1Dida han tuig 172 gintirok ni Hadi Demetrio Segundo an iya kasondalohan ngan kinmadto hiya ha Media hin pagpangita hin dugang pa nga bulig para han iya pakig-away kontra kan Trifo.
2Han paghibaro ni Hadi Arsace Sixto han Persia ug Media nga sinmulod han iya katunaan hi Demetrio, iya ginsugo in usa han iya mga kapitan, upod in pira ka hugpo hin kasondalohan, hin pagdakop kan Demetrio ngan diri nira patayon.
3Ira ginsulong ngan ginpirde an kasondalohan ni Demetrio, ginbihag hiya, ngan gindara ngadto kan Hadi Arsace nga nagpriso ha iya.
4Malinaw an tuna han Judea samtang buhi pa hi Simon. Ha bug-os niya nga pagkahadi, ginggamit niya an iya gahom hin pagbuhat hin maupay para han iya mga tawo, ngan dayuday nalipay hira ha iya nga ira pangulo.
5Nadugangan an iya kabantogan han pagbihaga niya han duruongan han Jopa ngan han pagbuksi niya han agian ngadto han Griego nga kapupud-an.
6Diri la nga ginpahiluag niya an katunaan han iya nasod ngan iya ginpangulohan an bug-os nga nasod,
7kundi iya ginbawi in damo nga mga priso hin araway ngan naagaw niya an Gezer, Betsur, ngan an kota didto ha Jerusalem. Ginlinisan niya an kota, ngan waray gud may kinmontra ha iya.
8Nag-uma an mga Judiyo, han ira tuna ha panahon hin kalinaw, naghatag hin mga abot an tuna ngan nanmunga an kakahoyan.
9Nagpakita an batan-on nga kalalaken-an han mag-anyag nira nga mga uniporme hin pagkasondalo, samtang an mga lagas nga kalalaken-an nanlingkod didto han mga plasa han syudad ngan nagkarukayakan hiunong han dagko nga mga butang nga nahinabo.
10Gintagan ni Simon hin pagkaon an mga syudad ngan hin mga hinganiban hin pagpanalipod. Nagsarang an iya kabantogan ha ngatanan nga dapit.
11Gindad-an niya hin kalinaw an nasod, ngan waray katubtoban an pagrayhak han Israel.
12Nag-ukoy ha kalinaw an tagsatagsa dida han kalugaringon niya nga mga urubasan ngan kakahoyan hin igos, ngan waray naghadlok ha ira.
13Dida hito nga mga adlaw napirde na an ngatanan nga kaaway nga kahadian, ngan waray na gud nahisalin dida han tuna hin pakig-away kontra han mga Judiyo.
14Naghatag hi Simon hin bulig para han ngatanan nga mga kablas dida han iya mga tawo, nga ha larang han Balaod ni Moises, pinamatay niya an ngatanan nga magraot ngan magtinalapason nga mga tawo.
15Ginsangkap niya an Templo hin mag-anyag nga mga garamiton ngan gindugangan hin damo nga mga kasangkapan para hin pagsingba.
16Han pag-abot ha Roma ug Esparta han sumat nga patay na hi Jonatan, nagdara ini hin dako nga kabidoan.
17Kundi han paghibaro han mga taga-Esparta nga sinmaliwan hi Simon han iya bugto nga Labaw nga Padi ngan hiya na an hadi han nasod ngan han mga sakop nga bungto,
18ira iginuhit dida hin bronse nga mga susuratan in usa nga pagbag-o han ginsabotan hin pakigsangkay nga ira ginhimo hadto kanda Judas ug Jonatan nga iya kabugtoan, ngan ginpadara ha iya an mga sinurat.
19Ginbasa ini didto han katirok ha Jerusalem.
20An nasunod amo an kopya han sinurat nga ginpadara han mga taga-Esparta:
“Tikang han mga tawo han Esparta ngan han ira mga pangulo, ngadto kan Simon an Labaw nga Padi, ngadto han mga pangulo ug kapadian han mga Judiyo ngan ngadto han ngatanan namon nga mga Judiyo nga kabugtoan, damo nga mga pangumosta.
