Kinaadman ni Solomon 19 - Samarenyo Meaning-Based Bible (1984)（MBBSAM）

May-ada Pag-unay nga Katuyawan an mga Ehiptohanon

1Kundi an diri mga natoo han Dyos ginpapag-antos han imo waray kalooy nga kasina tubtob ha kataposan. Ha waray pa nira pagbuhata ini daan ka maaram han ira pagbubuhaton.

2Daan ka maaram nga bisan kon ira gintugotan an imo mga tawo hin pagkalakat ngan binmaya hin kadagmitan, maliliwat an ira mga hunahuna ngan lalanaton hira.

3-4Samtang masulob-on pa an mga Ehiptohanon didto han mga lubnganan tungod han ira mga patay, nahingalimot hira kay ano nga nahinabo ini ngatanan, ngan nagkasarabot hira hin usa nga linurong nga paghukom nga an mga tawo nga ira ginpalakat, mga kalagiw nga mga tawo. Sanglit ira ginlanat. Nadara hira hini nga panhunahuna sugad nga bahin han kastigo nga angay ha ira, basi pag-antoson nira an salin pa nga kasakitan nga angay nira karawaton.

5Iginkasugat hira hin malain nga kamatayon, samtang nagpadayon an imo mga tawo dida han ira milagroso nga paglakaton.

Ginmandoan ngan Ginpanalipdan han Dyos an Iya mga Tawo

6An kinaiya han bug-os nga kalibutan naliwat pinaagi han imo sugo basi diri madaot an imo mga tawo.

7Hinkit-an nira an dampog ha igbaw han ira kampo ngan an mamara nga tuna didto han dapit nga katubigan anay. Nahimo nga banwaon nga kapatagan an salad han mabalod nga Dagat Pula nga nabuhag ngan nagmasayon para ha ira an ira pagtabok.

8An ngatanan mo nga mga tawo ha ubos han imo pagpanalipod, kinmita hini nga milagro ngan tinmabok hira.

9Nanadlagan hira sugad hin mga kabayo nga ginpagawas ngadto han panibsiban; nagkalukso hira sugad hin nati nga mga karnero ngan nagdayaw ha imo, O Ginoo, tungod han pagtalwasa ha ira.

10Nahinumdom hira han ira kinabuhi hadto han mga oripon pa hira. Asay lugod ginmamat han tuna an mga hamok, diri lugod mga baka, asay lugod ginpagawas ha salog in damo hin duro nga mga pakla, diri lugod mga isda.

11-12Han paglabay han panahon, han nagkikinahanglan na hira hin mauruupay nga pagkaon, nagkagawas in katamsihan nga tuhil tikang ha dagat nga amo an nakatambal han ira kagutom. An tuhil amo in tamsi nga waray pa gud nira hikit-i.

Ginkastigo an mga Ehiptohanon

13Kundi an makusog nga dalugdog nagpahimatngon han tiarabot nga sirot han mga magpakasasala. Nag-antos hira hin igo nga kastigo tungod han ira duro nga pagkamaraot. Waray iba nga nasod nga napungot hin duro hin mga lumalangyaw.

14Nahibantog nga may-ada mga tawo nga dinmiri hin pagkarawat hin mga lumalangyaw nga napakadto ha ira, kundi ini nga mga tawo nag-oripon han ira mga bisita ngan hadton mga nalooy ha ira.

15Pagsisirotan an kada nasod nga diri makarawat hin mga lumalangyaw,

16kundi ini nga mga tawo nga ha una nga panahon kinmarawat hin mga lumalangyaw pinaagi hin maglipayon nga mga pagsaurog ngan nagdumara ha ira nga waray pinalabi; ha kataposan, ira ginpaantos hira hin mapait nga kamutangan.

17Nabuta ini nga mga tawo sugad han mga kalalaken-an han Sodoma nga kinmadto han porta hadto nga matadong nga tawo nga hi Lot. Nahingadto hira hin kasisidman, nga an tagsa ha ira nangangapkap hin pagbiling han iya aagian.

May-ada an Dyos Milagroso nga Gahom

18An kada dulos han usa nga arpa may-ada kalugaringon nga tono, kundi an kada tunog mahihimo igtampo han mga iba hin paghimo hin magkalainlain nga sonata nga nag-aarangay. Ug amo ini hadto nga mga adlaw, diin in bag-o nga mga binuhat nahimo tungod hin bag-o nga mga pagkatarampo. Tan-awa kon ano an nahinabo!

19May-ada kamanampan ha tuna nga linmugsong ngadto han tubig, ngan may-ada naglalangoy nga mga binuhat nga sinmagka ha tuna.

20Naglaga in kalayo bisan ha tubig ngan diri ini nasusubo han tubig.

21Kundi waray gud an mga laga makasunog han lawas han mga binuhat nga may-ada pagkamatay nga naglakatlakat dida han kalayo ngan waray makatunaw han langitnon nga pagkaon nga natutunaw dayon ini sugad hin yelo.

22O Ginoo, ginhimo mo nga gamhanan an imo mga tawo—mahimayaon hira ha ngatanan nga kahimtang. Waray mo pagpasibay-i hira. Tinagan mo hira hin tambulig ha ngatanan nga dapit ug ha ngatanan nga panahon.