Mga Salmo 18 - Samarenyo Meaning-Based Bible (1984)（MBBSAM）

Kanta han Pagdarag-an ni David(2 Sam. 22:1-51)

1Pagkadako han akon gugma ha imo,

kay ikaw an panalipod ko, Ginoo!

2An Ginoo an naalinsakob ha akon,

makusog nga arayopan ngan madig-on.

An Dyos an akon sinasalirongan,

kon upod ha iya waray kahadlokan.

Sukad hin taming iya ako sinasalipdan,

ngan dida ha iya waray kabarak-an.

3Dayawon an Ginoo nga gintawag nakon,

kay ha mga kaaway ako tatalwason.

4Nag-aalirong ha akon an kamatayon;

balod han kapukan linmapwas ha akon.

5An pagkamatay aanhi man ha akon;

han lubnganan hi ako kakarawaton.

6Ha kakurian, gintawag ko an Ginoo;

ginsangpit ko hiya nga buligan ako.

Didto ha templo iya ako ginbaton, namati hiya han pakibulig nakon.

7Nabay-og ug nangurog an katunaan,

ngan an patukoranan han kabukiran.

Nangutak, nag-abogabog an ngatanan

tungod kay an Dyos may-ada nasinahan.

8Ha iya irong imalisbok an aso,

ha baba, bangga nga baga ug kalayo.

9Linmusad hiya han kabuksi han langit;

lukop an tiil hin dampog nga mangitngit.

10Pakoan nga binuhat iya ginsakyan,

hinmanoy hiya ha pako han kahanginan.

11Natahoban hiya han kasisidman;

tubigon nga dampog hiya ginlibotan.

12Ha iya atubangan kikidlat tinmikang,

hin dagko nga bato hin yelo sinundan.

Hin mga lamrag hin kalayo inopdan,

inmagi ha madakmol nga kadampogan.

13An Ginoo ha langit an dinmalogdog,

hinsabtan kanan Gilalabawi tingog.

14Iya pinamana, kaaway ginsarang,

tungod han kikidlat hira nanadlagan.

15Nahidayag an salad han kadagatan,

ngan patukoranan han tuna nabuksan;

ha pagsaway han kaaway mo, Ginoo,

ngan tungod hin kasina ginnguroban mo.

16An Ginoo tikang ha mga kahitas-an,

tinmamod hiya ngan iya ako kinaptan;

ngan iya ako ginbutong hin paggawad,

tikang kanan tubig hilarom nga salad.

17Hiya an nagtalwas, nagbawi ha akon,

ha mga gamhanan nga kaaway gahom;

ug ha ngatanan nga akon kasina, para ha akon mga kusgan gud hira.

18Sinmulong hira ha akon kakurian,

kundi han Ginoo ako ginsalipdan.

19Gintalwas ako niya ha kataragman,

tungod kay hiya an akon ginlipayan.

20Mabalos an Ginoo han akon kamatadong,

kay waray sala, iya ako dadayawon.

21An balaod han Ginoo akon ginsugot,

han akon Dyos waray ako tumalikod.

22An ngatanan nga balaod akon gintuman,

sugad man an iya mga pagturon-an;

23Nga waray ako sala, hiya maaram,

ug an sayop akon binabayaan.

24Matadong ko nga buhat binabalos niya,

kay maaram hiya waray ako sala.

25Matinumanon ka hadton nagtutuman,

hadton mga hingpit hatag mo kaupayan.

26Malinis ka para han mga maglinis,

kundi maisog ka para han maglaris;

27Gintatalwas mo an mapinaubsanon,

ginpapaubos an mapinahitas-on.

28Hin kalamrag imo ako tinatagan,

ginkukuha mo an akon kasisidman;

29Kusog hin pagsulong imo akon tinatagan,

ngan gahom pagbungkag han salipdanan.

30Pagkahingpit han kanan Dyos binuhatan;

an iya mga pulong katataporan!

Usa nga taming itatanding ha iya,

hadton iya panalipod nangingita.

31An Ginoo gud la an Dyos, waray iba,

an Dyos gud la amo an panalipod ta.

32Hiya an Dyos nga ha akon nagpadig-on,

ug nagbabantay ha akon paglakaton.

33Ginpadig-on ako daw tiil hin bugsok,

ha kabukiran waray ko kahadlok.

34Pakig-away gintutdoan ako niya,

basi magamit ko an madig-on nga pana.

35Ikaw an nasalipod ha akon, Ginoo,

ngan nagtatalwas ha akon hin tutoo;

nakapakusog ha akon an panimangno,

ug pagbantay ha akon han gahom nimo.

36Waray mo itugot nga ako hidakpan,

ngan hin kapukan, diri ako maaram;

37Akon mga kaaway akon ginbukod;

waray ako hunong tubtob nga madaog.

38Hira ginhahanpak ko ngan nagkatumba,

ha atubangan ko nadaog ko hira.

39Nahatag ka hin kusog ha pag-awayan,

kon han kaaway ko, an pagdarag-an.

40Mga kaaway ko tinatabog nimo,

an magdumot ha akon imo ginpupuo.

41Nagsasangpit hira nga imo buligan,

kundi waray ihatag an katalwasan;

an Ginoo an ira gintitinawag,

kundi waray gud ha ira gumagad.

42Akon hira gindudugmok gud hin pino,

sugad han ginpapalid nga tapotapo;

ngan akon hira gintatamaktamakan,

pareho hin lapok ha kakalsadahan.

43Tikang hin masupilon gud nga katawhan,

imo ako gindid-an hin katalwasan;

pinapaghadi mo ako hin katawhan,

hin diri kilala ko nga ginsakopan.

44Mga lumalangyaw ha akon atubangan,

nayukbo ug nasugot han akon yakan;

45Han ira kaisog hira nawawad-an,

nakurog tikang ha ira salipdanan.

46 Ginoo nga Dyos mabuhi ka hin dayon,

akon panalipod hiya pagdayawon;

Igsasangyaw gud an iya kagamhanan,

an naghatag ha akon hin katalwasan.

47Iya ako gintatagan hin pagdarag-an,

supak han nakontra ha akon ngatanan;

iya ginsasakop an akon kanasoran,

48Gintalwas ako ha akon kaaway man.

Imo ako ginpadaog, O Ginoo,

Kontra gud hadton mga kaaway ko;

ngan ginpanalipdan pa gud ako nimo,

tikang hadton magpintas nga mga tawo.

49Sanglit ako man nagdadayaw ha imo,

dida ha butnga hini nga mga tawo;

ngan akon ta kamo pagkakantahan,

mga kanta hin pagdayaw han imo ngaran.

50Ginpadaog gud han Dyos an iya hadi,

ginpakita in gugma han iya ginpili;

ngadto kan David nga iya gindihogan,

ngan ha iya tulin ha kadayonan.