18-19 Nahinabo ini nga mga butang ha panahon ni Hadi Asuero. Ginsakop niya in 127 nga mga lalawigan, tikang ha India ngadto ha Sudan tikang han iya hadianon nga trono didto ha Susa nga kapital nga syudad han Persia.
20 Dida han ikatulo ka tuig nga iya pagkahadi, nagbangkite hiya para han ngatanan niya nga mga opisyal ngan mga punoan. Nagtambog hini an mga labaw han kasondalohan han Persia ug Media, sugad man an mga gobernador ngan harangdon nga mga tawo han mga lalawigan.
21 Sulod hin unom ka bulan iginpakita niya an mga manggad han hadianon nga palasyo pinaagi hin mga dagko ug mahal nga pagsaurog.
22 Katapos han pyesta, nagbangkite an hadi para han mga tawo han iba nga mga nasod nga nakadto han syudad. Inmabot ini hin usa ka semana ngan ginbuhat ini didto han mga bungsaran han hadianon nga palasyo.
23 Ginsabongan an bungsaran didto hin lino ngan algodon nga mga biray, nga tinaod hin mga lubid nga granate nga lino ngada hin mga dagko nga singsing nga bulawan ug salapi dida hin mga harigi nga marmol ug mahal nga bato. Iginbutang in mga lingkoranan nga bulawan ug salapi didto han bungsaran nga sinalogan hin busag ngan berde nga marmol, ngan hin mahal nga mga perlas.
24 Igindurot in mga irimnon dida hin magkalainlain nga bulawan nga mga kopa, an usa hini gin-adornohan hin mga alahas nga labaw kamahal hin 1,000 ka tonelada nga salapi, ngan ginpatakasan hira han hadi hin paghatagi han iya mga bino.
25 Waray katubtoban an paghatag han mga irimnon; nagsugo an hadi han mga surugoon han palasyo nga paimnon an ngatanan sugad han ira karuyag.
26 Hito liwat nga takna nagbangkite liwat hi Rayna Vasti para han kababayen-an didto ha sakob han hadianon nga palasyo.
27 Dida han ikapito ka adlaw han kanan hadi bangkite nagmalipayon an hadi, sanglit ginpasulod niya an pito nga mga yunuko nga iya kalugaringon nga mga surugoon: hira Aman, Bazan, Tarra, Borasi, Satolta, Abataza ug Taraba.
28 Iya ginsugo hira nga dad-on ha atubangan niya hi Rayna Vasti, basi niya ibutang ha iya an hadianon nga korona. Mahusay nga babaye an rayna ngan karuyag han hadi igparayaw an iya katahom ngadto han mga opisyal ngan han ngatanan nga iya mga gindapit.
29 Kundi waray sumugot hi Rayna Vasti ngan waray umupod han mga surugoon. Naawod an hadi ngan duro an iya kasina.
30 Ginsumatan han hadi an iya mga magsaragdon mahitungod han ginbaton ni Rayna Vasti, ngan nangaro hiya hin sagdon kon ano an iya angay pagbuhaton.
31-32 Tulo ha ira nga suok kaupay han hadi ngan nakapot han gihahataasi nga katungdanan, kinmadto han hadi hin pagsumat ha iya han kinahanglanon han balaod ngan kon ano an angay buhaton kan Rayna Vasti tungod han diri niya pagtuman han sugo han hadi pinaagi han iya mga surugoon. Ini nga tulo amo hira Arqueseos, Sarsateos, ug Malasear, mga opisyal han Persia ug Media.
33 Ginsumatan han hadi an iya mga opisyal ug mga gobernador han Media ug Persia mahitungod han pag-ato han rayna ha iya. Sanglit ginsiring ni Moqueo an hadi ug an ngatanan nga nakada ha atubangan han hadi, “Ginpakaalohan ni Rayna Vasti diri hi ikaw la kundi upod liwat kami ngatanan.
34-35 Kon an aton mga asawa makabati hini nga ginbuhat han rayna, diri na gud hira mahahadlok hin pag-ato han ira bana ug diri na hira matahod sugad han ginbuhat ni Vasti.
36 Kon makakalipay ini ha imo, Harangdon nga Hadi, pagpagawas hin usa nga hadianon nga sugo nga diri na gud hi Vasti makaatubang han hadi. Ipasurat ini didto han mga balaod han Persia ug Media. Niyan ihatag an iya pagkarayna ngadto hin mauruupay nga babaye.
37 Kon hibaroan na an imo sugo ha bug-os nga ginhadian, pagtatahoron na han tagsa nga babaye hin angay nga pagtahod an iya bana, mga riko o pobre hiya.”
38 Naruyagan han hadi ngan han iya mga opisyal ini nga hunahuna, ngan ginbuhat han hadi sugad han ginlarang ni Moqueo.
39 Nagpadara hiya hin mensahe ngadto han tagsa nga lalawigan ha pinulongan hito nga lalawigan, nga nagsiring nga kinahanglan an bana pagtahoron dida han iya kalugaringon nga panimalay.
Who We AreWhat We EelieveWhat We Do
2025 by iamachristian.org,Inc All rights reserved.