21Nagsumat ha amon an iyo ginpadara ngadi ha amon mga tawo nga mga tinahod ug bantogan kamo. Nakahatag ha amon hin dako nga kalipay an ira pagduaw,
22ngan nahisurat dida han amon mga sinurat para han mga tawo in usa nga sumat hiunong han ira pagduaw, sumala han masunod: ‘Inmatubang ha amon hin pagbag-o han ira ginsabotan hin pakigsangkay hira Numenio nga anak ni Antioco ug Antipater nga anak ni Jason, nga mga pinasidunggan nga mga tumindog han mga Judiyo.
23Nalipay an katirok han mga tawo hin pagkarawat hini nga mga tawo upod an ngatanan nga mga pagpasidungog ngan pagbutang hin usa nga kopya han ira sumat didto han hirimosan han mga sinurat basi magkamay-ada hini nga sinurat an mga tawo han Esparta. Ginhimo in usa nga kopya hini nga dokumento para kan Simon, an Labaw nga Padi.’”
24Waray pag-iha ginpadara ni Simon hi Numenio ngadto ha Roma upod an regalo nga usa nga dako nga bulawan nga taming nga natimbang hin 500 ka kilo, hin pagparig-on han ginsabotan hin pagbulig han mga Judiyo ug mga Romano.
25Han paghibaro han mga tawo han Israel hiunong hini ngatanan, nagpakiana hira ha ira ngahaw, “Uunanhon naton hin pagpahayag han aton mga pagpasalamat kan Simon ngan han iya mga anak nga kalalaken-an?
26Hiya, an iya kabugtoan, ngan an bug-os nga panimalay han iya amay amo an mga lantawan hin kusog para han aton nasod. Ginpirde nira an aton mga kaaway ngan gintalwas an aton nasod.”
Sanglit iginsurat ini nira dida hin bronse nga susuratan ngan iginpahimutang ini dida hin mga harigi didto ha Bukid Sion.
27An nahisurat amo ini:
“Dida han ika-18 nga adlaw han bulan han Elul han tuig 172, ha aton pa, dida han ikatulo ka tuig ni Simon, an Labaw nga Padi,
28dida hin usa nga dako nga katirok hin kapadian, mga tawo, mga opisyal, ngan nasodnon nga mga pangulo, iginpahibaro ha amon an masunod nga mga kamatuoran:
29Agsob mahinabo nga kon may-ada mga araway han nasod, andam hin pagtubyan han ira kinabuhi hira Simon nga anak ni Matatias nga usa nga padi han panimalay ni Joyarib, ngan han iya kabugtoan, ha pagpanalipod han aton nasod, han aton Templo, ngan han aton Balaod kontra han mga kaaway.
30Gin-urosa ni Jonatan an aton mga tawo ngan nahimo hiya nga Labaw nga Padi san-o hiya mamatay.
31An mga kaaway han mga Judiyo naghunahuna hin pagsulong han tuna ngan paghugaw han Templo.
32Niyan hi Simon amo an nagpangulo ngan nakig-away para han iya nasod. Naggamit hiya hin dako nga kantidad tikang han kalugaringon niya nga kwarta hin pagpalit hin mga hinganiban ngan hin pagsuhol han kasondalohan han iya nasod.
33Ginparig-on niya an mga bungto han Judea, ngan labi na an Betsur dida han pag-ultan, diin hadto anay ginhimosan han mga kaaway han ira mga hinganiban. Iya ginbutangan didto hin usa ka tropa hin mga sondalo.
34Iya ginparig-on an duruongan han Jopa ngan an syudad han Gezer didto han pag-ultan han Asdod nga hadto anay nahingada ha mga kamot han kaaway nga mga sondalo. Iya ginpaukyan didto hin mga Judiyo ngan iya tinagan an mga bungto han ngatanan nga ginkinahanglan han mga tawo.
