Ezequiel 10 - Samarenyo Meaning-Based Bible (1984)（MBBSAM）

Binmaya han Templo an Kapawa han Himaya han Ginoo

1Tinman-aw ako ngadto han lukob nga atop ha igbaw han mga ulo han buhi nga mga binuhat, ngan ha igbaw nira may-ada butang nga daw sugad hin trono nga sapiro.

2Ginsiring han Dyos an tawo nga nakakabado hin lino, “Pabutnga han mga kaliding ha ilarom han mga binuhat, ngan pun-a hin mga baga an imo mga kamot. Niyan ipasarang an mga baga ha igbaw han syudad.”

Ginkinitaan ko hiya han iya paglakat.

3Naninindog an mga binuhat didto ha timogan han Templo han pagsulod niya, ngan ginpuno hin dampog an sarusakob nga bungsaran.

4Inmigbaw an mabislaw nga kapawa han himaya han Ginoo tikang han mga binuhat ngan binmalhin ngadto han aragian han Templo. Niyan ginpuno han dampog an Templo, ngan naglamrag han kapawa an bungsaran.

5Hinbatian an aringasa han mga pako han mga binuhat bisan didto han gawas nga bungsaran. Sugad ini han tingog han Dyos nga Labi Kamakagarahum.

6Han pagsugoa han Ginoo han tawo nga nakakabado hin lino nga kuhaon niya an kalayo tikang ha butnga han mga kaliding nga nakada ha ilarom han mga binuhat, sinmulod an tawo ngan tinmindog ha sapit han usa han mga kaliding.

7Ikinadto han usa han mga binuhat an kalayo nga nakada ha butnga nira, pinmurot ini hin mga baga, ngan iginbutang ini dida han mga kamot han tawo nga nakakabado hin lino. Kinarawat han tawo an mga baga ngan linmakat hiya.

8Hinkit-an ko an kada binuhat nga may sugad hin kamot hin tawo pagkit-on ha ilarom han kada pako hini.

9-10Hinkit-an ko liwat nga may-ada upat nga mga kaliding nga parapreho ngatanan, usa nga kaliding sapit han kada binuhat. Nasilaw an mga kaliding sugad hin mahal nga mga bato, ngan may sulod liwat nga lain nga kaliding an kada usa.

11Kon nagkikiwa an mga binuhat, naupod liwat an mga kaliding hin waray paglingilingi. Nagbuburunyog hira ngatanan bisan ngain an ira karuyag kadtoan ngan diri na kinahanglan maglingilingi.

12Luob hin mga mata an ira mga lawas, mga bungkog, mga kamot, mga pako, ngan mga kaliding.

13Amo manta ini nga mga kaliding an akon hinkit-an didto han akon syahan nga panan-awon.

14May upat nga mga bayhon an tagsa nga binuhat. Bayhon hin baka an syahan, bayhon hin tawo an ikaduha, bayhon hin liyon an ikatulo, ngan bayhon hin agila an ikaupat.

15(Amo gihapon ini nga mga binuhat an hinkit-an ko didto ha ligid han Salog Quebar.) Kon napaigbaw an mga binuhat

16ngan nagkikiwa, bunyog gihapon ha ira an mga kaliding.

17Kon nahunong an mga binuhat, nahunong liwat an mga kaliding, kay an gahom han mga binuhat nakada han mga kaliding.

18Niyan binmaya han aragian han Templo an mabislaw nga kapawa han himaya han Ginoo ngan binmalhin ngadto hin dapit ha igbaw han mga binuhat.

19Ginbuklad nira an ira mga pako ngan linmupad tipaigbaw tikang ha tuna samtang nagkikita ako, ngan binmunyog ha ira an mga kaliding. Hinmunong hira didto han sinirangan nga ganghaan han Templo, ngan pinmaigbaw ha ira an mabislaw nga kapawa.

20Kinilala ko hira sugad nga amo ngahaw nga mga binuhat nga hinkit-an ko ha ilarom han Dyos han Israel didto han Salog Quebar.

21An kada usa ha ira may upat nga mga bayhon ngan upat nga mga pako, ngan may sugad hin kamot hin tawo pagkit-on ha ilarom han kada pako.

22An ira mga bayhon sugad gud han mga bayhon nga hinkit-an ko didto ha ligid han Salog Quebar. Natadong pagkiwa tipaunhan an tagsa nga binuhat.