1-2Kag-unoman na kagduha an edad ni Tobit han kabuta niya, kundi han paghibalik han iya pagkita, nag-ukoy pa hiya hin hilawig nga kinabuhi. Nagmahinatagon na liwat hiya ngadto han mga kablas, ngan nagpadayon hiya hin pagdayaw han Dyos ngan pagsangyaw han iya pagkaharangdon. Namatay hi Tobit nga murayaw ha panuigon nga 112, ngan ginbuhat ha iya in usa nga dungganon nga paglubong didto ha Ninibe.
3Kundi san-o gud hiya mamatay, ginpasugoan niya hi Tobias nga iya anak ngan ginsiring hiya,
4“Anak ko, dad-a an imo anak ngan pakadto dayon kamo ha Media. Nagtutuo ako nga matutuman na gud an paghukom han Dyos nga iginpahibaro ni Nahum nga iya manaragna kontra han Ninibe. Mahinanabo an ngatanan nga iginsumat han Israel han mga manaragna han Dyos hiunong han Ninibe ug Asiria. Matutuman gud ini ngatanan nga iginsiring han Dyos. Diri an Dyos magpapakyas han iya mga iginsaad. Diri makulba kaupay an iyo pag-ukoy didto ha Media kay didto ha Asiria o Babilonia.
“Magsasarang an aton igkasi mga Judiyo nga nag-uokoy didto ha Israel, ngan hahalinon hira tikang hito nga maupay nga tuna ngadto ha pagkabihag. Mahihimo nga usa nga karag nga tuna an bug-os nga Israel; mahihimo nga binayaan nga mga syudad an Samaria ug Jerusalem. Pag-uugtangon an Templo han Dyos ngan waray gud hisasawkan bisan usa nga bato; ruba gud an ngatanan.
5Kundi kalolooyan na liwat han Dyos an iya mga tawo, ngan igbabalik hira ngadto ha tuna han Israel. Pagtitindogon na liwat nira an Templo, kundi diri ini masusugad hin kaanyag han syahan nga Templo, tubtob han pag-abot han igo nga panahon. Kundi kon umabot na ito nga panahon, mabalik an ngatanan nga mga tawo han Israel tikang ha pagkabihag, ngan babag-ohon nira hin pagtindog an syudad han Jerusalem ha ngatanan nga kaanyag sugad han una nga kaanyag hini. Babag-ohon nira hin pagtindog an Templo han Dyos didto ha Jerusalem, sumala han igintagna han mga manaragna han Israel.
6“Niyan mabalik ngadto sa Dyos an ngatanan nga mga nasod han kalibutan. Pagsisingbahon hiya nira sugad nga amo la an matuod nga Dyos ngan babayaan nira an mga diyosdiyos nga nagdara ha ira ngadto hin diri matuod nga pagsingba.
7Pagdadayawon han mga nasod ha kalibutan an waray kataposan nga Dyos pinaagi hin pagtuman han iya mga sugo.
“Hito nga panahon pagtatalwason han Dyos an ngatanan nga mga tawo han Israel nga nagmatinumanon ha iya. Pagdadad-on hira ngatanan ngadto ha Jerusalem, ngan ihahatag ha ira an tuna ni Abraham, ngan didto mag-uokoy hira nga himyang ha kadayonan. Maglilipay an ngatanan nga nahigugma han Dyos ha ira kasingkasing ug kalag, kundi paparaon ha bawbaw han tuna an ngatanan nga mga magpakasasala ngan magraot nga mga tawo.
8“Yana, mga anak ko, pagsunda niyo an akon mga tugon. Pagsingbaha an Dyos ha bug-os niyo nga kasingkasing ngan pagbuhata an nakakalipay ha iya.
9Pagtutdoi an iyo mga anak hin pagbuhat han matadong. Pagtutdoi hira nga kinahanglan dayuday manumdom hira hin pagdayaw han Dyos ha bug-os nira nga kasingkasing.
10“Tobias, anak ko, bayai na an Ninibe. Ayaw na pagpabilin dinhe. Kon mahilubong mo na an imo nanay sapit ha akon, lakat kamo dayon; ayaw na kamo pagpaabot han gab-i ha sakob han pag-ultan han syudad. Maraot ini nga syudad ngan puno hin kalaw-ayan; waray pagkaawod an mga tawo dinhe. Hinumdomi an ginbuhat kan Ahikar ni Nadab nga iya umangkon. May tuyo niya hin pagpatay kan Ahikar ngan napirit hiya hin pagtago didto hin usa nga lubnganan. Binmalik hi Ahikar dida han mapawa na an adlaw, kundi ginpalusad han Dyos hi Nadab ngadto han waray kataposan nga kasisidman tungod han iya ginbuhat. Nakalikay hi Ahikar han bitik hin pagpatay ha iya nga ginbutang ni Nadab para ha iya, kay mahinatagon man hi Ahikar ngadto han mga kablas. Kundi hi Nadab nag-unay la lugod han iya bitik ngan namatay hiya.
11Sanglit yana, mga anak ko, iyo hinkit-an kon ano an nahinabo hadton mga nagpapakita han ira pagpaid para han iba, ngan kon ano nga kamatayon an naghuhulat hadton mga nagdudumara han iba hin diri matadong. Kundi yana maluya na gud ako.”
Niyan ibinutang nira hi Tobit dida han iya higdaan. Namatay hiya ngan ginbuhat ha iya in usa nga dungganan nga paglubong.
12Waray pag-iha namatay an asawa ni Tobit ngan iginlubong hiya sapit han iya bana. Niyan binmalhin hira Tobias ngan han iya asawa ngadto ha Ecbatana didto ha Media, diin nag-ukoy hira upod kan Raguel nga ugangan nga lalake ni Tobias.
13Ginmangnoan ni Tobias hira Raguel ug Edna ha panahon han ira pagkalagas ngan ginpakita nira an dako nga katalahoran. Ha kataposan, han kamatay nira, iya iginlubong hira didto ha Ecbatana. Ginsunod ni Tobias an mga hiagi ni Raguel sugad han iya pagsunod han mga hiagi ni Tobit nga iya amay.
14Namatay hi Tobias ha gurang nga edad nga 117,
15ngan inmabot pa an iya kinabuhi tubtob ngada han paghibaro niya han pagkabungkag han Ninibe ngan pagkita han pagbihaga han mga tawo ni Hadi Cyaxares han Media. Gindayaw ni Tobias an Dyos tungod han paagi han iya pagkastigo han mga tawo han Ninibe ug Asiria. Samtang buhi pa hiya nagpasalamat hiya tungod han kanan Dyos ginbuhat han Ninibe.
Who We AreWhat We EelieveWhat We Do
2025 by iamachristian.org,Inc All rights reserved.
