Kinaadman ni Solomon 11 - Samarenyo Meaning-Based Bible (1984)（MBBSAM）

Gindara han Kinaadman an mga Israelita hin Paglatas ha Kamingawan

1An Kinaadman naghatag hin kauswagan han mga tawo han Israel pinaagi hin usa nga baraan nga manaragna.

2Naglatas hira hin usa nga kamingawan nga waray pa okyi hin tawo ngan nagkampo hira didto hin mga dapit nga waray pa hingadtoi hin tawo.

3Inmasdang hira han ira mga kaaway ngan ira gindaog ini hira.

4Han pag-uhawa han imo mga tawo, nagtawag hira ha imo, O Ginoo, ngan gintagan mo hira hin tubig nga nag-awas tikang hin bantiles nga bato.

5An mga karat-an nga nagsirot han mga Ehiptohanon amo ini an nagtalwas han imo mga tawo han naghihimakuri hira.

Ginkastigo an mga Ehiptohanon

6-8Tungod kay nagpagawas hin sugo an mga kaaway nga kinahanglan pamatayon an mga puya nga kabataan han imo mga tawo, imo gin-ukay an mga burabod han ira mga salog ngan nagbaraho ini tungod han dugo.

Didto ha kamingawan tinugotan mo nga pag-uhawon an imo mga tawo, basi makatilaw hira han imo pagkastigo han ira mga kaaway. Ngan, ha panahon nga waray nira pagpaabota, gintagan mo hira hin damo nga tubig.

9Han pagsarihi ha ira, bisan kon usa ini nga makuri nga pagpaantos, nahibaro hira kon gin-unan-o mo an pagpakurii han magraot nga mga tawo kon ginhuhukman mo hira tungod hin kasina.

10Imo ginsarihan an imo mga tawo sugad han pagsari hin usa nga amay han iya mga anak, hin pagpahimatngon ha ira. Kundi ginhukman mo an ira mga kaaway sugad hin usa nga maisog nga hadi ngan ginsirotan mo hira.

11Nag-antos hira, bisan hain hira—ma hirani hira o ma hirayo han imo mga tawo.

12Gindugangan an ira kabidoan; nagharoy hira han panumdom nira han mga nanhinabo hadto.

13Han paghibaro nira nga an sirot ha ira nagin kaupayan han imo mga tawo, nakasabot hira nga imo ini pagbuhat, O Ginoo.

14Dinmiri an mga Ehiptohanon hin panginlabot hadto nga tawo nga hadto ha iya pagkapuya, ilinaboy ngan ginbayaan, kundi sugad han nahinabo, nagdayaw lugod hira ha iya. An ira kauhaw diri sugad han kanan mga magtadong.

15An ira pagkamaraot amo an naglipat ha ira ngadto hin linurong nga mga panhunahuna, sanglit nagsingba hira hin mga halas ngan iba nga makangingirhat nga kamanampan, ngan mga binuhat nga waray gud gahom hin pakasabot. Tungod hini, ginkastigo mo hira pinaagi hin makalilisang nga kadamo hin sugad nga kamanampan,

16ngan gintutdoan mo hira nga an kastigo tungod hin sala magdadara han sugad ngahaw nga dagway han sala.

17An imo kamakagarahum, O Ginoo, amo an nagtuha han kalibutan tikang ha kawarayan. Masayonay unta an imo pagkastigo hadto nga mga tawo pinaagi hin pagpasulong ha ira hin mga magbangis nga uso o magpintas nga mga liyon.

18Nakakagtuha ka unta hin bag-o ngan magpakaharadlok nga kamanampan, nga naginhawa hin kalayo o nagngungurob ngan napusngak hin mga dampog nga aso, o nagpapalatos hin makaharadlok nga mga tiprak hin kalayo tikang han ira mga mata.

19Nakakaghimo ka unta hin kamanampan nga sugad hini, nga diri masulong hin mga tawo hin pagpatay ha ira, kundi magpapatay ha ira tungod hin kahadlok pinaagi la hin pagbuslong ha ira.

20Kundi diri ini kinahanglan. Nakakaglanat ka unta ha ira pinaagi han imo katadongan o patayon mo hira, pinaagi la han gigugutiayi nga pagpaabat han imo gahom. Kundi ginpili mo lugod an pagsukol, pag-ihap, ngan pagtimbang han tagsa nga butang nga imo ginbubuhat.

Makagarahum nga Maloloy-on an Dyos

21Makakapakita ka han imo dako nga gahom ha bisan ano nga panahon nga karuyag mo, ngan waray makakasupil hini.

22Ha imo pagkita usa la ka lugas nga baras an bug-os nga kalibutan, nga haros diri ngani nakakapahilig hin usa nga timbangan, usa la ka turo hin tun-og dida han tuna ha kaagahon.

23Igo an imo kagamhanan hin pagbuhat hin bisan ano nga butang, kundi maloloy-on ka ngadto han tagsa ka tawo; diri mo binabali an amon mga sala ngan tinatagan mo kami hin panahon hin pagbasol.

24Hinihigugma mo an tagsa nga butang nga aanhi ha tuna; diri mo gintatamay in bisan ano nga imo ginhimo. Kon waray ka maruyag hini, una ha ngatanan diri mo unta ini ginhihimo.

25Uunanhon hin pag-iha hin bisan ano nga butang, kon diri nimo karuyag? Uunanhon hin pagpadayon hini, kon waray mo ini pagtuhaa?

26Tinugotan mo ini ngatanan hin pagpabilin O Ginoo, kay imo man ini, ngan hinigugma mo an tagsa nga buhi nga butang.