Mga Darahonon 21 - Samarenyo Meaning-Based Bible (1984)（MBBSAM）

1Gindudumara han Ginoo an kanan hadi hunahuna, hin sugad kamasayon han iya pagmando han pag-awas hin usa nga sapa.

2Mahihimo maghunahuna ka nga matadong an ngatanan nga imo ginbubuhat, kundi hinumdomi nga an Ginoo amo an naghuhukom han imo mga panuyo.

3Buhata an matadong ngan maupay; labaw ini nga nakakalipay han Ginoo kay hin paghalad ha iya hin mga tutuboron nga halad.

4Ginbubut-an an mga magraot han ira kamapinahitas-on ngan kamalabyaw, ngan sala ini.

5Paglarang hin maupay ngan magkakamay-ada ka bahandi; kon inapiki an imo buhat maiimo la an kakablasan.

6An karikohan nga naaangkon mo pinaagi hin limbong nawawara dayon; kundi pagdadad-on ka anay hini ngadto ha ganggang han kamatayon.

7Paghuhukman an mga magraot pinaagi han ira kalugaringon nga kamaraogdaog; nadiri hira hin pagbuhat han matadong.

8Baliko an dalan nga ginlalaktan han mga salaan; matadong an ginbubuhat han mga waray sala nga tawo.

9Mauruupay pa an pag-ukoy ha atop hin balay, kay hin pakiglungon hin asawa nga mamugo ngan maaringasa.

10An mga magraot dayuday la gutom hin karat-an; waray gud tawo nga ira nalolooyan.

11Kon kinakastigo an tawo nga mayubiton, bisan an tapang makakakuha dida hini hin pagturon-an. Mahibabaro an makinaadmananon han igintututdo ha iya.

12Maaram an matadong nga Dyos han mga nahinanabo didto han mga panimalay han mga magraot ngan iya pagpupukanon hira.

13Kon diri mo pamatian an pakibulig han mga kablas, diri man pamamatian an imo tawag hin pakibulig.

14Kon may tawo nga nasisina ha imo, makakapahugpoy ha iya in regalo nga ihinahatag hin sekreto.

15Kon binubuhat an katadongan, an mga mag-upay malipayon, kundi an mga magraot nagkakahadlok.

16Ginhuhulat han kamatayon an bisan hin-o nga nagpapasagad la ngan diri nagamit han iya maupay nga hunahuna.

17An pagpatakas hin kalipayan, bino, ngan marasa nga pagkaon, diri gud makakapariko ha imo.

18An mga magraot amo ngahaw an mahiaagom han pag-antos nga ira gintitinguha hin pagdara ngadto han mga buotan.

19Mauruupay an pag-ukoy ha kamingawan, kay hin pagtampo hin asawa nga mamugo ngan masuson.

20Nag-uokoy an mga makinaadmananon ha kahuraan ug karikohan, kundi ginagasto la dayon han mga lurong an kwarta nga ira hin-aagian.

21Pagmaloloy-on ngan ayaw paglimbong ngan mabubuhi ka hin maiha; pagtatahoron ngan pagdudumaraon ka hin maupay han iba.

22Nakakabihag in listo gud nga heneral hin syudad nga binantayan hin mag-isog nga mga sondalo, ngan nakakarumpag han mga pader nga ira sinasarigan.

23Paghiroti an imo ginyayakan, kon buot ka mahigawas hin kasamokan.

24Ipakita ha akon in mapahitas-on nga tawo, ngan ipakikita ko ha imo in parayawnon, malabyaw ngan diri maaram mag-alagyan nga tawo.

25Naglulugaring la hin pagpatay ha iya ngahaw an hubya nga tawo, nga nadiri hin pagtrabaho;

26an iya la binubuhat amo an paghunahuna han mga butang nga iya karuyag maangkon. Kundi mahinatagon an matadong nga tawo ngan huyayag an kasingkasing hin paghatag.

27Napupungot an Ginoo kon naghahalad ha iya an magraot nga mga tawo, labi na gud kon binubuhat nira ini tikang hin magraot nga mga panuyo.

28Diri tinutuod an buwaon nga testigo, kundi kinakarawat an pulong hin tawo nga naghuhunahuna anay hin maupay.

29Natapod ha ira ngahaw an magtadong nga mga tawo, napakamag-isog an mga magraot nga tawo.

30An kinaadman, an kabaltok, ngan an katarom han hunahuna waray la ini pulos kon nakontra ha imo an Ginoo.

31Makakahimo ka hin pag-andam hin mga kabayo para ha pag-awayan, kundi an Ginoo amo an nahatag hin pagdarag-an.