Mga Salmo 66 - Samarenyo Meaning-Based Bible (1984)（MBBSAM）

Nagkanta hin Pagdayaw ngan Pagpasalamat

1Ngadto ha Dyos goliat hin malipayon,

tanan nga katawhan, hiya pagdayawon!

2Pasidungog han iya ngaran kantahon,

halari hin pagdayaw nga malipayon!

3Siring ngadto ha Dyos, “Pagkaurosahon!

hadton mga butang nga im' buruhaton!

imo gahom hin pagkadako hin duro,

mga kaaway mo ha im' nanyuyukbo.

4Nagsisingba ha imo an katawhan,

an tagsa nga tawo hinin kalibutan;

pagdayaw ha im' ira ginkakantahan,

hin kanta hin pagdayaw an imo ngaran.”

5Kadi kitaa kanan Dyos binuhatan,

dagkong mga buhat dida han katawhan.

6Ginhimo niya an dagat nga kamad-an,

ginlaktan pagtabok han at' kaapoyan.

Didto hito kami gudman nanagrakya,

tungod hadton mga ginbuhat gud niya;

7Naghahadi hiya gud in kadayonan

pinaagi'n iya kusog nga gamhanan.

Ngan ginbabantayan niya'n kanasoran,

mga masupilon diri tutugotan.

8Pagdayaw han Dyos, kamo nasod ngatanan,

himoa'n iyo pagdayaw nga hidunggan.

9Iya gintugot nga kita mabuhi pa,

ngan waray tumugot nga mapukan kita.

10O Dyos, kami imo nga ginsarihan na,

daw salapi ha kalayo pag-uraya.

11Nga mabitik kami imo tinugotan,

hin magbug-at nga darad-on ginpapas-an;

12nga han am' kaaway pagtamak-tamakan,

kalayo ngan baha amon ginlatasan.

Kundi ito yana kami im' gindara,

ngat' hin dapit nga waray kataragman na.

13Ha im' balay mga halad pagtubora;

sugad nga halad han akon iginsumpa.

14Ighatag ko ha im' an ak' ginsumpaan,

han nakadto ak' han mga kakurian.

15Maghahalad ako hin kakarnerohan,

nga pagtutuboron dida han halaran.

Maghahalad ak' ha im' hin kabakahan,

ngan hin halad pa nga mga kakandingan;

tikang hini maalimwag kaasohan,

masaka ha langit ngat' ha kahitas-an.

16Kamo ngatanan nga ha Dyos matahoron,

kadi ha akon ngan iyo pamation;

kay akon igsasaysay an susumaton,

han ngatanan nga ginbuhat n'ya ha akon.

17Nagsangpit ak' hin pakibulig ha iya,

ngan ak' hiya gindayaw hin mga kanta.

18Kon ginpabay-an ko an ak' mga sala,

diri gud ak' pinamamatian niya.

19Kundi ha tinuod han Dyos ak' hindunggan,

an ak' pag-ampo iya pinamatian.

20Tungod hini an Dyos ak' gindadayaw man,

tungod kay an iya gugma di' naundang.