Sirac 28 - Samarenyo Meaning-Based Bible (1984)（MBBSAM）

1Natigaman an Ginoo han imo mga sala ngan kon magdumot ka, an Ginoo magdudumot liwat ha imo.

2Kundi kon magpasaylo ka hadton nakasayop ha imo, pasasayloon an imo mga sala kon mag-ampo ka.

3Ayaw paglaom nga pasasayloon ka han Ginoo kon may-ada pagdumot nimo han imo igkasi-tawo.

4Ikaw ngahaw usa nga makasasala, ngan kon diri ka magpasaylo, waray ka katungod hin pag-ampo basi an Ginoo magpasaylo han imo mga sala.

5Kon diri ka makakabaya han kasina, waray ka paglaom nga pasasayloon ka—usa ka la nga tawo.

6Panumdom hini! Maabot in adlaw nga mapatay ka ngan madudunot an imo lawas. Sanglit bayai na an pagdumot ngan pag-ukoy hin kinabuhi nga subay han mga sugo han Ginoo,

7an mga sugo dida han ginsaaran han Gihahataasi. Ayaw pagkinabaraka han mga sayop han imo amyaw, lugod, hingalimti ito nga mga sayop.

An mga Larolantugi

8Kon maglikay ka hin mga larolantugi, diri ka gad makakabuhat hin dagko nga mga sala, tungod kay an tinikangan hini amo an mapaso nga ulo.

9Sala an pag-utod han maupay nga kamagsarangkay pinaagi hin pagturutugpo basi magkasamok in mga tawo nga maupay an sinabotan.

10Kon damo an isungo mo nga kahoy, labi na hin kamapaso han kalayo. Kon dako an kamatig-a ha kasingkasing, labi hin kamapaso han pagkabaton. Kon makurukusog ngan darudamo an bahandi han tawo, labi na nga makahimo hiya hin kasina.

11An kasina nga makuri kapudngan amo an tinikangan hin kasamokan.

12Makakahimo ka hin paghuyop han baga basi magkalayo, o makakahimo ka liwat nga imo lud-an basi maparong. Ha bisan hain hini nga paagi nagamit ka han imo baba.

An Waray Himagkaagan nga Karukayakan

13An mga maglibak ug mga buwaon nga tawo kinahanglan nga pagpakaraoton, tungod kay hira an nakabungkag hin damo nga mga tawo nga nagtitipot la han ira pakabuhi.

14Damo in mga tawo nga nabungkag an ira kinabuhi ngan pinaiwas ha ira panimalay tungod la hin mga tawo nga nanginginlabot han ira pakabuhi. In sugad hini nga diri kinahanglan nga panginlabot nakabungkag na hin mga magkusog nga syudad ug mga panimalay hin harangdon nga mga tawo.

15An mga maglibak nakapabulag hin mag-asawa ngan inagawan han ngatanan nga iya ginkabudlayan.

16Adton mamati hin mga pakaraot waray kamurayaw ha hunahuna.

17An usa nga lamba makakapanlabod kundi an malara nga dila makakabari hin mga tul-an.

18Darudamo nga mga tawo in namatay tungod hin waray himangkaagan nga mga yakan kay hadton namatay pinaagi hin espada.

19-20Hunahunaa na la nga palaran ka kon waray ka mag-agi hin pakabati han waray hinungdan nga mga yakan nga iginpahinungod ha imo—kon waray ka hito nga puthaw nga yugo ha imo liog ug hito nga mabug-at nga kadena ha imo mga tiil.

21An pagpakaraot nga paglibak amo an tinikangan hin makalolooy nga kamatayon; ha pagkatinuod, maupay pa lugod nga mamatay ka.

22An tawo nga dyosnon diri madadaog han pagpakaraot nga libak, diri makakasunog ha ira an ira kalayo;

23an ira madadaog amo adton binmaya han Ginoo; kon kadagkutan na an kalayo han pagpakaraot nga libak dida ha ira, diri na gud ini mapaparong. An pagpakaraot nga libak amo an matukob ha ira sugad hin liyon ngan amo an maghuhunithunit ha ira sugad hin leyopardo.

24Diri ba nimo gin-aalad an imo tuna? Diri ba nimo ginhihipos hin maupay an imo kwarta?

25Sanglit, kinahanglan nga mag-ikmat ka han imo igyayakan. Pagtirotimbanga an tagsa mo nga pulong ngan pag-andam hin yawi nga igtatak-om mo han imo baba.

26Bangin may-ada usa nga naghuhulat la hin higayon nga magsayop ka, ngan kon diri ka maghinay, madadakop ka ha imo ngahaw pulong ngan matutumba ka dida ha iya atubangan.