Ezequiel 34 - Samarenyo Meaning-Based Bible (1984)（MBBSAM）

Ginsaway an mga Paramangno han Israel

1Naghimangraw ha akon an Ginoo.

2Nagsiring hiya, “Anak hin tawo, sawaya an mga punoan han Israel. Panagna ngan sumati hira han akon, an Ginoo nga Dyos, igyayakan ha ira: Maghihikaraot kamo nga mga magmarangno han Israel! Nagmamangno kamo han iyo la kalugaringon, kundi diri gud niyo ginmamangnoan an mga karnero.

3Iniinom niyo an gatas, sinusul-ot an mga panapton nga hinimo tikang han delana, ngan iniihaw ngan kinakaon an gitatamboki nga mga karnero. Kundi diri gud niyo ginmamangnoan an mga karnero.

4Waray niyo paymangnoi an mga magluya, pagbulnga an mga magsakit, pagbutka an mga samad, pabalika an mga nahisalaag, o pagbilnga an mga nagkawawara. Ginraogdaog lugod niyo hira.

5Nagsasarang an mga karnero kay waray hira magmarangno, ngan pinanmatay ngan pinanngaon hira hin magpintas nga kamanampan.

6Sanglit nahisalaag an akon mga karnero didto han higtaas nga kapungtoran ngan kabukiran. Nagsarang hira ha bawbaw han tuna, ngan waray gud may nangita ha ira o nagtinguha hin pamiling ha ira.

7“Sanglit pamati kamo nga mga magmarangno han igyayakan ha iyo nakon nga Ginoo.

8Sugad nga ako amo an buhi nga Dyos, maupay pa mamati kamo ha akon. Ginsulong hin magpintas nga kamanampan nga nanmatay ngan nanngaon ha ira, kay waray man nira magmarangno. Waray gud magtinguha an akon mga magmarangno hin pamiling han mga karnero. Ginmamangnoan nira an ira la kalugaringon ngan diri an mga karnero.

9Sanglit pamati kamo ha akon, kamo nga mga magmarangno.

10Nagsusumat ako nga Ginoo nga Dyos nga kaaway ako niyo. Kukuhaon ko ha iyo an akon mga karnero ngan diri na gud ako matugot ha iyo nga magin ira magmarangno; diri ko na gud kamo tutugotan hin pagmangno han iyo la kalugaringon. Babawion ko ha iyo an akon mga karnero ngan diri ko na kamo tutugotan hin pagkaon ha ira.

An Maupay nga Magmarangno

11“Nagsusumat ako nga Ginoo nga Dyos nga ako ngahaw an mamimiling han akon mga karnero ngan magmamangno ako ha ira,

12ha amo ngahaw nga paagi nga nagmamangno in usa nga magmarangno han iya mga karnero nga nahisalaag ngan nahibalik na liwat. Ibabalik ko hira tikang han ngatanan nga mga dapit diin hira nahisalaag ha usa ka adlaw nga masirom ngan makaharadlok.

13Kukuhaon ko hira tikang han langyaw nga kanasoran, titirokon ko hira, ngan ibabalik ko ngadto han ira kalugaringon nga tuna. Pag-uunhan ko hira hin pagbalik ngadto han kabukiran ngan kasapaan han Israel, ngan pasasabsabon ko hira didto han maglangbo nga mga kabanwaan.

14Pasasabsabon ko hira hin waray kahadlok didto hin mga panabsaban ha bukid ngan ha mga kahamub-an, ngan ha ngatanan nga maglangbo nga mga panabsaban ha tuna han Israel.

15Ako ngahaw an magmamangno han akon mga karnero, ngan igbibiling ko hira hin usa nga dapit nga papahuwayan. Ako nga Ginoo nga Dyos an nagyakan.

16“Pamimilngon ko adton mga nagkawawara, ibabalik adton mga nanhisalaag, bubutkon adton ira mga samad, ngan bubulngon adton mga magsakit; ngan pagbabantayan ko adton mga magtambok ngan an magkusog, kay magmarangno ako nga nagbubuhat han matadong.

17“Sanglit yana, akon panon, nagsusumat ako nga Ginoo nga Dyos nga paghuhukman ko an kada usa ha iyo ngan an mga mag-upay ilalain ko han mga magraot, ngan an mga karnero ilalain ko han mga kanding.

18Diri ba igo nga manibsib kamo didto han maglangbo nga kabanwaan nga iyo manla gintatamaktamakan an diri niyo ginpapanibsib nga banwa? O hin pag-inom han matin-aw nga tubig nga iyo man ginlulubog an waray niyo mainom?

19Ipakakaon ba niyo han akon iba nga mga karnero an kabanwaan nga iyo gintatamaktamakan, ngan ipaiinom ba niyo an tubig nga iyo ginlulubog?

20“Sanglit yana nagsusumat ako nga Ginoo nga Dyos nga paghuhukman ko kamo nga magkusog ngan magluya nga mga karnero.

21Igintikwang niyo an mga magsakit ngan ginsungay niyo hira basi humirayo han panon.

22Kundi tatalwason ko an akon mga karnero ngan diri ko na gud tutugotan nga pagraogdaogon hira. Paghuhukman ko an kada usa han akon mga karnero ngan an mga mag-upay paglalainon ko han mga magraot.

23Tatagan ko hira hin hadi nga sugad kan David nga akon surugoon nga magigin ira usa nga magmarangno, ngan iya ini hira pagmamangnoan.

24Magigin ira Dyos ako nga Ginoo ngan magigin punoan nira in usa nga hadi nga sugad kan David nga akon surugoon. Ako an nagyakan.

25Maghihimo ako hin ginsaaran ha ira nga magpapasarig han ira kahimyangan. Pupuohon ko an ngatanan nga magpintas nga kamanampan dida han tuna, basi makag-ukoy an akon mga karnero hin waray kahadlok didto han kaumhan ngan makakaturog hira didto han mga kagurangan.

26“Pagpapakaupayon ko hira ngan tutugotan ko hira hin pag-ukoy ha palibot han akon baraan nga pungtod. Didto ihahatag ko ha ira in uran ha panahon nga magkinahanglan hira.

27Mamumunga an kakahoyan, mahatag hin mga abot an kaumhan, ngan mag-uokoy an tagsatagsa ha kamurayawan didto han iya kalugaringon nga tuna. Kon utdon ko na an mga kadena han akon mga tawo ngan buhian hira tikang hadton mga nag-oripon ha ira, niyan makilala hira nga ako amo an Ginoo.

28Diri na hira paninikasan han pagano nga mga nasod, ngan diri na hira pamamatayon ngan pangangaonon han magpintas nga kamanampan. Mag-uokoy hira hin waray kahadlok ngan waray na magtatarhog ha ira.

29Tatagan ko hira hin maglangbo nga kaumhan ngan tataposon ko an kagutom didto han tuna. Diri na hira pagtatamayon han iba nga mga nasod.

30Mahibabaro an ngatanan nga pinananalipdan ko an Israel ngan nga akon hira mga tawo. Ako nga Ginoo nga Dyos an nagyakan.

31“Kamo nga akon mga karnero, nga akon pinakakaon nga panon, amo an akon mga tawo, ngan ako amo an iyo Dyos,” nasiring an Ginoo nga Dyos.