Sirac 30 - Samarenyo Meaning-Based Bible (1984)（MBBSAM）

An Panimangno han Kabataan

1An amay nga nahigugma han iya anak masukot niya latigohon basi ha sano nga adlaw ikaparayaw niya.

2Kon in anak nga lalake disiplinado, may-ada niya gamit ngan ipaparayaw hiya ni iya tatay ngadto han iya kasangkayan.

3An tawo nga maupay magdumara han iya anak nga lalake diri la kay ipinaparayaw niya ha iya kasangkayan kundi ikinaaawa hiya han iya mga kaaway.

4-5Samtang nga buhi an amay, an pakakita niya han iya anak nakakalipay han amay ngan kon mamatay hiya, diri hiya magbabasol. Diri tinuod nga patay hiya kay an iya anak sugad man ha iya.

6Ibinilin niya in usa nga mabulos han iya mga kaaway ngan pagbalos hadton iya mga kasangkayan.

7Kundi an tawo nga magpalabi hin pagpaura han iya anak mapipirit hin pagbutok han iya nga samad. An iya kasingkasing diri na maputok ha ikinapagbati niya hin goliat.

8An diri maanad nga kabayo matig-a tutdoan ngan amo man an anak nga waray disiplina.

9Kon ugayon mo hin labi nga pagpaura an imo anak ngan makiuyag ka ha iya, makakahatag hiya ha imo hin kagul-anan ug kasakitan.

10Kon umungay ka hin pagtawa upod ha iya, may adlaw nga magtatangis ka tungod ha iya, diin magliligot ka han imo mga ngipon tungod hin pagbasol.

11Ayaw la hiya pasagdi han iya karuyag nga bata pa hiya ngan ayaw pabay-i an iya maraot nga buhat.

12Lambaha nga bata pa hiya ngan patahora hiya han imo gahom hin pagkakag-anak. Kon diri mo ini buhaton, magmamatig-a an iya ulo ngan diri hiya masugot ngan asay la niya mahahatag ha imo an kabidoan.

13Sanglit disiplinaha an imo anak ngan tagi hiya hin buhat nga iya tutumanon, kay kon diri, bangin magpakaalo hiya ha imo.

An Maupay nga Panlawas

14Mauruupay pa an ka kablas kundi makusog ngan maupay an lawas kay hin ka riko kundi masakiton.

15An waray sakit ug maupay nga lawas ngan an malipayon nga kinaiya maromahal pa kay hin bulawan ug alahas.

16Waray iba nga makakahimo ha imo nga mas riko ug makakahatag ha imo hin dako nga kalipay kay hini nga duha nga butang.

17Mauruupay pa an kamatay, an dayon nga pagkaturog, kay hin aada buhi ka kundi dayuday ka la masinakitnon.

18Waray la gamit an mga magrasa nga pagkaon kon uraura ka na hin ka masakiton nga waray mo na gana hin pagkaon; gabay la ito ihalad ngadto hin usa nga diyosdiyos.

19Waray katadongan an paghalad hin pagkaon ngadto hin usa nga diyosdiyos kay diri man ini nakaon ngan nabaho. Amo gihapon an usa ka tawo nga gintagan han Ginoo hin sakit.

20Nakita hiya han iya pagkaon ngan humuyam sugad hin kinaponan nga lalake nga nakikighangkopay hin babaye.

An Kalipay ug an Kasakit

21Ayaw pagtuyo hin pagsakit han imo kalugaringon pinaagi hin pagturaw ha kinabuhi.

22An kalipay nakakapahilawig han kinabuhi ngan nakakahatag hin hinungdan ug katakos han aton kinabuhi.

23Pagpahimulos han imo kalugaringon ngan paglipay; ayaw la pagkinabaraka ha ngatanan nga panahon. An pagkinabaraka waray pa makahatag hin kaupayan ngan damo an naghingalooy nga mga tawo.

24Malalagas ka dayon. An pangabugho ug an kasina makakapahilipot han imo kinabuhi.

25An malipayon nga tawo nga may-ada maupay nga paglantaw han mga butang may-ada gana hin pagkaon ngan pagpapahimulos hin pagkaon.