1Kon magbuhat ka hin maupay, kinahanglan nga maaram ka kon hin-o an makakapahimulos hini; niyan diri makakawang an imo ginbubuhat.
2Pagbabaloson ka tungod han ginpakita mo nga pagkamaupay ngadto han tawo nga mainampoon ha Dyos. Kon diri hiya magbalos ha imo, babaloson ka han Gihahataasi.
3Waray naabot nga kaupayan hadton tawo nga naghahatag hin pahalibway han mga magraot; diri ini matadong nga buhat.
4Hatagi an mga tawo nga mainampoon ha Dyos, kundi ayaw pagbuligi an mga makasasala.
5Buhati hin maupay an mga mapinaubsanon, kundi ayaw tagi hin bisan ano an diri mainampoon. Ayaw hira tagi hin pagkaon, kay gagamiton la nira an imo pagkamaupay hin pagkontra ha imo. An tagsa nga maupay nga butang nga imo ginbuhat para hin sugad nga mga tawo mabalik ha imo in doble pa nga kasamok.
6An Gihahataasi ngahaw napupungot han mga makasasala, ngan kakastigohon hira niya.
7Tagi an mag-upay nga mga tawo, kundi ayaw buligi an mga makasasala.
8Ha panahon nga maupay an kalakat han mga butang, makuri hin pagkilala han inungod nga imo kasangkayan, kundi ha panahon han kakurian makikilala mo an imo kaaway;
9bisan an imo kasangkayan mabaya ha imo. Kundi kon mainuswagon ka makikisangkay ha imo bisan an imo mga kaaway.
10Ayaw gud pagtapod hin usa nga kaaway; makakabungkag sugad hin taoy an iya pagkamaraot.
11Pagbantay ngan pag-ikmat ha iya bisan kon mapinaubsanon an iya panggios. Sugad hiya hin salaming nga metal nga gintataoy kon diri mo ini painggaton.
12Ayaw hiya palingkora ha imo sapit kay bangin agawon niya an imo kalugaringon nga lingkoran. Ayaw hiya ibutang ha sapit nimo kay pupukanon ka niya. Niyan mahibabaroan mo an kamatuoran han akon mga pulong, ngan magbabasol ka kon hinumdoman mo ini.
13Waray mabibido kon makagat in mga paralumay hin halas o paramanso hin magbangis nga mga mananap,
14ngan waray mabibido ha imo kon makig-upod-upod ka hin mga makasasala ngan mahiapi ka han ira magraot nga mga buhat.
15Mapabilin upod ha imo hin madali an imo kaaway, kundi kon umabot an kakurian diri magpapadayon an iya pakigsangkay.
16Magyayakan hiya hin magtam-is nga mga pulong samtang nakakahunahuna hiya hin pagbitik ha imo. Mapasangil hiya hin pakig-angbitay han imo mga kabidoan, kundi kon may-ada hiya higayon papatayon ka niya.
17Kon aboton ka hin kakurian, hiaagian mo hiya nga naghihinulat nga andam hin pagbitik ha imo samtang napasangil hiya hin pagbulig ha imo.
18Mag-iiba na hiya nga tawo nga magpapakita nga nalilipay hiya pinaagi hin pagpakpak han iya mga kamot, pagtanotangdo han iya ulo kundi maglilibak ha imo.
Who We AreWhat We EelieveWhat We Do
2025 by iamachristian.org,Inc All rights reserved.
