Sirac 4 - Samarenyo Meaning-Based Bible (1984)（MBBSAM）

1Ayaw pag-ulanga hin pamiling han ira panginabuhi an mga pobre o ayaw pagpinahulata hira dida han ira pagkinahanglan.

2Ayaw gud pagtuksoha hin pagdumot o kasina an tawo nga ginugutom.

3Ayaw pagdugangi an mga kakurian han tawo nga nagtuturaw na. Kon nagkikinahanglan man hiya, ayaw na hiya pagpinahulata.

4-5Ayaw igsikway in usa nga makililimos nga nagkukuri. Ayaw pagtalikdi in usa nga makalolooy o ayaw pagtagi hin higayon nga hiya magtunglo ha imo.

6Kon pagtunglohon ka niya ha butnga han iya paghimakuri, pamamatian han iya Magburuhat an iya pag-ampo.

7Talinguhaa nga kilal-on ka han bungto. Tahora an mga tawo nga mga pagburot-an.

8Pamatii an igsisiring han mga pobre ngan batona hira nga matinahuron.

9Panalipdi an mga tawo hadton karuyag magdaot ha ira, ngan magmadig-on ka ha imo paghukom.

10Pagpaka-amay han mga ilo, ngan tagi an mga balo han pagbulig nga diri na mahahatag han ira patay nga mga bana. Niyan masusugad ka hin anak han Gihahataasi, ngan hihigugmaon ka niya labaw pa han paghigugma ha imo ni imo nanay.

Magturutdo an Kinaadman

11Ginmamangnoan han Kinaadman adton mga nagbibiling ha iya; gin-aataman niya basi hira magmagamhanan.

12An paghigugma ha iya amo an paghigugma han kinabuhi; tim-os gud nga kalipay an temprano nga pagmata hin pagbiling ha iya.

13Pagpapasidunggan an nakarawat hin Kinaadman. Pagpapakaupayon hiya han Ginoo bisan diin hiya kadto.

14An mga surugoon han Usa nga Baraan amo an mga surugoon han Kinaadman, ngan hinihigugma han Ginoo an ngatanan nga nahigugma han Kinaadman.

15Adton mga nagsusugot ha iya; maghuhukom hin matadong adton mga namamati ha iya may-ada matuod nga kahimyangan.

16Ikada an imo paglaom han Kinaadman, ngan magtatag-iya ka ha iya ngan magpapabilin hiya dida han imo mga tulin.

17Ha pagtikang, pag-uunhan ka niya ha magkuri nga mga aragian. Paghahadlokon ka niya ngan maghuhunahuna ka nga diri ka makakagpadayon. An disiplina nga iya ginkikinahanglan mahatag hin dako nga kasakitan, ngan pagsasarihan ka niya han iya mga kinahanglanon tubtob nga makasarig na hiya ha imo.

18Niyan makada hiya ha imo hin waray paglangan, ipapadayag ha imo an iya mga tinago ngan paglilipayon ka niya.

19Kundi kon tumalikod ka ha iya, pababay-an ka niya ngadto han imo kabungkagan.

Ayaw Pagtapod han Imo Kalugaringon

20Pahimulosi an mga higayon kundi bantayi an karat-an. Ayaw pagtamaya an imo kalugaringon.

21Angay hin pagpasidungog ngan pagtahod an kamapinaubsanon, kundi makakapasala an usa nga ubos nga paghukom han imo kalugaringon.

22Ayaw pagtugot nga pagpakaraoton ka han iba; ayaw pagdaota an imo kalugaringon pinaagi hin pagpasibaya han imo mga katungod.

23Ayaw pag-alang hin pagyakan kon ginkikinahanglan ini han higayon. Ayaw pagtagoa an imo kinaadman.

24Mahibabaroan la an imo kinaadman ngan an imo gin-adman pinaagi han imo mga pulong.

25Kundi ayaw pagkontra han kamatuoran, ngan hinumdomi nga diri ka maaram han ngatanan.

26Ayaw kaawod hin pagkompisal han imo mga sala; kawang la an pagpugong han pag-awas hin usa nga salog.

27Ayaw itugot nga pagmandoan ka hin usa nga lurong o hin pagdapig han mga gamhanan.

28Unongi an kamatuoran tubtob ha kamatayon; makikiaway an Ginoo tungod ha imo.

29Ayaw pagdagmit hin pagyakan o ayaw kahubya ngan ayaw pagpasibaya han imo buruhaton.

30Ayaw pagpakaliyon ha iyo panimalay o ayaw pagtahap han imo mga surugoon.

31Ayaw igmasayon an pagduhol han imo palad hin pagkarawat kon kukumkumon mo manla ini ha takna hin paghatag.