Sirac 23 - Samarenyo Meaning-Based Bible (1984)（MBBSAM）

1O Ginoo, akon Amay ngan Agaron han akon kinabuhi, ayaw ako pasagdi nga maghingalooy ako tungod han akon mga pulong; ayaw gad itugot nga matinikangan ini han akon pagkapukan.

2Paglambahon unta ako tungod han akon mga hunahuna basi an Kinaadman amo an magdisiplina han akon sarabotan. Diri ko karuyag nga pasayloon ako kon ako may-ada sayop; diri ko karuyag nga pasagdan la an akon mga sala.

3Niyan diri na ako magpapadayon hin pagpinakasala, ngan magpasagad na la ako hin pakasala. Diri mahihimo nga madakop ako han akon mga kaaway ngan pagpakaalohan ako nira.

4O Ginoo, akon Amay, Dyos han akon kinabuhi, ipaharayo ha akon an kamapahitas-on;

5igawas ako han magraot nga mga kaipahon.

6Ayaw gad itugot nga madaog ako han kahalot ug han kalaw-ayan. Ayaw gad itugot nga maoripon ako hini nga waray pagkaawod nga akon mga balatian.

An Pagsumpa

7Mga anak ko, pamati kamo han akon igyayakan mahitungod han tuhay ug angay nga pamulong. Tumana an akon igtututdo ha iyo ngan diri kamo malilisa.

8An mga makasasala nadadakop han ira la ngahaw mapahitas-on ug makaaalo nga mga pulong.

9Ayaw itugot nga maara na la kamo hin pagpanumpa ngan ayaw paggamita hin minanggad la an baraan nga pulong han Dyos.

10An oripon nga dayuday la pagkastigohon, dayuday may-ada mga pilas ug samad; adton dayuday magsumpa han Baraan nga Ngaran, nagpapadayon hin pakasala.

11An tawo nga dayuday magsumpa, unob gud hiya nga salaan ngan diri hirayo an sirot han iya panimalay. Kon diri hiya makatuman han iya ginsumpaan, nakasala hiya. Kon magpakabungol la hiya han iya ginsumpaan, nakasala hiya hin duha ka pilo. Kon an iya pagsumpa diri kinasingkasing, diri hiya mapapasaylo ngan damo nga kakurian an maabot han iya panimalay.

An Mahugaw Nga Karukayakan

12May-ada usa nga paagi hin karukayakan nga sugad hin kamatayon ngahaw—waray unta Israelita nga makasala hini! An mga mainampoon nga tawo diri naglulunay dida hin sugad nga sala ngan mapahirayo hira hin sugad nga panulos.

13Ayaw himoa nga mahigaroy na la kamo hin binastos nga mga pamulong. Salaan ini nga buhat.

14Bangin kamo mangalimot nga aada kamo tampo hin mga importante nga tawo ngan maowat kamo tungod hin maraot nga pulong nga hinaraan niyo hin pagyakan. Hunahunaa daw kon ano an babati-on han iyo mga kag-anak. Iyo pagpapakaraoton an adlaw han iyo katawo ngan maghihingyap kamo nga gabay la kamo namatay.

15Kon mahigaroy kamo hin paggamit hin mga pulong nga maraot, diri kamo makakautod hini samtang nga buhi pa kamo.

An Sala bahin han Pakighilawas

16Damo in mga paagi hin pagbuhat hin sala nga makakapasina han Ginoo, kundi an kaipa hin pakighilawas amo in usa nga mapaso ngan naglalahinggab nga kalayo nga diri mapaparong hin tinuyo. Maglulugaring la ini hin kaparong. An tawo nga nag-uokoy dida hin kinabuhi nga puros la kalipayan hin kalaw-ayan magpapadayon tubtob nga maugtang hiya hini nga kalayo.

17Para hin sugad nga tawo an ngatanan nga babaye iya karuruyagon ug diri gud hiya matakas samtang nga buhi pa hiya.

18An tawo nga malimbong han iya asawa, masiring ha iya ngahaw, “Waray makakasabot. Masirom dinhe hini nga dapit ngan waray nakita ha akon. Waray ko sadang kabarak-an. Mahitungod han Gihahataasi, diri ngani niya hinsasabotan.”

19Ini nga tawo nahahadlok han iba nga mga tawo. Diri hiya nakakasabot nga an mga mata han Ginoo 10,000 ka pilo hin kamapawa kay han adlaw, nga nakita hiya han ngatanan nga aton ginbubuhat bisan kon gintatalinguha ta hin pagtago.

20Daan na hiya maaram, san-o niya himoon an kalibutan, sugad man han kahuman niya paghimoa.

21Ito nga salaan nga tawo hidadakpan ha takna nga diri hiya andam ngan sisirotan ha atubangan han mga tawo.

22Amo ini gihapon mahitungod hin babaye nga malimbong han iya bana ngan may-ada niya anak nga kanan iba nga lalake.

23Ha syahan nga bahin, nakasupak hiya han Balaod han Gihahataasi. Ha ikaduha nga bahin, ginlimbongan niya an iya bana. Ha ikatulo nga bahin, nakasala hiya hin panlibog tungod kay an iya anak diri kanan iya bana kundi kanan iba nga lalake.

24-25An mga anak mag-aantos tungod han sala han ira iroy. Diri na maupay an pagkarawat ha ira han katilingban ug han iba nga mga panimalay. Ini ngahaw nga babaye dadad-on ha atubangan han katirok

26ngan dayuday hiya pagpapakaalohan. May-ada gaba dida ha iya panumdoman. Kon mamatay hiya,

27makakasabot an iba nga waray lain nga maupay kon diri an kahadlok han Ginoo, waray lain nga matarutam-is kay han pagtipig han iya mga sugo.