1-2Pagkadako mo nga bulig ha akon—
ako nga makalolooy, ngan maluya nga tawo!
3Nahatag ka hin sugad ka maupay nga sagdon ngan napaangbit ka han imo hibaro ngadto hin usa nga lurong nga sugad ha akon!
4Hin-o man ha imo paghunahuna an mamamati han ngatanan mo nga mga pulong?
Hin-o ba an nagdasig ha imo hin paghimangraw hin sugad hini?
[Bildad]5Nakurog an mga espiritu han mga patay didto han katubigan ha ilarom han tuna.
6Dayag sa Dyos an kalibutan han mga patay;
waray nakakasalipod han iya pagkita.
7Ginbitad han Dyos an amihanan nga bahin han langit,
ngan ginpalutaw an tuna dida hin kawadahan.
8An Dyos amo an nahatag hin tubig han mga dampog,
ngan nagpupugong nga diri maburit an mga dampog tungod han kabug-at han tubig.
9Tinatago niya an kadayaw nga bulan didto ha luyo hin dampog.
10Ginlain niya an kapawa tikang han kasisidman,
pinaagi hin iya iginbagis nga nalibot ha bawbaw han kadagatan.
11Kon ginbabay-og niya an mga harigi nga natukod han langit,
nangungurog ini hin kahadlok.
12An iya gahom amo an nakadaog han dagat,
pinaagi han iya kabatiran ginpukan niya an higante nga mananap nga hi Rahab.
13An iya ginhawa amo an nakapahayag han langit,
ngan an iya kamot amo an nagpatay han napalagiw nga higante nga mananap.
14Kundi mga tigaman la ini han iya gahom,
an mga huring la nga aton hinbatian.
Hin-o gud an makakasabot han tinuod nga pagkagamhanan han Dyos?
Who We AreWhat We EelieveWhat We Do
2025 by iamachristian.org,Inc All rights reserved.
