1Niyan nagbutang hi Judit hin mga agbon ha iya ulo, binuksan an iya hilawig nga bado basi hikit-an an sako nga dugnit nga iya isinusul-ot ha ilarom han iya mga panapton, ngan hinmapa hiya dida ha salog han iya balay. Amo ini an takna nga iginhahalad an insyenso ha gab-i didto han Templo ha Jerusalem, ngan nag-ampo hi Judit ha dako nga tingog:
2“O Ginoo nga Dyos han amon ginikanan nga hi Simeon, hinumdomi an pagtagi mo kan Simeon hin usa nga espada hin pagbulos hadto nga mga lumalangyaw nga nagkapot kan Dina usa nga babaye nga uray pa, naggisi han iya mga panapton, ngan ginpasipad-an hiya; ira ginhuboan hiya ngan ginpakaalohan hiya; ira ginlugos hiya ngan nakuha an iya pagkauray bisan kon igindiri mo ini.
3Amo ito an hinungdan nga iginpapatay mo an ira mga pangulo—ginpatay dida han amo ngahaw nga higdaan nga ginlugosan nira han babayehay. Imo ginpuo hira ngatanan, mga oripon, mga prinsipe, ngan mga punoan dida han ira mga trono.
4Iginbuot mo nga an ira mga asawa pagdad-on, nga mabihag an ira mga anak nga kababayen-an, ngan an ira mga hiagi pagtikason han mga Israelita nga imo pinili nga mga tawo, nga nagtinguha hin pagbuhat han imo kaburot-on. Napungot hin duro an kabugtoan nga kalalaken-an ni Dina tungod hini nga pagpakaalohi han ira panimalay, sanglit nagtawag hira ha imo hin pakibulig.
“O Dyos ko, pamatii an akon pag-ampo, pag-ampo hin usa nga balo nga babaye.
5Nagmando an imo kamot han ngatanan nga nahibo hadto, ngan an ngatanan nga nahinabo yana ngan buwas. Imo iginlarang ini ngatanan—an nahinabo yana, ngan an mahihinabo pa. Dayuday natuman an imo iginlarang.
6Bisan ano nga karuyag mo nga pagbuhaton, sugad ini hin ginbuhat na. Maaram ka nga daan han ngatanan nga imo pagbubuhaton ngan kon ano nga mga paglarang an imo paghihimoon.
7Makurukusog an mga Asiriahanon yana kay han una; naparayaw hira han ira mga dikabayo ngan baktas nga kasondalohan. Natapod hira han ira mga hinganiban, kundi diri hira maaram, O Ginoo, nga ikaw an paraaway nga naghuhuman han araway. An Ginoo amo an imo ngaran.
8Ha imo kasina, gamita an imo gahom hin pagpatay han ira gamhanan nga kasondalohan. Naglarang hira hin paghugaw han imo Templo nga ginsisingbahan ha imo, ngan pagpusak han mga kanto han imo altar pinaagi han ira mga espada.
9Tan-awa an ira kamapahitas-on ngan kamaparayawon! Usa la ako nga balo nga babaye, kundi tagi ako hin kusog hin pagtuman han akon plano.
10Gamita an akon malimbongon nga mga pulong hin pagpatay ha ira ngatanan, agaron ngan oripon. Mautod unta an ira kamapahitas-on tungod han kusog hin usa nga babaye.
11Diri nasandig an imo gahom dida han kadamo ngan karig-on hin kasondalohan. Amo ikaw an usa nga Dyos nga napaid han mga mapinaubsanon ngan nabulig han mga ginraraog daog. Binubuligan ngan pinananalipdan mo an mga tawo nga magluya ngan magpakalolooy; tinatalwas mo adton mga nawad-an na hin paglaom.
12Yana pamatii an akon pag-ampo, O Dyos han akon ginikanan nga hi Simeon, nga Dyos nga sinasarigan han Israel, nga naghahadi han langit ug tuna, nga magburuhat han mga salog ngan an kadagatan, nga hadi han ngatanan nga mga binuhat. Pamatii an akon pag-ampo ngan
13tugoti an akon maglimbongon nga mga pulong hin pagsamad ngan pagpatay hadton mga naglarang hin sugad nga pagkapintas nga pagraogdaog kontra han imo ginsaaran ngan han imo baraan nga Templo, kontra han Bukid Sion, ngan han tuna nga imo iginhatag han imo mga tawo.
14Pakilalaha an imo bug-os nga nasod ngan an tagsa nga tribo nga ikaw amo an Dyos nga makagarahum ngan gilalabawi han ngatanan, ngan ikaw gud la an nananalipod han mga tawo han Israel!”
Who We AreWhat We EelieveWhat We Do
2025 by iamachristian.org,Inc All rights reserved.
