13 Amo ini an usa nga kopya han pasangyaw: Mga pangumosta tikang kan Hadi Asuero, an Bantogan, ngadto han mga gobernador han 127 nga mga lalawigan, tikang ha India ngadto ha Sudan, ngan ngadto hadton ngatanan nga mga maunongon ha amon.
14 “Damo in mga tawo nga nadugang an ira pagkamapinahatas-on kon ginpapasidunggan hira ngan kon tinatagan hira hin damo nga mga kaupayan.
15 Diri na hira mag-aram kon ano an ira sadang pagbuhaton han damo nira nga kaupayan, sanglit nagtitinguha hira diri la hin pagdaot han aton mga sakop, kundi ginlilingo pa nira adton nahatag ha ira hin mga kaupayan.
16 Diri gud hira nahibabaro hin pagpasalamat han ginbubuhat han mga tawo para ha ira, ngan naghuhunahuna pa ngani hira nga makakalikay hira han paghukom han Dyos nga nadiri han maraot ngan nakita han ngatanan. Ha ira pagkamapinahitas-on pinamamatian nira an ulog-ulog han tapang ngan magpakasasala nga mga tawo.
17 “Agsob liwat ini mahinabo nga an mga kasangkayan nga gintugyanan hin mga katungdanan ha pamunoan ngahaw an makusog mangaro hin mga paghangyo hadton mga aada ha kagamhanan. An ira mga pangulo ginhihimo nira nga ira kausa hin panmatay hin mga tawo ngan pagdara hin mga kadimalasan nga diri na gud kabubuligan.
18 Ini nga kasangkayan, pinaagi han mga buwa ngan maglimbong nga mga ginawian, nagpapahimulos han maupay nga kaburot-on han ira mga pangulo.
19 “Makita kamo hin mga pananglitan hini nga diri amo nga paggamit hin gahom, diri la dida han mga susumaton nga aton kinarawat tikang han naglabay nga panahon, kundi dida han labi pa hin kamakapupungot nga mga butang nga nahinabo yana dida ha iyo.
20 “Gintalinguha ko hin pagsiguro nga ha panahon nga tiarabot magpabilin an akon ginhadian hin kawaray kasamokan ngan malinaw pag-ukyan han ngatanan nga mga tawo.
21 Mahihimo ini pinaagi hin pagliwan hin pipira nga mga paagi ngan pinaagi hin waray inuugopan nga pagturutimbang han tagsa nga kahimtang nga akon hibabaroan.
22 “Pagpainoinoha, pananglitan, an kaso ni Aman nga anak ni Hamedata, nga taga-Macedonia. Usa hiya nga lumalangyaw nga waray Persiahanon nga dugo dida ha iya ngan waray dida ha iya an akon kamahinatagon; kundi ginkarawat ko hiya,
23 ngan kinmarawat hiya han kaupayan han akon pagpaid ngan paghigugma han ngatanan nga mga tawo. Ngani iginpasangyaw hiya nga ‘Amay’ han ginhadian ngan kinmarawat hiya hin darudako nga kadungganan kay han bisan hin-o labot han hadi.
24 “Kundi waray katubtoban an iya pagkamapinahitas-on, ngan nagtalinguha hiya hin pagpatay ha akon ngan hin pag-agaw han ginhadian.
25 Dida han iya maabtik ngan malimbong nga paagi, naghangyo hiya nga patayon hi Mardoqueo—hi Mardoqueo nga amo an nagtalwas han akon kinabuhi ngan dayuday nag-ugop ha akon. Ginhangyo pa ngani ni Aman nga patayon hi Ester nga akon rayna nga waray naton sadang igsuson, ngan tinuod, karuyag pa ngani nga iupod hin pagpataya an ngatanan nga mga Judiyo.
26 An iya tuyo amo an paghimo ha aton nga makalolooy ngan basi an mga taga-Macedonia makaagaw han ginhadian han Persia.
27 Bisan kon naglarang nga mabudhion ini nga kriminal hin pagpuo han mga Judiyo, hinbaroan ko nga ini nga mga Judiyo diri gud mga maglingo, kundi gindudumara hira hin matadong nga mga balaod.
28 Nagsisingba hira han buhi nga Dyos, nga amo an gilalabawi ngan gidadakoi nga Dyos nga nagpahimutang han aton ginhadian ha maupay nga kahimtang tikang pa han panahon han aton kaapoy-apoyan tubtob yana nga adlaw naton.
29 “Sanglit nagsasagdon ako ha iyo nga diri na niyo pagtumanon an mga sugo dida han mga surat nga ginpagawas ni Aman.
30 Amo hiya an tawo nga nagbaton hini ngatanan, ngan ginbitay hiya kaupod han bug-os niya nga panimalay didto han mga ganghaan han Susa. Iginhatag ha iya han Dyos nga nagdudumara han ngatanan nga mga butang an madali nga sirot nga angay ha iya.
31 “Ginsusugo ko kamo nga ipaskin niyo in mga kopya hini nga pasangyaw ha tagsa nga dapit nga damo nga mga tawo an makakabasa. Tugoti niyo an mga Judiyo hin pag-ukoy sumala han kalugaringon nira nga mga pamatasan,
32 ngan tagi hira hin tambulig kon manalipod hira han ira kalugaringon kontra hadton mga nasulong ha ira dida han adlaw nga igintalaan para han pagpatay ha ira, nga amo an ika-13 nga adlaw han ika-12 nga bulan an bulan han Adar.
33 Ginliwat han Dyos nga nagdudumara han ngatanan nga mga butang ito nga adlaw nga pamatay ha ira ngadto hin usa nga adlaw hin pagsaurog para han iya pinili nga mga tawo.
34 “Iglakip ini nga adlaw dida han iyo mga iglilihi nga adlaw han iyo nasod ngan pagsaurog kamo hini sugad nga usa nga pyesta.
35 Yana ngan han tiarabot nga panahon magpapahinumdom ini ha aton ngan han ngatanan naton nga mga kabulig han paagi han Dyos hin pagbantay han aton nasod, ngan magpapahinumdom liwat ini hadton mga naglalarang nga mabudhion kontra ha aton han kanan Dyos pagtarhog hin pagpatay ha ira.
36 “Maabat han akon kasina an tagsa nga lalawigan ug syudad nga diri magsusugot hini nga mga sugo. Pagpupuohon ini hira ha pag-awayan ngan pagsusunogon. Waray na gud tawo nga mapakadto hito nga mga dapit ngan bisan pa an katamsihan ngan ihalas nga kamanampan maglilikay ha kadayonan hini nga mga dapit.
Who We AreWhat We EelieveWhat We Do
2025 by iamachristian.org,Inc All rights reserved.
