Mga Darahonon 10 - Samarenyo Meaning-Based Bible (1984)（MBBSAM）

Mga Darahonon ni Solomon

1Amo ini an mga darahonon ni Solomon:

Nakakalipay han iya amay in usa nga anak nga makinaadmananon; nakakabido han iya nanay in anak nga lurong.

2Diri makakaupay ha imo in manggad nga imo naangkon pinaagi hin limbong, kundi makakatalwas han imo kinabuhi an pagkatangkod.

3Diri an Ginoo matugot nga panggutomon an mag-upay nga mga tawo, ngan diri hiya matugot nga an mga magraot makaangkon han ira mga ungara.

4Makakapobre ha imo an pagkahubya, kundi makakapariko ha imo an pagkamaduruto.

5An tawo nga may buot nag-aandam hin paghipos han mga abot kon maabot na an igo nga panahon; kundi makaarawod an pagkinaturog kon panahon na hin kat-ani.

6An tawo nga maupay makarawat hin mga kaupayan. An mga pulong hin maraogdaog nga tawo nakakatahob han maisog nga iya kinaiya.

7Hinunumdoman nga usa nga bendisyon an mag-upay nga mga tawo, kundi an mga magraot hingangalimtan dayon.

8Nakarawat hin maupay nga sagdon an tawo nga may buot. Maghihikaraot an mga tawo nga nagyayakan hin linurong.

9Waray kataragman an tangkod nga mga tawo, kundi hidadakpan an mga maglimbong.

10Nakakasamok an tawo nga nagtatago han kamatuoran, kundi an nagsususon hin dayag nakakahatag hin kalinaw.

11Burabod hin kinabuhi an mga pulong hin maupay nga tawo, kundi an mga pulong hin maraogdaog nga tawo nakakatahob han maisog nga iya kinaiya.

12An pagdumot nag-aaghat hin kasamokan, kundi an gugma nagpapasaylo han ngatanan nga mga sayop.

13Suloran an mga pulong hin tawo nga maaram, kundi an lurong nga mga tawo angay pagkastigohon.

14Nagtitirok an mga makinaadmananon han ngatanan nga hibaro nga ira maaangkon, kundi diri hirayo an kasamok kon nagyayakan in mga lurong.

15An manggad nananalipod han mga riko; an kakablasan nagbubungkag han mga pobre.

16Kinabuhi an balos hin pagbuhat hin maupay, kundi an sala nag-aaghat hin pagbuhat pa hin darudamo nga sala.

17Mabubuhi an mga tawo nga namamati kon hira ginwawaydongan, kundi aada ha kataragman adton diri natangdo nga sayop hira.

18Buwaon hiya nga tawo, an nagtatago han iya pagdumot; lurong an bisan hin-o nga naglilibak.

19Kon magpatakas ka hin pagyinakan, madagmit ka makasala. Kon makinaadmananon ka, mahilom ka la.

20Sugad hin puraw nga salapi an mga pulong hin maupay nga tawo; waray pulos an mga panhunahuna hin maraot nga tawo.

21Nakakabulig hin damo nga mga tawo an mga pulong hin tawo nga maupay, kundi makakamatay ha imo ngahaw an kalurongan.

22Nakakapariko ha imo an bendisyon han Ginoo, an imo kamakugi diri nakakadugang han imo karikohan.

23Lurong an nalilipay hin pagbuhat hin kasaypanan. Ikinalilipay an kinaadman han mga tawo nga mag-aram.

24Naaangkon han magtadong an ira ungara, kundi maaangkon han magraot an ira gud kinahahadlokan.

25Iginpapalid an mga magraot kon naabot an mga bagyo, kundi dayuday murayaw an kamutangan han tangkod nga mga tawo.

26Ayaw papagtrabahoa ha imo an hubya nga tawo; mangilo hiya sugad hin suoy ha imo mga ngipon o mahapdos hiya sugad hin aso ha imo mga mata.

27Tahora an Ginoo ngan mahilawig an imo kinabuhi. Napatay dayon an mga magraot ha diri pa nira panahon.

28An mga paglaom han mga mag-upay nagdadalan ngadto ha kalipayan, kundi an mga magraot waray gud nira sadang paglauman.

29Pinananalipdan han Ginoo an tangkod nga mga tawo, kundi iya ginpupuo adton mga nagbubuhat hin kasaypanan.

30An magtadong nga mga tawo dayuday nag-uokoy ha kalinaw, kundi an mga magraot diri mabubuhi ha tuna.

31An mga magtadong nagyayakan hin kinaadman, kundi diri tutugotan an dila nga magyakan hin maraot.

32Maaram an mga magtadong han angay pagyaknon, kundi dayuday nakakabido an mga pulong han maraogdaog nga mga tawo.