Sirac 1 - Samarenyo Meaning-Based Bible (1984)（MBBSAM）

Gindayaw an Kinaadman

1Tikang han Ginoo an ngatanan nga kanaadman,

ngnan aada ha iya ha kadayonan an kinaadman.

2Hin-o an makakaihap han mga turo han uran

o han baras ha baybayon?

Hin-o an makakaihap han mga adlaw han panahon nga waray tinikangan ngan waray kaposan?

3Ano an kahitaas han kalangitan?

Ano an kahiluag han tuna?

Ano an kahilarom han kalalawdan?

Hin-o an makakatugkad han Kinaadman?

May-ada ba makakabaton hini nga mga pakiana?

4Gintuha an kainaadman san-o han iba nga mga butang;

nakada na ha kadayonan an sarabotan.

6Iginpakita na ba hin tawo kon din tikang an Kinaadman?

May-ada ba nakakasabot han iya talagsaon nga paagi?

8Uusa la an may kinaadman ngan kinahanglan tumindog kita ha pagtahod ha atubangan han iya trono.

9An Ginoo ngahaw na nagtuha han Kinaadman.

Kinmita hiya han Kinaadman ngan kinilala niya an iya kapulsanan;

sanglit ginpuno niya hin Kinaadman an ngatanan nga iya ginhimo.

10Ginbahinan niya hin Kinaadman anngatanan nga mga tawo,

kundi iginbubo niya ini ngadto han mga nahigugma ha iya.

11Kon magtahod ka han Ginoo, ihahatag ha imo an kadungganan ug dungog.

Pagpupudongpudong an ka hin kalipay ug pagrayhak.

12An pagpasidungong han Ginoo usa nga kinasingkasing nga kalipay;

mahatag ini ha imo hin hilawig ngan malipyon nga kinabuhi,

13ngan magmamainuswagon ka ha kataposan.

Bebendiyonan ka han Dyos ha adlaw hanimo kamatay.

14An pagtahod han Ginoo amo an tinikangan ha Kinaadman.

Iginhatag an Kinaadman ngadto han mga matinumanon

didto pa ha tiyan han ira mga nanay.

15Nag-ukoy hiya kauod ha aton tikang pa hadton naglabay nga mga panahon,

ngna matapod ha iya an mga tiarabot nga katulinan.

16An pagkahadlok han Ginoo amo an labi ka hingpit nga Kinaadman

ginlilipay kita niya hin hingpit pinaagi han iya mga hatag

17ngan ginpupuno iya an aton mg abalay ngan mga kamalig

han ngatanan nga gin-uungara han aton mga kasingkasing.

18An pagkahadlok kan Ginoo amo an bukad han Kinaadman

nga nabuklad hin kalinaw ngan maupya nga panlawas.

19Nagpapadara hiya han hibaro ngan sarabotan sugad han uran,

ngan gindudugangan hin dungog adton mga nakarawat ha iya.

20An pagkahadlok han Ginoo amo an gamot han Kinaadman;

dayuday buhi an iya mga sanga.An Pagpugong ha Kalugaringon

22Waray baribad para han kasina nga waray katadongan; makakapapukan ini ha imo.

23Hulat ngan pagmapailobon ngan ha orhe malilipay ka nga ginbuhat mo ini.

24Paghilom tubtob han pag-abot han panahon hin pagyakan, ngan maaangkon mo in bantog hin maupay nga buot.

An Kinaadman ngan an Pagtahod sa Dyos

25May-ada bahandi an Kinaadman hin mga puplonganon nga makina-admananon, kundi gintatamay han mga makasasala an mga butang nga dyosnon.

26Kon karuag mo nga magmaaram ka, tumana an mg asugo han Ginoo, ngan ihahatag ha imo an waray sukol nga Kinaadman.

27An pagkahadlok han Ginoo amo an Kinaadman ngan usa nga pag-aram. Nakakalipay ha iya an kamaunongon ngan kamapainubsanon.

28Pagmatinumanon hin pagbuhat han imo tuluohan; kon magsingba ka han Ginoo buhata ini hin kinasingkasing.

29Paghirot han imo igyayakan, ngan ayaw buhat an pagkamalabyaw.

30Ayaw hinpagkamapahitas-on; bangin ka mahulog ngan maalohan. Igpapadayag han Ginoo an imo mg atingo ngan papaubson ka niya ha atubangan han ngatanan didto han katig-oban, kay awaray ka kumadto hin pagsingba han Ginoo, lugod an imo kasingkasing puno hin pagkamalabyaw.