Kinaadman ni Solomon 8 - Samarenyo Meaning-Based Bible (1984)（MBBSAM）

1Naabot an iya dako nga gahom ngadto han tagsa nga bahin han kalibutan, ngan iya iginpapahimutang an tagsa nga butang ngada hin mapulsanon nga kahusayan.

Naghigugma hi Solomon han Kinaadman

2An Kinaadman amo an akon hinigugma. Ginhigugma ko hiya han batan-on pa ako ngan karuyag ko nga mahimo hiya nga akon asawa. Ginhigugma ko hiya tungod han iya kamahusay.

3Ginpapasidunggan niya an iya hamili nga pagkatawo pinaagi hin pag-ukoy kaupod han Dyos, nga Ginoo han ngatanan, nga nahigugma ha iya.

4Maaram hiya han mga misteryo han Dyos ngan nabulig hiya hin pagbuot han iya pagbubuhaton.

5Maupay ba an pagkamay-ada mga bahandi dinhe hini nga kinabuhi? Waray na iba nga makakahimo ha imo nga mas riko kay han Kinaadman.

6May-ada ba pulos an pakaangkon hin hibaro? Waray na mauruupay kay han Kinaadman nga amo an naghatag hin hulagway han tagsa nga butang nga aanhi.

7Nahigugma ka ba han katadongan? Mga bunga han buhat han Kinaadman an ngatanan nga mag-upay nga ginawian: an katadongan ngan an kaisog, an pagpugong han kalugaringon ngan an pagsabot. Waray na mahahatag ha aton han kinabuhi nga mas mahal pa kay hini.

8Karuyag mo ba nga magkamay-ada ka hin damo nga kaagi ha kinabuhi? Maaram an kinaadman han mga pagturon-an han mga nahinabo ngan daan hiya maaram han kabubwason. Maaram hiya maghubad han mga pulong han tawo ngan magtuhay hin mga kasurok-an. Maaram hiya han mga milagro nga pagbubuhaton han Dyos, ngan han mga palakat han nahinanabo dinhe ha kalibutan.

9Sanglit nakahunahuna na ako hin pagdara han Kinaadman ha balay basi magkalungon kami, kay maaram ako nga maghahatag hiya ha akon hin maupay nga mga sagdon ngan makakadasig hiya ha akon ha mga panahon hin kakurian ngan kabidoan.

10Naghunahuna ako, “Tungod ha iya pagpapasidunggan ako bisan diin pagkatirok an mga tawo. Pagtatahoron ako han mga kalagsan, bisan kon batan-on pa ako.

11Mahibabaro hira nga nagpapakita an akon mga nahuhunahunaan hin hilarom nga pagsabot, ngan maruruyag ha akon adton mga makapot hin gahom.

12Kon diri ako magyakan, mahulat hira tubtob han akon pakighimangraw ha ira, ngan kon naghihimangraw ako, mamamati hira. Bisan kon naghihimangraw ako hin maiha, tim-os gihapon an ira pamati.

13Tungod han kinaadman, makakaangkon ako hin kinabuhi nga waray kamatayon; diri ako hingangalimtan ha kadayonan adton mga masunod ha akon.

14Magkakapot ako hin gahom ha mga nasod ngan katawhan.

15An kinahahadlokan nga mga magtalumpigoson nga mga tawo kukulbaon kon hinanabihan an akon ngaran. Mababantogan ako sugad nga usa nga maupay nga hadi ngan usa nga maisog nga sondalo.

16Kon umuli ako hin pakiglungon han Kinaadman, makakaagi ako hin kahimyangan, kay waray pagkalaris o pagkamasakit an pag-ukoy kausa ha iya, kundi an tim-os la nga kalipayan.”

17Sanglit ginpainoino ko ini: an pakaasawa han Kinaadman amo an pagkabuhi ha kadayonan,

18an paghigugma ha iya amo an hingpit nga kalipay, an pagtuman han iya buruhaton amo an pagkamanggaranon hin waray sukol, an pakig-upod-upod ha iya amo an pakaangkon hin maupay nga paghukom; an pakighimangraw ha iya amo an pagkamay-ada dungog. Niyan ginlarang ko na hin pag-angkon han kinaadman sugad hin akon asawa.

19-20May-ada ako maupay nga katindog han akon pagkatawo bisan han bata pa ako. Nagin palaran ako hin pakakarawat hin usa nga maupay nga kinabuhi o tinagan ako hin maupay nga lawas nga akon nabubuhian tungod kay daan na ako maupay.

21Kundi nakasabot ako nga diri gud ako makakakarawat han Kinaadman labot kon ighatag hiya ha akon han Dyos—ngan ha paghibaro nga an Dyos la an makakahatag ha iya ngadi ha akon, amo ini ngahaw an usa nga tigaman hin pagsabot. Sanglit nag-ampo ako, ngan nanginyupo ako han Ginoo ha bug-os ko nga kasingkasing: