2 Macabeo 12 - Samarenyo Meaning-Based Bible (1984)（MBBSAM）

Pinanmatay an mga Judiyo Didto ha Jopa

1Han kahuman na hin pagtangdoay an mga Judiyo ug mga taga-Siria bahin han ginsabotan hin kalinaw, binmalik hi Lisias ngadto han hadi ngan binmalik an mga Judiyo ngadto han ira mga uma.

2Kundi may-ada mga gobernador, hira Timoteo ug Apolonio nga anak ni Genneo, sugad man hira Jeronimo ug Demofon, nga nagsinamok ha ira; ngan pati hi Nicanor nga kapitan han mga sinoholan nga kasondalohan nga taga-Cipre.

3Hini nga panahon ginbuhat han mga tawo han Jopa in usa nga pagraogdaog han mga Judiyo han ira syudad. Nagpasangil hira hin pakisangkay han mga Judiyo ngan gindapit hira ngan an ira mga panimalay hin pagsakay hin mga barko upod ha ira.

4Tungod kay ginkaurosaan man ini han ngatanan nga mga tawo han bungto, waray gud an mga Judiyo magtahap hin bisan ano ngan ira kinarawat an ira pagdapit ha maupay nga kaburot-on. Kundi han nakadto na hira ha lawod han dagat, ginlumos han mga tawo han Jopa an ngatanan. Mga 200 adto hira ngatanan.

5Han paghibaro gud la ni Judas hiunong hini nga diri angay pagbuhaton hin tawo, nga ginbuhat han iya igkasi mga Judiyo, iya ginsumatan an iya mga tawo.

6Katapos nira mag-ampo sa Dyos nga matadong nga maghurukom, ira ginsulong an mga parapamatay. Ha masirom nga kagab-ihon ira ginsunog an duruongan, ngan ginsunog an ngatanan nga mga sakayan, ngan pinamatay an ngatanan nga ira hin-agian nga tinmago didto.

7Trangkado an mga ganghaan han syudad, sanglit inmisol hi Judas; kundi nagtalinguha hiya hin pagbalik ha lain nga panahon ngan pagpuo han ngatanan nga nag-uokoy didto.

8Hinbatian ni Judas nga nakahunahuna an mga tawo han Jamnia hin pamatay liwat han mga Judiyo ha ira syudad.

9Sanglit iya ginsulong an Jamnia ha gab-i, ngan ginsunog an duruongan hini ngan an mga sakayan. Hinkit-an an laga bisan didto ha Jerusalem nga mga 70 ka kilometros an kahirayo.

Nagmadinaogon hi Judas didto han Katunaan han Galaad(1 Mac. 5:9-54)

10Han mga duha na la ka kilometros tikang ha Jamnia hira Judas ngan han iya mga tawo hin pagkig-away kan Timoteo, ginsulong hira hin kapin 5,000 nga mga Arabe, nga binuligan hin 500 nga dikabayo nga mga sondalo.

11Makuri ini nga pakig-away, kundi upod han tambulig han Dyos, ira ginpirde ini nga mga tawo han mga tribo han kamingawan, nga kahuman, naghangyo hin pakigsangkay han mga Judiyo, ngan nagsaad hin paghatag ha ira hin mga hayop ngan pagbulig ha ira ha iba liwat nga mga paagi.

12Naghunahuna hi Judas nga an ira pagkasangkay bangin magmapulsanon ha damo nga mga paagi, sanglit inmuyon hiya hin pakigsabot hin kalinaw ha ira: katapos binmalik an mga Arabe ngadto han ira mga tulda.

13Ginsulong liwat ni Judas an pinarig-on hin duro nga pinaderan nga syudad han Caspin. Magkalainlain nga mga Hentil an mga tawo nga nag-ukoy didto

14nga tinmapod han kamarig-on han ira mga pader ngan han kadamo han ira pagkaon nga diri mauubos sulod hin maiha nga pagsulong. Sanglit ira gintinawaan hira Judas ngan han iya mga tawo, ngan nagginoliat hin mga pagyubit ha ira ngan mga pagpakaraot kontra han ira Dyos.

