Sirac 18 - Samarenyo Meaning-Based Bible (1984)（MBBSAM）

Makagarahum an Dyos

1An Ginoo nga nag-uokoy ha kadayonan amo an nagtuha han bug-os nga kalibutan

2ngan hiya gudla an matadong.

4Waray hiya maghatag bisan kan kanay hin gahom pagsumat han iya ginbuhat, ngan waray tawo nga makakag-usisa hini hin tukib.

5Hin-o ba an makakagsukol han iya gahom? Hin-o an makakagsaysay han bug-os nga susumaton han iya maloloy-on nga mga buhat?

6Diri kita makakadugang o makakaiban hini. Waray gud paagi hin pagtugkad han makaaramdok nga mga butang nga ginbuhat han Ginoo.

7Kon umabot na kita ha kataposan han susumaton, waray pa ngani kita makagtikang; diri gud la gihapon hisasabotan naton hin maupay.

Waray Hinungdan an Tawo

8Ano ba an tawo ngan ano an iya gamit? Ano an kahulogan han maupay ngan han maraot nga iya mga buhat?

9Kon in usa ka tawo mabuhi hin 100 ka tuig, hilawig ini nga kinabuhi,

10kundi kon itanding han panahon nga waray kataposan sugad la ini hin usa ka lugas nga baras ha baybayon.

11Sanglit mapinailobon gud ha aton an Dyos, ngan maloloy-on gud hiya ha aton.

12Nakita hiya ha aton ngan maaram hiya nga mapatay kita; sanglit andam hiya hin pagpasaylo.

13May-ada pagkalooy in usa ka tawo ngadto hin tawo nga iya kinikilala, kundi an Ginoo nalolooy han ngatanan nga mga tawo. Sinasaway, gindidisiplina ngan gintututdoan kita niya. Sugad hin magmarangno hin mga karnero nga nagbabantay han panon, gindadara kita niya hin pagbalik ngadto ha iya ngahaw.

14Malolooy hiya ha aton kon karawton ta an iya pagmando ha aton ngan andam kita hin pagkarawat kon ipakita niya ha aton an aton mga pakasayop.

Pagmaloloy-on ngan Pagmahinatagon

15Anak ko, kon mabulig ka hin usa ka tawo, ayaw idungan an pagsayaw ha iya. Kon magregalo ka, upaya an pagpahimutang han imo mga pulong.

16Labaw an imo mga pulong kay han imo ihinahatag. Bisan an tun-og nakakahatag hin gutiay nga pahalibway ha panahon han kapaso.

17Tinuod, mapulsanon pa an mga mag-upay nga pulong kay han gimamaupayi nga mga regalo, ngan kon tinuod an imo paghatag, ihahatag mo ini nga duha.

18Usa nga kalurongan an kawaray pagkalooy ug an pagpakaalo. Waray mga mata nga malilipay hin pagkita hin regalo nga diri kinasingkasing an paghatag.

Usisaha an Imo Kalugaringon

19Kinahanglan maaram ka kon ano an imo ighihimangraw san-o ka magyakan, ngan mangnoi an imo panlawas nga diri ka pa nasasakit.

20Usisaha an imo konsyensya san-o an Ginoo maghukom ha imo. Niyan kon umabot na ito nga panahon, pasasayloon ka niya.

21Pagpaubos anay, san-o ka pagsirotan hin sakit. Pagbasol kon nakasala ka.

22Kon magsaad ka han Ginoo, tumana ini dayon. Ayaw ig-ugsod an pagtuman hini ngada ha takna nga himaratyon ka na.

23Kundi san-o ka magsaad, pag-andam nga daan hin pagtuman hini. Ayaw pagsarihi an pagkamailobon han Ginoo.

24Paghunahunaa! Karuyag ba nimo nga masina hiya ha imo ha adlaw han imo pagkamatay? Kon paghukman ka na niya, karuyag ba nimo nga talikdan ka?

25Kon may-ada ka han ngatanan nga imo kinaruruyag, paghunahunaa daw kon ano an pagkagutom ngan kon ano an pagkakablas.

26Damo an nababalhin sulod hin usa la ka adlaw; an Ginoo madagmit makagbuhat hini.

27Kon maaram ka, maghihirot ka han ngatanan nga imo ginbubuhat. Kon ginlilibotan ka han sala, paghirot gud nga diri ka kadarahigan han sala.

28An tawo nga masinaboton nakilala han kinaadman ngan pagpapasidungogan niya an bisan hin-o nga nagpapakita hini.

29Kon ha imo pakabati han kinaadman ginmahal mo ini, mahihimo ka liwat nga makinaadmananon, ngan an imo mga pulong usa nga burabod hin kinaadman para han iba.

Pagpugngi an Imo Kalugaringon

30Ayaw pagpagarong han imo mahilas; nga kaipahon; pugngi an imo maraot nga mga ungara.

31Kon pataksan mo la an tagsa mo nga ungara, pagtitinawaan ka han imo mga kaaway.

32Ayaw pagpatakas hin himyang nga pag-ukoy; makakaraot ini ha imo.

33Kon waray mo kwarta nga imo kalugaringon, ayaw pangutang para hin mahal nga mga kombite kon makakahimo manla ini ha imo nga usa nga makililimos.