Daniel 10 - Samarenyo Meaning-Based Bible (1984)（MBBSAM）

Nakakita hi Daniel hin Panan-awon ha Ligid han Salog Tigris

1Dida han ikatulo ka tuig nga paghadi ni Ciro han Persia, iginpadayag in usa nga mensahe ngadto kan Daniel nga ginngaranan liwat kan Beltsasar. Matuod an mensahe kundi makuri hin duro masabot. Iginsaysay ini ha iya dida hin usa nga panan-awon.

2Dida hito nga panahon nagmasulob-on ako sulod hin tulo ka simana.

3Waray ako kumaon hin marasa nga pagkaon o hin bisan ano nga karne, waray uminom hin bino o maghiso hin lana ngan magsudlay han akon buhok ngada han katapos han tulo ka simana.

4Dida han ika 24 ka adlaw han syahan nga bulan han tuig, natindog ako dida han pangpang han dako nga Salog Tigris.

5Hinmangad ako ngan hinkit-an ko in tawo nga nakakasul-ot hin lino nga panapton ngan hin bakos hin puraw nga bulawan.

6Masilaw an iya lawas sugad hin usa nga alahas. Sugad hin kikidlat an kamapawa han iya nawong, ngan an iya mga mata naglalaga nga kalayo. An iya mga butkon ngan mga bitiis masilaw sugad hin pinainggat nga bronse, ngan an iya tingog sugad han aringasa hin damo nga mga tawo.

7Ako la an nakakita han panan-awon. Waray makakita hin bisan ano an mga tawo nga akon kaupod, kundi nahadlok hira hin duro ngan nagdadlagan hira ngan nanago.

8Ira ako ginbayaan nga nag-usaan, samtang nagkikinita pa ako hini nga urosahon nga panan-awon. Nawarayan ako hin kusog ngan nabalhin gud an akon nawong nga waray na gud makakakilala ha akon.

9Han paghibatii ko han iya tingog, natumba ako ha tuna ngan nawad-an ako hin sarabotan, ngan nakukulob ako ha tuna.

10Niyan kinaptan ako hin usa nga kamot ngan gin-alsa ako ha akon mga kamot ngan mga tuhod, nga nangungurog pa ngani ako.

11Nagsiring ha akon an anghel, “Daniel, hinihigugma ka han Dyos. Tindog ngan pamatii hin maupay an akon igsisiring ha imo. Ginsugo ako nganhi ha imo.” Han pagsiring niya hini, tinmindog ako nga nangungurog pa.

12Niyan nagsiring hiya, “Daniel, ayaw kahadlok. Pinamatian han Dyos an imo mga pag-ampo tikang pa han syahan nga adlaw han imo pakahunahuna hin pagpaubos basi makasabot ka han panan-awon. Kinmanhi ako sugad nga baton han imo pag-ampo.

13Inatohan ako han anghel nga puno han ginhadian han Persia sulod hin 21 ka adlaw. Niyan inmabot hi Miguel nga usa han labaw nga mga anghel hin pagbulig ha akon, kay ginbayaan ako nga nag-uusaan didto ha Persia.

14Kinmanhi ako hin pagpasabot ha imo han mahinanabo han imo mga tawo ha tiarabot nga panahon. Panan-awon ini hiunong han tiarabot nga panahon.”

15Han kahuman niya pagyakan, tinmamod ako ha tuna nga waray ako makayakan.

16Niyan igin-unat han anghel nga sugad hin tawo pagkit-on an iya kamot ngan ginkamkam an akon mga im-im. Nagsiring ako ha iya, “Nakakapaluya hin duro ha akon ini nga panan-awon ngan kinakadal ako hin kahadlok.

17Sugad ako hin usa nga oripon nga natindog ha atubangan han iya agaron. Uunanhon ko hin paghimangraw ha imo? Waray ko na kusog o ginhawa nga nahisalin dinhe ha akon.”

18Iya na liwat ako kinaptan ngan nakapadasig ini ha akon.

19Nagsiring hiya, “Hinihigugma ka han Dyos, sanglit pagmakusog ngan ayaw kahadlok.”

Han pakasiring niya hini, inabat ko nga nahibalik an akon kusog ngan sinmiring ako, “Sumati ako han imo igyayakan, kay nakahatag ka ha akon hin kadasig.”

20-21Nagsiring hiya, “Maaram ka ba kon kay ano nga kinmanhi ako ha imo? Pagpadayag ini ha imo han nahisurat dida han Basahan han Kamatuoran. Yana kinahanglan bumalik ako ngan awayon ko an anghel nga magbarantay han Persia. Katapos hito mapakita an anghel nga magbarantay han Grecia. Waray iba nga mabulig ha akon labot kan Miguel nga anghel nga magbarantay han Israel.