Kinaadman ni Solomon 15 - Samarenyo Meaning-Based Bible (1984)（MBBSAM）

Nahatag hin Dayon nga Kinabuhi an Matuod nga Dyos

1Kundi maloloy-on ngan matuod ngan mapailobon ka nga amon Dyos. Naghahadi ka nga maloloy-on han bug-os nga kalibutan.

2Bisan kon makasala kami, nakilala pa kami han imo gahom ngan imo la gihapon kami. Kundi tungod nga maaram man kami nga sakop mo kami, diri kami magpipinakasala.

3An pagkilala ha imo amo an hingpit nga pagkamatadong. An pagkilala han imo gahom amo an tinikangan han dayon nga kinabuhi.

4Waray kita malipat pinaagi hin bisan ano nga maraot nga bunga hin hibaro han tawo, hin bisan ano nga waray pulos nga butang nga ginpintaran hin usa nga batid nga pintor, o pinaagi hin bisan ano nga diyosdiyos nga ginhugawan hin magkalainlain nga mga tina.

5An pakakita hin sugad nga mga butang nakakaaghat han mga balatian hin lurong nga mga tawo ngan nakakapaungara ha ira hin usa nga patay ngan waray kinabuhi nga ladawan.

6Bisan hin-o nga maghimo hin sugad nga butang o mag-ungara hini o magsingba hini, nahigugma hiya hin usa nga butang nga maraot, ngan maaangkon niya an angay ha iya kon ibinubutang an iya paglaom dida hini nga mga butang.

Katuyawan an Pagsingba hin Tuna nga mga Diyosdiyos

7Ginbubuhat hin usa nga parahimo hin daba an kalot nga lapok ngan gin-uupay niya an hitsura han tagsa nga butang para han aton paggamit. May-ada mga butang nga iya ginhihimo nga nahingangadto hin maupay nga paggamit, an iba liwat ngadto hin maraot nga paggamit, kundi ginhihimo ini ngatanan tikang han amo ngahaw nga kahot nga tuna, ngan ginpoporma ha amo ngahaw nga paagi. An parahimo hin daba ngahaw amo an nagbubuot kon ano nga mga butang an iya gagamiton para han iya mga tuyo.

8Usa hiya nga tawo la nga ha diri pa la maiha ginhimo tikang hin tuna, ngan katapos hin halipotay nga panahon, kon ig-uli na niya an kalag nga ginpahuram ha iya, mabalik hiya ngadto han amo ngahaw nga tuna. Usa la hiya nga tawo, kundi iya ginkakaragan an iya pagbudlay hin pagporma hin usa nga waray pulos nga diyos tikang han amo ngahaw nga kahot nga tuna nga iya ginagamit hin paghimo hin mga daba.

9Halipotay la an iya kinabuhi, ngan diri maiha mapatay hiya, kundi diri ini hiya naghuhunahuna hini nga butang. Karuyag niya makigpaisan-isan hadton mga nagbubuhat nga nagamit hin bulawan, salapi, ug bronse, ngan maghimo hin mga butang sugad ha ira. Dako an iya pagparayaw ha mga butang nga iya ginhihimo, kundi diri mga tinuod ini.

10Hinimo an iya kasingkasing hin mga agbon. Barubarato pa kay hin tapotapo an iya paglaom. An iya kinabuhi diri ngani pareho an palit han iya tuna nga ginagamit,

11kay waray gud hiya makakilala han Dyos nga naghimo ha iya, nga naghuyop ngada ha iya hin buhi nga kalag ngan hin usa nga buhi nga espiritu.

12Naghuhunahuna hiya nga usa la nga mulay an kinabuhi hin tawo, usa nga taboan diin makakaganansya hiya. Nagmamatuod hiya nga kinahanglan hiya magbiling hin salapi ha bisan ano nga paagi, bisan kon maraot.

13Ini nga tawo nga naghihimo hin mga diyosdiyos ngan magtapok nga mga daba tikang han amo ngahaw nga tuna nga kahot, maaruaram kay han bisan hin-o nga hiya nagpipinakasala.

Ginkastigo an mga Ehiptohanon

14Kundi an gilulurongi han ngatanan nga mga tawo, nga nagpakita hin kulang nga pagsabot kay han mga minasus-an amo an mga kaaway nga nagraogdaog han imo mga tawo, O Ginoo.

15Naghunahuna hira nga kadiyosan an ngatanan nira nga pagano nga mga ladawan, bisan kon an mga hinimo nga diyosdiyos diri nakita pinaagi han ira mga mata, diri naginhawa pinaagi han ira mga irong, diri nabati pinaagi han ira mga durunggan, diri naabat pinaagi han ira mga tudlo, ngan diri nalakat pinaagi han ira mga tiil.

16Ginhimo hira hin tawo nga hinuram la an iya espiritu. Waray gud tawo nga makakahimo hin usa nga diyosdiyos nga tupong hin usa nga tawo.

17Ha madali o maiha mapatay an tagsa nga tawo, kundi daan patay tikang ha tinikangan an bisan ano nga hinimo han iya magraot nga mga kamot. Mauruupay hiya ngahaw kay han iya ginsisingba. Buhi hiya, kundi diri buhi an iya ginsisingba, ngan diri gud ini mabubuhi.

18Nagsisingba in sugad nga mga tawo ha labi kamakapupungot nga kamanampan, lakip adton kulang hin pagsabot.

19Bisan kon mga mananap hira, diri hira magtahom pagkit-on nga angay karuyagon. Ginlaktawan hira han Dyos ngahaw han pagbendisyoni niya han iba nga iya mga binuhat.