35Han pakakita han mga tawo han pag-ugop ni Simon han nasod, ngan han iya tinguha hin pagpasidungog han nasod, ira ginhimo hiya nga ira pangulo ngan Labaw nga Padi. Ginbuhat ini nira tungod han ngatanan nga iya nahimo pinaagi han iya pagkamaunongon ngan tungod kay iya ihinatag ha ira an katadongan ngan gintinguha gud niya ha ngatanan nga paagi hin pagpasidungog han iya nasod.
36“Ha ubos han iya pagpangulo ginpaiwas an mga Hentil tikang han tuna. Ginpaiwas an kaaway nga mga sondalo tikang han amihan nga dapit han Templo, diin gintindog nira an kota, diin usahay an mga sondalo nagawas hin paghugaw han baraan nga Templo.
37Ginpaukyan ni Simon hin mga Judiyo an kota, ginparig-on ini para han kahimyangan han nasod ngan han syudad han Jerusalem, ngan ginpahitaas an mga pader han syudad.
38Tungod hini, gintudlok hiya ni Hadi Demetrio nga Labaw nga Padi,
39gintagan hiya han ngaran nga “Sangkay han Hadi,” ngan ihinatag ha iya in dako nga pagpasidungog.
40Ginbuhat ini ni Demetrio kay nakabati hiya nga gintawag han mga Romano an mga Judiyo nga ira mga sangkay, mga kaurosa, ngan kabugtoan ngan ira ginkarawat an mga ginsugo ni Simon upod in bug-os nga mga pagpasidungog.
41“Sanglit nalipay an mga Judiyo ngan han ira kapadian nga hira Simon ngan han iya mga tulin nahimo nga ira mga pangulo ngan Labaw nga Kapadian, tubtob hin pagpakita hin usa nga matuod nga manaragna.
42Hi Simon amo an magdudumara han ira nasod, an tinaporan han Templo, ngan magigin ira kapitan han kasondalohan. Amo hiya an mahihimo nga tinaporan han kanan kasondalohan mga kasangkapan, mga madig-on nga salipdanan, ngan mga buruhaton han bungto.
43Kinahanglan magsugot ha iya an mga tawo ha ngatanan nga mga butang. Paghihimoon ha iya ngaran an ngatanan nga mga ginkasabotan han pamunoan. May-ada hiya katungod hin pagsul-ot han hadianon nga hilawig nga mga panapton nga may-ada bulawan nga rayandayan ha sugbong.
44“Waray bisan hin-o nga padi o tawo nga magkakamay-ada katungod hin paghukom nga waray la hinungdan han bisan hain hini nga mga ginkatarangdoan, hin pagliwat o pagliwan han bisan ano han mga sugo ni Simon, hin pagtawag hin bisan ano nga katirok dinhe han nasod nga diri niya tugot, o pagsul-ot hin hadianon nga higlawig nga mga panapton nga may-ada bulawan nga rayandayan ha sugbong.
45Pagsisirotan an bisan hin-o nga diri magtuman o magpasibaya la hini nga mga turumanon.
46“Iginpakita han mga tawo an ira urosa nga pag-uyon nga ihatag kan Simon an katungod hin pagbuhat subay hini nga mga turumanon.
47Inmuyon ngan tinmangdo hi Simon nga himoon hiya nga gihahataasi nga pangulo: Labaw nga Padi, kapitan han mga kasondalohan, ngan gobernador han mga Judiyo ngan han kapadian.”
48Ginkasarabotan nga iguhit ini nga ginpahayag dida hin bronse nga mga susuratan ngan igpahimutang dida hin dayag nga dapit ha sakob han bungsaran han Templo
49ngan kinahanglan igbutang in mga kopya hini didto han hirimosan han Templo, diin waray makakaulang kanda Simon ngan han iya mga anak nga kalalaken-an hin pagbasa hini.
Who We AreWhat We EelieveWhat We Do
2025 by iamachristian.org,Inc All rights reserved.