15Kundi nag-ampo an mga Judiyo ngadto han Labi Kamakagarahum nga Ginoo han bug-os nga kalibutan, nga nagpanas han mga pader han Jerico ha panahon ni Josue nga waray gamiti hin mga igburungkag ngan mga hinganiban hin pagsulong. Katapos ira ginhimo in makusog nga pagsulong han pader,

16ngan tungod nga kaburot-on ini han Ginoo, ira naagaw an syudad. Pinamatay han mga Judiyo in damo hin duro nga mga tawo, sugadsugad in usa nga hirani nga lanaw nga tunga hin kilometro an kahiluag naglapwas hin pagawas hin dugo.

Ginpirde ni Judas an Kasondalohan ni Timoteo(1 Mac. 5:37-44)

17Tikang han syudad han Caspin nagbaktas hira Judas ngan han iya mga tawo hin 200 ka kilometros, tubtob han pag-abot nira didto ha Caraca, usa nga bungto han mga Judiyo, nga hirani han syudad han Tob.

18Kundi waray nira hiagii didto hi Timoteo, kay binmaya na hiya hini nga dapit. Waray nahimo ni Timoteo didto labot hin pagbilin hin usa nga marig-on nga kampo hin kasondalohan didto hin usa nga dapit.

19Ginsulong an kampo hin duha nga mga heneral ni Judas, hira Dositeo ug Sosipatro, ngan pinamatay an ngatanan nga 10,000 ka tawo nga iginbilin didto.

20Niyan ginbahin ni Judas an iya kasondalohan ngadto hin pira ka batalyon, nga iginbutang hira Dositeo ug Sosipatro nga kapitan hin tag-usa nga batalyon, ngan nagdagmit hiya hin paglanat kan Timoteo nga may-ada kasondalohan nga 120,000 nga baktas nga mga sondalo nga 2,500 nga mga dikabayo.

21Han paghibaro ni Timoteo nga ginlalanat hiya ni Judas, iya ginpauna an kababayen-an ngan an kabataan dara an mga pinutos ngadto han syudad han Carnaim nga makuri gud ini masulong o masulod, tungod kay haligotay an mga agian nga tipasagka ngadto hini nga syudad.

22Kundi han paghikit-i han syahan nga batalyon ni Judas, nagkalisanglisang an kaaway nga kasondalohan pinaagi hin usa nga panan-awon nga iginpadara han Dyos nga nakita han ngatanan nga mga butang. Tungod han ira duro nga kahadlok, nagpatlaag hira ngan damo ha ira an nagkasasamad pinaagi han mga espada han kalugaringon nira nga mga tawo.

23Sanglit nagdagmit hin paglanat hira Judas ngan han iya mga tawo, ngan pinamatay in diri maubos hin 30,000 han kaaway.

24Nadakop hi Timoteo ngahaw han kasondalohan nira Dositeo ug Sosipatro. Kundi hi Timoteo duro hin kalisto ngan nakahimo hiya hin pagpatuod ha ira nga damo han ira kauropdan in ginpriso niya ngan pamamatayon hira kon may-ada mahinabo ha iya nga maraot.

25Ha kataposan, katapos niya magsaad nga iya pauulion nga talwas an ira mga kauropdan, ira ginbuhian hiya.

Nagmadinaogon pa hi Judas(1 Mac. 5:45-54)

26Sunod ginsulong ni Judas an syudad han Carnaim ngan an templo didto han diyosa Atargatis, ngan pinanmatay in 25,000 ka tawo

27ngan ginbungkag an syudad ngan an templo. Niyan ginsulong niya an syudad han Efon hin mga libot hin mga pader diin pag-ukoy hi Lisias ngan an mga tawo han magkalainlain nga mga nasod. May-ada magkusog nga mga batan-on nga ginpahimutang ha atubangan han mga pader ngan nakig-away, samtang ginhimos ha sakob han syudad in damo nga mga kasangkapan ngan mga hinganiban hin kasondalohan.

28Kundi nag-ampo an mga Judiyo han Ginoo hin pakibulig ngan hiya an nagdugmok han gahom han iya mga kaaway. Sanglit ira nakuha an syudad ngan pinamatay in mga 25,000 ka tawo.

29Tikang didto nagdagmit hira ngadto han syudad han Betsan nga mga 180 ka kilometros ha amihan han Jerusalem.

30Nagsumat kan Judas an mga Judiyo didto nga an mga tawo han syudad maupay magtagad ha ira, labi na ha panahon hin kakurian.

