Kinaadman ni Solomon 7 - Samarenyo Meaning-Based Bible (1984)（MBBSAM）

Sugad hin Iba nga Tawo in Usa nga Hadi

1-2Sugad hin bisan hin-o nga tawo, may-ada ko kamatayon. Usa ako nga tulin hadton syahan nga tawo nga ginhimo hin tuna. Ginpanamkon ako tikang hin similya hin usa nga lalake, dida hin kalipay han pakighilawas. Sulod hin siyam ka bulan namay-ada ako unod tikang han dugo han taguangkan han akon iroy.

3Han katawo ko, nahinganhi ako ha kalibutan sugad han iba nga tawo. Nagtikang ako hin pagginhawa han amo ngahaw nga hangin nga giniginhawa han ngatanan; ngan sugad han iba nga tawo, an pagtuok amo an syahan nga tingog nga akon nahimo.

4Ginputos ako hin mga lampin ngan ginmangnoan ako.

5Waray pa hadi nga nagtikang hin kinabuhi nga lain hini nga paagi.

6Para ha aton ngatanan may-ada usa nga paagi hin pagsulod ngadto ha kinabuhi, ngan may-ada usa nga paagi hin paggawas hini.

Iginpahibaro ni Solomon an Iya Paghigugma han Kinaadman

7Han pakasabot ko nga tawo la ako, nag-ampo ako ngan gintagan ako hin pakasabot. Kinmanhi ha akon an espiritu han Kinaadman.

8Gin-isip ko hiya nga labaw pa hin bisan ano nga trono o korona. Waray hinungdan an manggad kon itanding ha iya.

9Diri makakatupong han iya pagkamahal an marahalon nga mga alahas; usa la ka harop nga baras an ngatanan nga bulawan ha kalibutan ngan sugad la hin lapok an salapi kon itutupad ini hira han kinaadman.

10Para ha akon larolabaw pa hiya kay han maupay nga panlawas ngan han kamahusay. Iya in usa nga pagkamalamrag nga diri gud naiban, ngan ginpapalabi ko ini kay hin iba nga kapawa.

11Han pagkanhi ha akon han Kinaadman, inmupod ha iya an ngatanan nga mag-upay nga mga butang. Gindad-an ako niya hin diri maasoy nga mga bahandi.

12Nagmalipayon ako upod ha ira ngatanan, kay an Kinaadman an nagdara ha ira ngadi ha akon. Waray ako makasabot hadto nga amo hiya an tinikangan hini ngatanan nga mga butang.

13Kinasingkasing an akon pag-aram tikang ha iya ngan yana malipayon ako hin pagpaangbit han akon hinbaroan.

14Waray tawo nga makakaubos han mga manggad han Kinaadman. Gamita niyo ito nga mga manggad ngan mahihimo kamo nga kasangkayan han Dyos; nauyon hiya han ngatanan nga iyo hinbaroan tikang ha iya.

15Nag-aampo ako ngadto han Dyos nga an akon mga panhunahuna matakos unta han akon hinbaroan, ngan maghimangraw ako sumala han iya kaburot-on. Hiya amo an giya han Kinaadman; nahatag hiya hin mga sagdon hadton mga mag-aram.

16Aada kita ha ubos han iya gahom ug pagburot-an—an aton kalugaringon, an aton mga pulong, an ngatanan naton nga pagsabot ngan mga hibaro.

17Amo hiya an naghatag ha akon han matuod nga paghibaro han mga gahom han kinaiya han kalibutan: kon ano an ginamit hin paghimo han kalibutan; kon gin-unan-o hin pagpakiwa han mga ginhimo;

18kon gin-unan-o hin paghimo han kalendaryo pinaagi han mga gios han adlaw, han pagbarobalhin han mga panahon,

19han pagpurupundok han kabiton-an, ngan han mga pagtatagmo han katuigan.

20Gintutdoan ako niya hiunong han kinaiya han buhi nga mga binuhat, han panggios han ihalas nga kamanampan, han kusog han mga hangin, han mga gahom han hunahuna han mga tawo, han magkalainlain nga mga tanom, ngan han paggamit han mga gamot hin pagtambal.

21Hinbaroan ko an mga butang nga daan na hinsabotan hin maupay ngan an mga butang nga waray pa hisaboti hadto,

22kay an Kinaadman nga naghatag hin dagway han tagsatagsa nga butang nga aanhi amo an akon magturutdo.

May-ada Kinaiya an Kinaadman

Hitaas an pagsabot ngan baraan an espiritu han Kinaadman. Uusa la an iya kinaiya, kundi mapgpapadayag han iya kalugaringon ha damo nga mga paagi. Diri ini hinimo hin bisan ano nga butang, ngan nagkikiwa ini hin waray makaurulang. Matin-aw, malinis, ngan katataporan ini; waray hini magpapasipara. Nahigugma ini han maupay. Matarom an hibaro ngan diri ini malulupigan,

23maloloy-on ngan usa nga sangkay han katawhan. Kasasarigan ngan diri gin-aalngan, ngan waray mga pagkabaraka. May gahom han ngatanan nga nakita han ngatanan nga mga butang. Nakakasalupsop ini han tagsa nga hitaas an pagsabot ngan puraw nga espiritu, bisan magdiunan-o hin kadelikado han kinaiya hini.

24Masarusayon an pagkiwa han Kinaadman kay han kiwa ngahaw; uraura hin kaputli niya nga nakakasalupsop hiya han tagsa nga butang.

25Usa hiya nga gininhawa han gahom han Dyos—usa nga puraw ngan mainggat nga sulhog han himaya tikang han Labi Kamakagarahum. Waray gud bisan ano nga mahugaw nga makakasulod nga diri hisasabotan ngadto han kinaadman.

26Usa hiya nga sikal han kapawa nga dayon, usa nga hingpit nga salaming han kanan Dyos mga buhat ngan kaupayan.

27Bisan kon nag-uusaan la hin pagbuhat an Kinaadman, nakakahimo hiya han ngatanan nga butang. Ginbabag-o niya an tagsa nga butang, bisan kon waray hiya pagkabalhin. Tikang ha usa ngadto han sunod nga katulinan nasulod hiya han mga kalag han baraan nga mga tawo, ngan ginhihimo hira nga mga sangkay ngan mga manaragna han Dyos.

28Waray na gud larolabaw nga hinigugma han Dyos kay han mga tawo nga kausa han Kinaadman.

29Mas matahom pa an Kinaadman kay han adlaw ngan han ngatanan nga mga kabiton-an. Mauruupay hiya kay han kapawa ngahaw,

30kay dayuday nasunod han adlaw an gab-i, kundi diri gud nakakadaog han Kinaadman an karat-an.