1Katapos hini nagyakan hi Job ngan ginmaldisyon niya an adlaw nga iya natawhan.
Job2-3O Dyos, maldisyona gad an adlaw nga akon natawhan;
ngan an gab-i nga iginpanamkon ha akon!
4Himoa nga kasisidman ito nga adlaw, O Dyos.
Ayaw na gud hinumdomi ito nga adlaw;
ayaw na gud ini paglamragi.
5Himoa ini nga adlaw hin kadulman ngan madakmol nga kasisidman;
tahobi ini hin mga dampog ngan talinguhaa nga maanaw an adlaw.
6Paraa ito nga gab-i tikang han tuig,
ngan ayaw na gud ini ipaupod han ihap;
7himoa ini nga mabidoon ngan waray kalipay nga gab-i.
8Sugoa an mga diwatahan hin pagmaldisyon hito nga adlaw,
hira nga mag-aram magmanso han Lebiatan.
9Pugngi hin pagsirang an makabugwas;
ayaw itugot nga may-ada kaagahon kahuman han gab-i.
10Maldisyona ito nga gab-i nga amo an nagpakatawo ha akon,
ngan naghatag ha akon hin kakurian ngan kabidoan.
11Gabay pa namatay ako ha sakob han tiyan han akon iroy,
o namatay ha takna han akon katawo.
12Kay ano nga ginsaluro ako han akon iroy ha iya mga tuhod?
Kay ano nga ginpasuso ako niya?
13Kon namatay ako hadto, napahuway na unta ako yana,
14nakaturog sugad han kahadian ngan mga punoan
nga nag-ayad hin kadaan nga mga palasyo.
15Niyan nakaturog na unta ako sugad hin mga prinsipe
nga nagpuno han ira mga balay hin bulawan ug salapi,
16o nakaturog sugad hin bata nga natawo nga daan patay.
17Didto ha lubnganan nahunong na an karat-an han magraot nga mga tawo,
ngan ha kataposan napahuway na an binubutlaw nga mga magburudlay.
18Nagpapahimulos hin kalinaw bisan an mga priso,
nga diri na nabati han mga goliat ngan mag-isog nga mga sugo.
19Aadto an ngatanan, an bantogan ngan an diri kinikilala,
ngan ha kataposan talwas na an mga oripon.
20Kay ano nga ginbubuhi an mga tawo basi la mag-antos?
Kay ano nga tinatagan pa hin kapawa an mga tawo nga aada ha kabidoan?
21Naghuhulat hira han kamatayon, kundi diri man ini naabot;
Gabay nira angkonon in usa nga lubnganan kay hin bisan ano nga manggad.
22Diri hira malipayon tubtob nga patay ngan iginlubong na hira;
23ginlilirong han Dyos an ira kabubwason ngan ginpipiit hira ha bisan diin nga dapit.
24Pagkaon unta an akon tuyo, nagmamabidoon lugod ako,
ngan diri gud ako nakakahunong hin pagharoy.
25Nahinanabo an ngatanan nga akon nahahadlokan ngan nalilisangan.
26Waray ko kalinaw, waray pagpahuway,
ngan diri gud natatapos an akon mga kakurian.
Who We AreWhat We EelieveWhat We Do
2025 by iamachristian.org,Inc All rights reserved.
