2 Cronicas 34 - Samarenyo Meaning-Based Bible (1984)（MBBSAM）

Naghadi han Juda hi Josias(2 Hadi 22:1-2)

1Walo an panuigon ni Josias han kahimo niya nga hadi han Juda ngan naghadi hiya hin 31 ka tuig ha Jerusalem.

2Ginbuhat niya an nakakalipay han Ginoo; ginsunod niya an susbaranan ni Hadi David nga iya ginikanan ngan ginsugot gud niya an ngatanan nga mga balaod han Dyos.

Gibungkag ni Josias an Pagano nga Pagsingba

3Dida han ikawalo ka tuig nga pagkahadi ni Josias, samtang bata pa hiya, nagtikang hiya hin pagsingba han Dyos ni Hadi David nga iya ginikanan. Paglabay hin upat ka tuig, gintikangan niya hin pagruba an pagano nga mga dapit hin pagsingba, an mga ladawan han diyosa nga hi Asera, ngan an ngatanan nga iba nga mga diyosdiyos.

4Ginsugo niya an iya mga tawo hin pagbungkag han mga altar nga ginsingbahan kan Baal ngan han mga altar han insyenso nga hirani hini. Gindugmok nira an mga ladawan ni Asera ngan an ngatanan nga iba nga mga diyosdiyos ngan ginpasarang an tapotapo hini ha mga lubnganan han mga tawo nga nagsingba hini nga kadiyosan.

5Ginsunog niya an mga tul-an han pagano nga kapadian ha mga altar nga ginsingbahan nira. Pinaagi hini ginlinisan niya an Juda ug Jerusalem sumala han seremonyas ngan nagin baraan ini nga mga dapit.

6Amo gihapon an iya ginbuhat ha mga syudad ngan ha mga nagkaguguba nga dapit han Manases, Efraim, ug Simeon, ngan tubtob ha Neftali ha amihanan.

7Ha bug-os nga katunaan han Amihanan nga Ginhadian ginpukan niya an mga altar ngan an mga ladawan ni Asera, gindugmok an mga diyosdiyos, ngan gintipiktipik an ngatanan nga mga altar hin insyenso. Katapos inmoli hiya ha Jerusalem.

Hin-agian an Basahan han Balaod(2 Hadi 22:3-20)

8Dida han ika-18 ka tuig nga iya pagkahadi, katapos niya paglinisi an tuna ngan an Templo pinaagi hin pag-utod han pagano nga pagsingba, ginsugo ni Hadi Josias in tulo ka tawo hin pag-ayad han Templo han Ginoo nga Dyos: hira Safan nga anak ni Asia, Amasias nga gobernador han Jerusalem, ug Joa nga anak ni Joaeas, an labaw nga opisyal.

9Iginhatag kan Hilkias, an Labaw nga Padi, an kwarta nga gintirok ha Templo han mga gwardya nga Levita. (Gintirok ini tikang han mga tawo han Efraim ug Manases ngan han iba ha Amihanan nga Ginhadian, ngan tikang han mga tawo han Juda, Benjamin, ug Jerusalem.)

10Niyan iginhatag ini nga kwarta ngadto han tulo ka tawo nga tinaporan han mga pag-ayad han Templo, ngan iginhatag ini nira ha

11mga panday ngan ha mga magtirindog para hin pagpalit han mga bato ngan han mga kahoy nga ginamit hin pag-ayad han mga balay nga ginpabay-an nga madumog han kahadian han Juda.

12Tangkod gud an mga tawo nga nagtrabaho. Gindumara hira hin upat nga mga Levita: hira Jahat ug Abdias han banay ni Merari, ngan hira Zacarias ug Mesulam han banay ni Cohat. (Batid nga mga musikero an ngatanan nga mga Levita.)

13An iba nga mga Levita amo an tinaporan hin paghakot hin mga materyal ngan pagdumara han mga paragtrabaho ha magkalainlain nga mga buruhaton, ngan an iba nagtipig hin mga sinurat o mga gwardya han mga ganghaan.

14Samtang iginggagawas an kwarta ha kwarto nga hirimosan, hin-agian ni Hilkias an basahan han Balaod han Ginoo, an Balaod nga iginhatag han Dyos kan Moises.

15Nagsiring hiya kan Safan, “Hin-agian ko dinhe ha Templo an basahan han Balaod.” Iginhatag niya kan Safan an basahan,

16ngan gindara ini ni Safan ngadto han hadi. Nagsumat hiya, “Ginbuhat namon an ngatanan nga imo ginsugo.

