1Ayaw pag-ungara hin dako nga panimalay kon waray manla pulos an mga anak. Diri gud sadang iparayaw an mga anak nga lalake nga diri nakilala han Dyos.
2Magkadiano hin kadamo an imo mga anak, ayaw hira iparayaw kon waray hira pagkahadlok han Ginoo.
3Ayaw ibutang an imo paglaom han ira kabubuwason o ayaw pagpaabot nga maghilawig an ira kinabuhi. Mauruupay pa an usa nga bata nga nagbubuhat han kaburot-on han Ginoo kay han usa ka yukot nga diri nagbubuhat. Mauruupay nga mamatay ka nga waray mga anak kay hin pagkamay-ada mga anak nga diri nakilala han Dyos.
4Mahihimo nga magtikadamo an umurokoy hin usa nga syudad tungod han kamaaram hin usa ka tawo, samtang nabubungkag in usa nga tribo tungod hin tampalasan nga mga tawo.
5Nakadamo na ako pakakita hin sugad nga mga butang, ngan hinbatian ko in labaw pa hini nga mga susbaranan.
6Makakaluob an nagdidilaab nga kasina han Ginoo kontra hin gutiay nga hugpo hin mga makasasala o hin usa nga masupakon nga nasod.
7Waray niya pasayloa an mga higante han una nga mga panahon, nga sinmupil ha iya ngan tinmapod la han ira kalugaringon nga kusog.
8Dinmiri hiya han pagpalabilabi han mga tawo nga kaurosa ni Lot ngan naubos ini hira hin kamatay.
9Waray niya kalooyi adto nga mga nasod nga iya gin-ubos hin pagbungkag tungod han mga sala nga ira ginbuhat,
10sugad man an 600,000 nga mga tawo nga nagkaurosa didto ha kamingawan hin pagsupil ha iya.
11Bisan kon may-ada usa la ka tawo nga matig-a an ulo, usa gud nga milagro kon mahigawas hiya han kastigo. Maloloy-on an Ginoo, kundi danay liwat hiya mapungot. May gahom hiya hin pagpasaylo o hin pagkasina.
12Dako an iya pagkalooy sugad nga mabug-at man an iya pagkastigo. Ginhuhukman niya an mga tawo sumala han ira ginbuhat.
13Waray makakasala nga makakakalagiw nga dara an iya kinawat. Babaloson han Ginoo an kamapailubon han mainampoon nga mga tawo.
14Pagbabaloson an tagsa nga tawo nga matadong; makarawat an ngatanan sumala han angay ihatag ha iya.
17Ayaw gud pagsiring, “Matago ako han Ginoo. Hin-o ngani an aadto ha langit nga manunumdom ha akon? Uunanhon an paghisabti ha akon dida hin damo kaupay nga mga tawo? Damo kaupay an mga binuhat, ano man an akon gamit?
18Kon umabot na an Ginoo, mangungurog an ngatanan; an tuna ngan an dagko nga katubigan ha ilarom han tuna, an panganoron ngan an kalangitan ha igbaw han panganod.
19Mababay-og an kabukiran ngan mangungurog an mga patukoranan han tuna ha pagtutok niya hini ngatanan.
20Diri makakahunahuna ha akon an Ginoo. Waray gud magdidipara han akon bubuhaton.
21Kon makasala ako ngan tagoon ko la an akon pag-ato, waray mahibabaro hini.
22Kon magbuhat ako hin matadong waray magsusumat han Ginoo hiunong hini. Kon baga sidngon, hin-o man ngani an karuyag maghulat ha iya? Mahinay hiya hin duro hin pagtuman han iya iginsiring nga iya pagbubuhaton.”
23Sugad hini an panhunahuna hin tawo nga gutiay la an pagsabot ngan gintutdoan hin linurong nga paagi.
An Kanan Dyos Kinaadman hin Pagtuha24Anak ko, pamati ngan dungga ako; kadudugangan an imo hibaro kon imo ini pagbuhaton.
25Tatagan ko ikaw hin makugi ngan tuptop nga pagtutdo.
26Ha tinikangan gintuha han Ginoo an iya mga binuhat,
ngan gintagan an ngatanan han ira kalugaringon nga dapit.
27Ginpahimutang niya an ngatanan hin dayon nga kahusayan,
ngan nagsugo hiya nga amo gud ini ha kadayonan.
Waray usa nga bahin han mga binuhat nga gugutomon;
waray bahin nga gugul-an o mahunong han iya buruhaton.
28Diri an mga magkalainlain nga butang magpapaagaw-agaw hin dapit,
ngan diri gud nira susupakon an iya pulong.
29Han paghimoa na hini ngatanan han Ginoo,
sinmiplat hiya han tuna ngan ginpuno ini hin mag-upay nga mga butang.
30Ginluob ini niya han ngatanan nga mga binuhat
nga kinahanglan mamatay ngan bumalik hin pagkatapotapo.
Who We AreWhat We EelieveWhat We Do
2025 by iamachristian.org,Inc All rights reserved.