31Sanglit ginpasalamatan nira Judas ngan han iya mga tawo an mga tawo didto ngan gin-aghat hira nga magpakita han amo ngahaw nga maupay nga kaburot-on ngadto han mga Judiyo ha tiarabot nga mga panahon. Niyan nagkalakat hira ngadto ha Jerusalem, ngan inmabot hira ha diri na maiha an Pyesta han Pag-ani.

Ginpirde ni Judas hi Gorgias

32Katapos han Pentecostes (amo ini an tawag ha Griego han Pyesta han Pag-ani), nagdagmit hin paggawas hira Judas ngan han iya mga tawo hin pakig-away kan Gorgias nga gobernador han Edumea,

33nga tinmapo ha ira dara in 3,000 nga baktas nga kasondalohan ngan 400 nga mga dikabayo.

34Didto han pag-awayan, may-ada mga Judiyo nga nagkamatay.

35Niyan may-ada usa nga Judiyo nga taga syudad han Tob, usa nga makarit mangabayo, nga ginngaranan kan Dositeo. Ginrabot niya hi Gorgias ha iya kurugpos ngan pinangusgan niya hin pagdanas ha iya, kay karuyag niya nga mabihag nga buhi ini nga waray pulos nga tawo. Kundi ha gilayon nagdagmit ngadto kan Dositeo in usa han mga dikabayo nga Traciahanon ngan gintigbas an iya butkon ngan nautod; sanglit nakakalagiw hi Gorgias ngadto han syudad han Marisa.

36Ngada yana maiha na an pakig-away han mga Judiyo ha ubos han pagmando ni Esdras ngan kapoy na gud hira. Sanglit nag-ampo hi Judas nga magpakita an Ginoo nga naugop hiya ha ira ngan hiya an nagmamando han ira kasondalohan.

37Niyan, samtang nagkakanta hi Judas hin usa nga imno ha kalugaringon niya nga yinaknan sugad nga usa nga goliat hin pakig-away, pinakalasan hin pagsulonga han mga Judiyo hira Gorgias ngan han iya mga tawo ngan nanadlagan hira.

Nag-ampo para han mga Tawo nga Pinanmatay ha Pag-awayan

38Katapos han araway gindara ni Judas an iya mga tawo ngadto han bungto han Adulam. Adlaw adto san-o han Adlaw nga Iparahuway, sanglit naglinis hira han ira kalugaringon sumala han Judiyo nga pamatasan ngan onina gintuman nira an baraan nga adlaw.

39Han pagkabuwas kinahanglan panguhaon gud nira an mga lawas han mga tawo nga pinamatay ha pag-awayan ngan iglubong nira didto han mga lubnganan han tagsa nira nga panimalay.

40Kundi dida han tagsa nga patay ira hin-agian ha sakob han ira mga bado in gudtiay nga mga ladawan han kadiyosan nga ginsingba didto ha Jamnia, nga igindiri han Balaod nga hin pagpadara han mga Judiyo. Sanglit nahibaro an ngatanan kay ano nga pinanmatay hira.

41Sanglit ira gindayaw an mga paagi han Ginoo nga matadong nga maghurukom, nga nagpapadayag han mga tinago,

42ngan ira ginhangyo an Ginoo nga paraon unta ini nga sala. Sanglit hi Judas, an gamhanan nga tawo, nag-aghat han mga tawo nga maglikay hira han sala, kay ira na gud hinkit-an an nahinabo hadton mga tawo nga nagpakasala.

43Nangaro liwat hiya hin amot ha ngatanan niya nga mga tawo, nga inmabot hin mga tulo ka kilo nga salapi, ngan iginpadara ini ngadto ha Jerusalem basi gamiton hin paghalad tungod hin sala. Ginbuhat ni Judas ini nga mahinungdanon nga butang kay natoo hiya han pagkabanhaw han mga minatay.

44Kon waray hiya pagtoo nga babanhawon an mga minatay, tinuyaw la ngan waray gamit an pag-ampo para ha ira.

45Ha iya marig-on ngan dyosnon nga pagtoo nga an ngatanan nga matinumanon nga mga tawo han Dyos makarawat hin makaaramdok nga balos, naghatag hi Judas para hin usa nga halad tungod hin sala basi adton mga namatay na matalwas ha ira mga sala.