1 Samuel 7 - Samarenyo Meaning-Based Bible (1984)（MBBSAM）

1Sanglit kinuha han mga tawo han Kiriat Jearim an Kahon han Ginsaaran han Ginoo ngan iginbutang ini didto han balay hin usa ka tawo ngan ginngaranan nga Abinadab, nga nag-ukoy didto hin usa nga pungtod. An iya anak, hi Eleazar, amo an gintungdan hin pagkatinaporan han Kahon han Ginsaaran.

Namunoan han Israel hi Samuel

2Didto an Kahon han Ginsaaran han Ginoo ha Kiriat Jearim mga kapin hin 20 ka tuig. Sulod hini nga panahon nag-ampo an ngatanan nga mga Israelita hin pakibulig han Ginoo.

3Ginsiring ni Samuel an mga tawo han Israel, “Kon kinasingkasing an iyo pagdangop han Ginoo, kinahanglan igsalikway niyo an ngatanan nga langyaw nga kadiyosan ngan an mga ladawan han diyosa Astarte. Itubyan hin hingpit an iyo kalugaringon ngadto han Ginoo ngan hiya gudla an iyo pagsingbaha, ngan tatalwason kamo niya ha gahom han mga Filisteohanon.”

4Sanglit iginsalikway han mga Israelita an ira mga diyosdiyos nga Baal ug Astarte, ngan an Ginoo an ira ginsingba.

5Niyan pinakadto ha Mispa ni Samuel an ngatanan nga Israelita, ngan ginsiring hira, “Mag-aampo ako han Ginoo didto para ha iyo.”

6Sanglit nagtirok hira ngatanan didto ha Mispa. Inmalog hira hin tubig ngan iginhuwad ini nga usa nga halad ngadto ha Ginoo, ngan nagpuasa hira hito nga adlaw. Nagsiring hira, “Nakasala kami han Ginoo.” (Didto ini ha Mispa diin hi Samuel pagtuhay hin mga kalipongan han mga Israelita.)

7Han pakabati han mga Filisteohanon nga nagtirok an mga Israelita didto ha Mispa, ginmuwa an lima nga kahadian nga Filisteohanon upod an ira mga tawo hin pakig-away ha ira. Nakahadlok an mga Israelita han pakabati nira

8ngan ginsiring nira hi Samuel, “Ipadayon an imo pag-ampo han Ginoo nga aton Dyos basi talwason kita ha mga Filisteohanon.”

9Nag-ihaw hi Samuel hin usa nga nati nga karnero ngan gintubod ini ngan ginhalad ngadto han Ginoo. Niyan nag-ampo hiya han Ginoo nga buligan an Israel, ngan pinamatian han Ginoo an iya pag-ampo.

10Samtang naghahalad hi Samuel, sinmulong an mga Filisteohanon; kundi hito ngahaw nga takna, dinaguhob sugad hin dalogdog an tingog han Ginoo tikang ha langit. Duro hin kalisang an ira mga kaaway ngan nangalagiw tungod hin kahadlok.

11Nagkagawas an mga Israelita tikang ha Mispa ngan ginlanat nira an mga Filisteohanon tubtob ha Bitcar, ngan ira pinanmatay hira dida han dalan.

12Niyan kinmuha hi Samuel hin bato, gintindog ini ha butnga han Mispa ug Sen, ngan ginngaranan ini nga Ebenezer, kay nagsiring hiya, “Ginbuligan kita han Ginoo tubtob nganhi.”

13Sanglit napirde an mga Filisteohanon, ngan waray itugot han Ginoo nga sulongon nira an katunaan han Israel samtang buhi pa hi Samuel.

14Nahibalik ha Israel an ngatanan nga mga syudad nga naagaw han mga Filisteohanon ha butnga han Ekron ug Gat, sanglit nabawi han Israel an ngatanan nga katunaan niya, ngan nagkamay-ada liwat kalinaw han mga Israelita ngan han mga Canaanhon.

15Namunoan han Israel hi Samuel samtang buhi pa hiya.

16Kada tuig napakadto hiya ha Betel, Gilgal, ug Mispa, ngan didto hini nga mga dapit gintutuhay niya an mga kalipongan.

17Niyan, nauli hiya ngadto ha Rama, diin usa hiya nga maghurukom han mga Israelita. Didto ha Rama nagtindog hiya hin usa nga altar para han Ginoo.