Jeremias 19 - Samarenyo Meaning-Based Bible (1984)（MBBSAM）

An Nabuong nga Tibod

1Ginsugo ako han Ginoo hin pagpalit hin tibod nga lutak. Ginsiring liwat ako niya nga magdara ako hin pira han mga katigurangan han mga tawo ngan pira han mga larolagas na nga kapadian,

2ngan umagi ako ha Ganghaan han Buak nga mga Daba hin paggawas ngadto ha Kahamub-an han Hinom. Didto igsasangyaw ko an mensahe nga ighahatag niya ha akon.

3Ginsugo ako han Ginoo hin pagsiring, “Kahadian han Juda ngan mga tawo han Jerusalem, pamati han igyayakan ko nga Ginoo nga Labi Kamakagarahum, nga Dyos han Israel. Padadad-on ko ini nga dapit hin makalilisang nga karat-an nga makakabungog ini hadton mamamati.

4Pagbubuhaton ko ini kay ginbayaan na ako han mga tawo ngan ginhugawan nira ini nga dapit pinaagi hin paghalad dinhe hin mga halad nga tinubod ngadto hin iba nga kadiyosan—kadiyosan nga waray gud hikilal-i nira, o han ira kaapoy-apoyan, o han kahadian han Juda. Ginluob nira ini nga dapit han dugo hin mga tawo nga waray sala,

5ngan gintindog nira in mga altar para kan Baal basi pagsunogon ha kalayo an ira mga anak sugad nga halad nga tinubod. Waray gud ako magsugo ha ira hin pagbuhat hini; waray ngani ini nakon paghunahunaa.

6Sanglit maabot an panahon nga diri na ini nga dapit pagngangaranan nga Topet o Kahamub-an han Hinom. Pagngangaranan lugod ini nga Kahamub-an nga Irihawan.

7Dinhe hini nga dapit pagkakawangon ko an ngatanan nga mga larang han mga tawo han Juda ug Jerusalem. Ipapapirde ko hira han ira mga kaaway ngan ipapapatay ko hira didto ha pag-awayan. Ihahatag ko an ira patay nga mga lawas nga pagkaon han katamsihan ngan han ihalas nga kamanampan.

8Pagdadad-an ko hin sugad kamakalilisang nga kabungkagan ini nga syudad, nga mahahadlok ngan mahipapausa an ngatanan nga malabay.

9Paglilibotan han kaaway an syudad ngan tatalinguhaon nira hin pagpatay han mga tawo hini. Makalilisang an pagsulong han syudad nga magpapaunay-unay hin pagkaon an mga tawo ha sakob han syudad ngan bisan pa han ira kalugaringon nga mga anak.”

10Niyan ginpabuong ha akon han Ginoo an tibod ha atubangan han mga tawo nga inmupod ha akon,

11ngan ginpasumatan hira nga nagsiring an Ginoo nga Labi Kamakagarahum, “Pagbubuongon ko ini nga mga tawo ngan ini nga syudad, ngan masusugad ini hira hini nga nabuong nga tibod nga diri na magkakaturugkop. Ilulubong han mga tawo an ira mga patay bisan didto ha Topet, kay mawawaray na iba nga dapit nga paglulubngan ha ira.

12Nagsasaad ako nga hihimoon ko nga sugad han Topet ini nga syudad ngan an mga umurokoy hini.

13Masusugad han Topet hin kamahugaw an mga balay han Jerusalem, an mga balay han kahadian han Juda, ngan an ngatanan nga kabablayan kanay mga atop gintuboran hin insyenso ngadto han mga bitoon ngan gin-ipisan hin bino nga halad ngadto hin iba nga kadiyosan.”

14Niyan binayaan ko an Topet nga ginpakadtoan ha akon han Ginoo hin pagsangyaw han iya mensahe. Kinmadto ngan tinmindog ako didto han bungsaran han Templo ngan ginsumatan ko an ngatanan nga mga tawo

15nga nagsiring an Ginoo nga Labi Kamakagarahum, nga Dyos han Israel, “Ipapadara ko nganhi hini nga syudad ngan han tagsa nga kahigrani nga bungto an ngatanan nga kastigo nga akon iginsiring, kay magtig-a an iyo mga ulo ngan diri kamo namamati han akon iginyayakan.”