17Ginkuha namon an kwarta nga ginhimos ha Templo ngan iginhatag ini ngadto han mga paragtrabaho ngan han mga nagdudumara ha ira.”

18Niyan nagpadayon hiya, “Aadi in basahan nga iginhatag ha akon ni Hilkias.” Ngan ginbasa ini ni Safan hin dako nga tingog ngadto han hadi.

19Han pakabati la han hadi han basahan nga ginbabasa, ginggisi niya ha kahadlok an iya panapton

20ngan iginhatag ini nga sugo ngadto kanda Hilkias, Ahikam nga anak ni Safan, Abdon nga anak ni Mikias, Safan nga sekretaryo han palasyo, ug Asias nga surugoon han hadi:

21“Kadto ngan pakianhi an Ginoo hiunong ha akon ngan han mga tawo nga nagpapabilin pa ha Israel ug Juda. Usisaha an mga pagturon-an hini nga basahan. Nasisina ha aton an Ginoo, kay waray pagsugta han aton kaapoy-apoyan an pulong han Ginoo ngan waray pagbuhata an kinahanglan pagbuhaton nga ginsisiring hini nga basahan.”

22Ginsugo han hadi hi Hilkias ngan an iba hin pagpakiana hin babaye nga ginngaranan kan Hulda nga usa nga manaragna nga nag-uokoy ha barubag-o pa nga bahin han Jerusalem. (Hi Salum nga iya bana, nga anak ni Tecba ngan apo ni Harhas amo an tinaporan han higlawig nga mga panapton han Templo.) Iginsumat nira ha iya an nahinabo,

23ngan ginsiring niya hira nga bumalik ngadto han hadi ngan ihatag ha iya

24ini nga mensahe tikang han Ginoo: “Kakastigohon ko an Jerusalem ngan an ngatanan nga mga tawo pinaagi han mga tunglo nga nahisurat ha basahan nga ginbasa ngadto han hadi.

25Iginsikway ako nira ngan naghalad hira hin mga hayop nga tinubod ngadto ha iba nga kadiyosan, sanglit nasina ako tungod han ngatanan nga ira ginbuhat. Nasina ako han Jerusalem ngan diri ini mahugpoy.

26Mahitungod han hadi, amo ini an igsisiring ko, an Ginoo nga Dyos han Israel: Pinamatian mo an nahisurat ha basahan,

27ngan nagbasol nga nagpaubos ka ha akon atubangan, pinaagi han paggisi han imo panapton ngan pagtangis han imo pakabati han akon pagtarhoga hin pagkastigo han Jerusalem ngan han iya mga tawo. Hinbatian ko an imo pag-ampo.

28An kastigo nga akon dadad-on ha Jerusalem aada ko ihahatag kon mamatay ka na. Tutugotan ko ikaw nga mamatay ka ha kamurayaw.”

Binmalik ngadto kan Hadi Josias an mga tawo dara ini nga mensahe.

Ginhimo ni Josias in Ginsaaran hin Pagsugot han Ginoo

(2 Hadi 23:1-20)

29Ginpatawag ni Hadi Josias an ngatanan nga mga pangulo han Juda ug Jerusalem,

30ngan nagburunyog hira ngadto ha Templo, inupdan han kapadian ngan han mga Levita, ngan han ngatanan nga mga tawo nga riko ug pobre. Ha atubangan nira ngatanan ginbasa han hadi hin dako nga tingog an bug-os nga basahan nga hin-agian ha Templo.

31Tinmindog hiya sapit han hadianon nga harigi ngan naghimo hin ginsaaran ha Ginoo hin pagsugot ha iya, pagtuman han iya mga balaod ngan mga sugo ha bug-os niya nga kasingkasing ug kalag, ngan pagbuhat han mga ginkikinahanglan han ginsaaran sumala han nahisurat dida han basahan.

32Ginpasaad niya an mga tawo han Benjamin ngan an ngatanan nga nakadto ha Jerusalem hin pagtuman han ginsaaran. Sanglit ginsugot han mga tawo han Jerusalem an mga ginkikinahanglan han ginsaaran nga ira ginhimo ngadto han Dyos han ira kaapoy-apoyan.

33Ginbungkag ni Hadi Josias an ngatanan nga makaoorit nga mga diyosdiyos nga nakada ha katunaan nga gintatag-iya han mga tawo han Israel, ngan samtang buhi pa hiya, ginkinahanglan niya an mga tawo nga mag-alagad han Ginoo nga Dyos han ira kaapoy-apoyan.