Kinaadman ni Solomon 10 - Samarenyo Meaning-Based Bible (1984)（MBBSAM）

Nanalipod kan Adan an Kinaadman

1Ginpanalipdan han Kinaadman an amay han kalibutan, an syahan nga tawo nga ginhimo, han hiya pa la an gintuha. Iya gintalwas hiya han iya kalugaringon niya nga salaan nga buhat

2ngan gintagan hiya hin kusog hin paghadi han tagsa nga butang ha tuna.

Binmaya han Kinaadman hi Cain

3Kundi may-ada usa nga diri matadong nga tawo nga binmaya han Kinaadman; iya gindaot an iya kalugaringon pinaagi hin pagpatay han iya bugto tungod han iya kasina.

Pinanalipdan han Kinaadman hi Noe

4Tungod hito nga sala, ginlunopan an tuna, kundi gintalwas na liwat ini han Kinaadman. Iya ginmandoan in usa nga matadong nga tawo didto han iya diri madig-on nga sakayan nga hinimo hin kahoy.

Binmulig kan Abraham an Kinaadman

5Ha usa nga higayon, dida nga nagkakasaramok an mga nasod tungod han ira magraot nga mga hunahuna, nakakilala an Kinaadman hin usa nga matadong nga tawo, ngan ginhimo hiya nga waray sala ha atubangan han Dyos. Gintagan hiya hin kusog hin pagsugot han sugo han Dyos bisan kon minahal niya an iya anak.

Gintalwas han Kinaadman hi Lot

6Gintalwas han Kinaadman in usa nga matadong nga tawo samtang nagkakamatay an diri dyosnon nga mga tawo. Nakalikay hiya han kalayo nga nag-ugtang han lima nga mga syudad.

7Makikita pa niyo an kamatuoran han ira pagkamaraot. Waray gamit ngan nag-iinaso la gihapon an tuna didto. Nabunga an mga tanom didto, kundi nagkataktak dayon ha tuna, ngan natindog didto in usa nga harigi nga asin nga usa nga hinumdoman para hin usa ka tawo nga waray tumoo.

8Nagpasibaya han Kinaadman an mga tawo hadto nga mga syudad ngan waray hira makakilala kon ano an matadong ngan kon ano an sayop. Labot la hini, an naugtang nga mga syudad nagpapahinumdom pa ha aton han ira tinuyaw nga paagi han ira maraot nga kinabuhi, sanglit diri gud hingangalimtan an ira kapakyasan.

9Kundi gintalwas han Kinaadman ha kataragman an iya mga surugoon.

Pinanalipdan han Kinaadman hi Jacob

10May-ada hadto usa nga matadong nga tawo nga karuyag kumalagiw han kasina han iya bugto, ngan gintugwayan hiya han Kinaadman dida han matadong nga dalan. Iginpakita ha iya an ginhadian han Dyos ngan iya gintugotan nga mahibaro hiya hin baraan nga mga butang. Ginhimo niya hiya nga mainuswagon ngan malamposon ha iya mga buhat.

11Kay naawa an iba han iya mga hiagi, ngan karuyag nga agawon nira ha iya, nagbantay ha iya an Kinaadman ngan nagkamay-ada hiya hin damo nga bahandi.

12Ginpanalipdan niya hiya tikang han iya mga kaaway nga naghulat hin usa nga higayon hin pagsulong ha iya. Ginpadaog hiya dida han makuri nga pakig-away, basi mahibaro hiya nga waray makakahimo hin usa ka tawo nga labaw hin ka makusog kay hin pag-alagad han Dyos.

Gintalwas han Kinaadman hi Jose

13May-ada hadto usa nga matadong nga tawo nga iginbaligya ngadto hin pagkaoripon, kundi waray hiya bayai han Kinaadman. Pinanalipdan hiya han sala. Gin-updan hiya ngadto han prisohan,

14ngan waray gud hiya bayai tubtob han paghatagi ha iya hin gahom hin usa nga ginhadian ngan paghimoa ha iya nga pangulo hin mga tawo nga hadto anay nagraogdaog ha iya. Iya ini iginpahibaro nga ginbutangbutangan hiya hin buwa nga sumbong, ngan ihinatag ha iya in dayon nga kadungganan.

Gin-unhan han Kinaadman an mga Israelita tikang ha Ehipto

15Usa ka panahon gintalwas han Kinaadman in usa nga waray sala ngan baraan nga mga tawo tikang hin usa nga nasod hin mga magraogdaog.

16Sinmulod hiya han kalag hin usa han mga surugoon han Dyos ngan iya inatubang an mga mag-isog nga kahadian pinaagi hin pagbuhat hin mga milagro.

17Iya ginbalos an mga tawo han Dyos tungod han ira mga kakurian. Nag-una hiya ha ira dida hin usa nga milagroso nga paglakaton. Tinagan hira han landong kon adlaw an ira paglakat ngan masanag nga mga bitoon kon gab-i.

18Iya gin-unhan hira ha paglatas han higlarom nga katubigan han Dagat nga Pula,

19kundi iya ginlumos an ira mga kaaway ngan nahidagsa an ira mga lawas dida ha baybayon.

20Sanglit gintikas han mga magtadong an mga butang han mga kaaway han Dyos. Nagkanta hira hin mga imno ngadto han imo baraan nga ngaran, O Ginoo; nagdurungan hira hin pagdayaw ha imo tungod han pagpanalipod nimo ha ira.

21Naghatag an Kinaadman hin mga pulong hadton diri nakakayakan; iya pa ngani ginhimo nga makayakan hin tuhay an mga puya nga kabataan.