Mga Salmo 105 - Samarenyo Meaning-Based Bible (1984)（MBBSAM）

Nagpasalamat an Iya Katawhan(1 Cron. 16:8-22)

1Pagpasalamati niyo an Ginoo

ngan igpasangyaw an iya pagkadako;

igpahayag an iya mga nahimo,

dida han kanasoran igsumat niyo!

2Pagkantahi hin pagdayaw an Ginoo,

sumat nga ur'sahon iya nahimo.

3Pagkalipay kamo kay iya na kita

tanan nga nasingba ha iya magrakya.

4Dangop ha Ginoo nga kamo buligan,

ngan magsingba ha iya hin kadayonan;

5ngan angay gud niyo nga paghinumdoman

mga buhat niya nga kahiburongan.

Hinumdomi an iya mga milagro,

ngan mga paghukom nga iya nahimo;

6tulin ni Abraham nga iya ginsugo,

ngan tulin ni Jacob pinili nga tawo.

7Amo hiya an aton Dyos nga Ginoo,

para han ngatanan iya mga sugo.

8Gintutuman niya iya ginsaaran,

mga saad 'ya yukot nga katulinan.

9Tutumanon iya sabot kan Abraham,

ngan an iya saad ngadto kan Isaac.

10May ginsaaran an Ginoo kan Jacob,

an ginsaaran nga magpapadayon gud.

11Siring niya, “Ikaw an akon tatagan

han bug-os nga katunaan han Canaan;

ini magigin imo kalugaringon,

sugad nga imo gud ini panurondon.”

12Mga tawo han Dyos bisan gutiay la,

mga langya la ha Canaan nga tuna.

13Ha mga nasod nagsudoysudoy hira,

mga ginhadian hinngadtoan nira.

14Waray hiya tugot hira pagdaoton,

sanglit mga hadi 'ya ginpahimatngon:

15“Di' paglabtan akon mga dinihogan,

mga manaragna ko di' paghukaan.”

16Ira nasod gindad-an niya hin gutom,

ginkuha an tanan nira nga pagkaon.

17Kundi ginpauna niya in batan-on,

hi Jose nga ginbaligya nga oripon.

18Mga tiil niya an ginkadinahan,

ngan an iya liog hin puthaw ginhigtan.

19Tubtob nga an iya gintagna matuman,

an pulong han Ginoo ginpamatud-an.

20Hadi han Ehipto h'ya ginpabuhian,

gintalwas h'ya han hadi han kanasoran.

21Hiya ginhimo nga amo'n tinaporan,

han iya gobyerno, iya kagamhanan.

22H'ya na'n magburuot han bug-os nga tuna,

mga opisyal han hadi ubos niya;

mga magsaragdon iya gintatadagan,

gintutudoan niya hin kinaadman.

23Niyan hi Jacob kinmadto ha Ehipto,

ngan didto h'ya hini nga nasod pagpuyo.

24Ngan didto ginhimo ini han Ginoo,

nga magdamo'n anak han 'ya mga tawo.

Ngan ginhimo hira didto nga gamhanan,

labaw kay han ira kaaway ngatanan.

25Kundi didto iya katawhan gindumtan,

iya mga surugoon ginlimbongan.

26Iya surugoon nga Moises ginsugo,

ngan Aaron nga ginpili ginpakadto;

27ginbuhat nira'n buhat han Dyos nga dagko,

ngan mga milagro didto ha Ehipto.

28Gindad-an n'ya an tuna hin kasisidman,

kundi Ehiptohanon w'ray gud magtuman;

29ginhimo mga dugo ira kasalogan,

ngan ginpatay niya'n tanan kaisdaan.

30Naluob ira tuna hin kapaklahan,

bis' an palasyo'n hadi ira ginsudlan;

31pagsugo han Dyos, langaw ngan kanamokan

nagluob gud ha bug-os nga katunaan.

32Hulog mga yelo saliwan han uran,

nga lilinti idlap ha katunaan;

33ginrugmok kaigosan ngan urubasan,

ngan gintumba'n tanan gud nga kakahoyan.

34Pagsugo n'ya nagkaabot mga duron,

diri gud maihap nga minilyon-milyon;

35ngatanan nga tanom hini ginpangaon,

pati an ngatanan nira nga babrion.

36Ginpatay n'ya suhag nga kalalaken-an dit' han Ehiptohanon nga kabablayan;

37mga Israelita iya ginmandoan,

nagkalakat dara'n salapi, bulawan.

Ngan magkusog ini nga iya katawhan,

mag-upay an panlawas nira ngatanan;

38mga 'hiptohanon hira nahadlokan,

ngan nalipay hira nga ira bayaan.

39Katawhan han Dyos hin dampog ginpandongan,

ngan ha gab-i hin kalayo ginlamragan;

40hira nangaro, ginhatag katamsihan,

damo nga pagkaon tikang kalangitan.

41Ginbuka n'yan bato ngan tubig inmawas,

daw hin sapa han kamingawan paglatas;

42baraan nga saad iya hinnumdoman

nga't han surugoon n'ya nga hi Abraham.

43Sanglit ha pagguwa iya ginmandoan,

adton pinili gud niya nga katawhan;

ngan tungod hin dako gud nga kalipayan,

gogliat an ira pagkanta ngatanan.

44Iya ginhatag ha ira'n katunaan,

nga tuna nga kanan iba nga katawhan;

katapos iya gud hira gintugotan,

nga magtag-iya hadton ira kaumhan.

45Ginbuhat n'ya ini basi an katawhan,

managsugot han iya kabalaoran;

ngan an iya mga sugo tumanon man,

pagdayawon an Ginoo han ngatanan!