaya.

Ginparig-on niya sugad han tuna,

nga diri mababantad ha ngatanan nga takna.

70Ginpili hi David, surugoon niya,

tikang ha panabsaban hiya ginkuha.

71Diin nagmangno han mga karnero nga nati,

ngan ginhimo hiya han Israel nga hadi.

Ngan amo an magin magmarangno ngani,

hadton mga tawo nga kanan Dyos pinili.

72Nagmangno hi David hadto nga katawhan,

hin hingpit nga pag-alagad ini gin-opdan;

hin kinasingkasing iya ginmandoan,

ngan iya hira hin maupay gintutdoan.