Mga Salmo 50 - Samarenyo Meaning-Based Bible (1984)（MBBSAM）

Matuod nga Pagsingba

1Nagyayakan an Ginoo, an Dyos nga Labi Kamakagarahum;

gintatawag niya an bug-os nga tuna tikang ha sinirangan ngadto ha katundan.

2Nasanag an Dyos tikang ha Sion;

an syudad hingpit han iya katahom.

3Tiarabot an aton Dyos,

kundi diri ha kahilom;

ha atubangan niya may naglalahimgad nga kalayo,

ha palibot niya may makusog nga bagyo.

4Gintatawag niya an langit ug tuna sugad nga mga saksi

han iya paghukom han iya mga tawo.

5Nasiring hiya, “Pagtiroka an akon magtinumanon nga mga tawo,

adton naghimo hin ginsabotan

kaupod ha akon pinaagi hin paghalad hin tinubod nga mga unong.”

6Nagsasangyaw an kalangitan nga matadong an Dyos,

nga hiya ngahaw usa nga maghurukom.

7“Pamati, o akon mga tawo, ngan magyayakan ako;

magpapamatuod ako kontra ha imo, Israel.

Amo ako an Dyos nga iyo Dyos.

8Diri ako nagsasaway ha iyo

tungod han iyo mga tinubod nga unong,

ngan han mga tinubod nga halad nga ha dayuday iyo gindadara ha akon.

9Diri ako nagkikinahanglan

hin mga todo nga baka tikang han iyo kaumhan

o kakandingan tikang han iyo mga panon;

10kay akon man an ngatanan nga kamanampan ha kagurangan

pati an kabakahan ha yinukot nga kapungtoran.

11Akon an ngatanan nga katamsihan ha kalangitan,

ngan an ngatanan nga buhi nga mga binuhat ha kaumhan.

12“Kon gutomon ako, diri ko ikaw pagsusumatan,

kay an kalibutan ngan an ngatanan nga aada hini, akon man.

13Nakaon ba ako han karne hin kabakahan o mainom han dugo hin kakandingan?

14An pagpasalamat asay ighalad niyo ngadto ha Dyos,

ngan ihatag han Labi Kamakagarahum an iyo iginsaad.

15Tawaga ako niyo kon naabot an kakurian;

tatalwason ko kamo,

ngan pagdadayawon ako niyo.”

16Kundi nasiring an Dyos ngadto han mga magraot,

“Kay ano nga ginpapamatbat niyo an akon mga sugo?

Kay ano nga ginhihimangraw niyo an akon ginsaaran?

17Nadiri kamo nga pagsawayan ko kamo;

iginsisikway niyo an akon mga sugo.

18Nakikigsangkay kamo han kawatan nga iyo hinkikit-an,

ngan nakikigtampo kamo hin mga manlilibog.

19“Andam kamo pirme pagyakan hin maraot;

diri kamo nag-aalang hin pagbuwa.

20Andam kamo pagsumbong han iyo kalugaringon nga kabugtoan

ngan pagpangita hin ira kasaypanan.

21Ginbuhat niyo ini ngatanan ngan waray la ako magyakan,

sanglit naghunahuna kamo nga pareho la ako ha iyo.

Kundi yana ginsasaway ko kamo

ngan nagsusumbong ako ha atubangan niyo.

22“Pamatii ini niyo, kamo nga nagpapasibaya ha akon,

kay kon diri, bubungkagon ko kamo,

ngan waray gud makakatalwas ha iyo.

23An pagpasalamat amo an tinubod nga unong nga nagpapasidungog ha akon,

ngan tatalwason ko gud an ngatanan nga nagsusugot ha akon.”