Kinaadman ni Solomon 17 - Samarenyo Meaning-Based Bible (1984)（MBBSAM）

Nahadlok hin Duro an mga Ehiptohanon

1O Ginoo urosahon ngan makuri matagkad hin pagsabot han mga buhat han imo paghukom; sanglit nahisalaag an mga tawo nga waray katutdoi hiunong hini.

2Kon an magtinalapason nga mga tawo naghunahuna nga aada ha ira gahom an imo baraan nga nasod, napriso hira ngahaw hin maiha nga kagab-ihon didto hin kasisidman. Naghigda hira didto han kalugaringon nira nga mga balay, ngan nahigawas hira han imo dayon nga pagmangno.

3An hunahuna nira nga natago an ira mga sala ngan waray hisaboti, ngan nasalipdan han masirom nga biray hin pagkalimot, kundi yana makalilisang an ira kahadlok, kagupong, ngan kalisang tungod hin mga murto nga kalag.

4Bisan an magsirom nga mga kanto nga ira ginhigdaan waray makapanalipod ha ira ha kahadlok. Ginlibotan hira hin magpakaharadlok nga mga tingog; pinmakita ha atubangan han ira mga mata in mga magraksot nga murto nga masulob-on an mga nawong.

5Waray kalayo nga may-ada gahom hin paghatag ha ira hin kapawa, ngan waray nahimo han maglamrag nga kabiton-an hin pagpaiwas hito nga makamaratay nga kasisidman.

6May-ada la didto usa nga makaharadlok nga kalayo, nga diri kamot hin tawo an nagdagkot nga sinmilaw ngada ha ira ngan tungod han ira kahadlok nagmatuod hira nga an tinuod nga kalibutan larolabaw pa hin kamaraot kay han mga butang nga ira ginhunahuna.

7An mga palipatlipat nga nahimo han ira malimbong nga salamangka nakapaawod ha ira, ngan nawaray na an ngatanan nga kinaadman nga ira iginparayaw.

8Gintug-an nira nga nakapaiwas hira han ngatanan nga kahadlok ngan mga kasamok hin magsakiton nga mga panhunahuna, kundi yana hira lugod an magsakit hin tinuyaw ngan waray hinungdan nga mga pagkahadlok.

9Bisan kon waray tinuod nga nahinabo nga makulba, nahadlok hira hin mga maglara nga kahalasan ngan kamanampan nga nasulong ha ira.

10Sanglit nagkamatay hira nga nagkukurog hin kahadlok, kahadlok bisan hin pagpukrat han ira mga mata, kundi diri liwat hira nakakahimo hin pagpiyong.

11May pagkamatalaw an pagkamaraot ha iya ngahaw ngan naghuhukom hiya ha karat-an ha iya ngahaw. An tawo nga may-ada salaan nga konsyensya, dayuday magpipinanhunahuna nga an mga butang labaw pa kamaraot kay han ira tinuod nga kahimtang.

12An kahadlok waray lain kon diri an kapakyas hin paggamit han bulig nga ihinahatag han pangatadongan.

13Kon kulang ka han pagtapod nga nasarig han pangatadongan, natubyan ka ngadto han kahadlok nga natikang han kawaray hibaro.

14Ha bug-os nga gab-i nangaturog adto nga mga tawo nga diri murayaw, bisan kon waray gahom ha ira an kagab-ihon, kay natikang ini han waray gahom nga mga kahiladman han tuna han mga minatay.

15Ginlanat hira hin magpakaharadlok nga mga hitsora, ngan baga patay hira pagkit-on ha ira mga higdaan dida han pagtubyan nira han ira kalugaringon ngadto han tigda ngan waray pagpaabota nga kahadlok nga inmabot ha ira.

16Nahiraptay la dayon an mga tawo ngan natumba hira nga ginapos han mga kadena han ira kalugaringon nga kahadlok.

17Ginbihag an mga mag-uruma, mga magmarangno hin mga karnero, ngan mga mag-aralayon, ngan han amo ngahaw nga diri kapugngan nga kapalaran ngan ginggapos didto han kasisidman ha amo ngahaw nga diri kinikita nga kadena.

18-19Nagkalilisang hira han pakabati nira tungod han haganas han hangin o han honi han katamsihan didto ha kakayohan o han aringasa han masulog nga tubig o han karadol han nahuhulog nga bato o han goliat han diri kinikita nga mga binuhat nga waray hunong hin darudalagan o han pagngurob han ihalas nga kamanampan o han mga malanoy nga aningal tikang ha kabukiran.

20Dida hi hingpit nga kapawa han adlaw nagpadayon hin waray karinggalan an iba nga bahin han kalibutan han ira mga buhat.

21Adto la nga mga tawo an gintahoban han madakmol nga kasisidman han kagab-ihon, usa nga ladawan han kasisidman han kamatayon nga naghuhulat ha ira. Hira ngahaw an mabug-at nga pinas-an han ira kalugaringon nga maburubug-at pa kay han kasisidman.