Kinaadman ni Solomon 12 - Samarenyo Meaning-Based Bible (1984)（MBBSAM）

1Aada han tagsatagsa ha ira an imo espiritu nga waray kamatayon,

2sanglit ginhihinay mo hin pagsaway adton mga nakakasala ha imo. Ginpapahinumdom mo hira han ira ginbubuhat, ngan ginpapahimatngonan mo hira hiunong hini, basi bayaan unta nira an ira magraot nga mga paagi ngan tumoo hira ha imo, O Ginoo.

Nakasala an mga Canaanhon

3-4Nasina ka han mga tawo nga nag-ukoy ha maiha na nga panahon, didto han imo baraan nga tuna kay nagbuhat hira hin pagpakaharadlok nga mga butang: nagbuhat hira hin salamangka ngan hin diri baraan nga pagsingba;

5nagpatay hira hin kabataan hin waray pagkalooy ngan kinmaon hira hin unod ug dugo hin mga tawo. Nagtambong hira hin hilom nga mga seremonyas

6diin an kag-anak nagpatay han ira kalugaringon nga magpakalolooy nga mga anak. Imo ini kaburot-on nga pamatayon ini nga mga tawo han amon kaapoy-apoyan,

7basi an tuna nga imo gin-isip nga amo an gimamahali han ngatanan nga mga tuna, magin angay nga usa nga urokyan para han imo mga tawo.

8Kundi bisan pa ngani, nalooy ka han ira mga kaaway, tungod nga mga tawo la hira. Ginpauna mo han imo kasondalohan in mga buyog para pagpuo han kaaway hin hinayhinay.

9Natutugotan mo unta an mga magtadong hin pagbungkag hadto nga diri dyosnon nga mga tawo didto ha pag-awayan; nakakapuo ka unta ha ira hin kadagmitan pinaagi hin ihalas nga kamanampan o hin usa nga maisog nga pagsugo.

10Kundi ginhinayhinay mo lugod hin pagtuman han imo sirot, hin paghatag ha ira hin higayon hin pagbasol, bisan kon maaram ka nga tikang hira hin maraot nga tulin, nga daan magraot hira tikang pa han katawo, ngan diri na gud hira magbabag-o han ira paagi hin panhunahuna.

11Daan na ginpanhimaraot an bug-os nira nga nasod tikang ha tinikangan, ngan bisan kon waray mo hira pagkastigoha tungod han ira mga sala, diri ini tungod nga may-ada mo nahahadlokan ha ira.

An Dyos Amo an Magburuot

12Gintuha mo adto nga magraot nga mga tawo, ngan waray tawo nga makakagyakan ha pagpanalipod ha ira o makakagsirot ha imo tungod han pagpuoha mo ha ira. Waray tawo nga makakapakiana hiunong han imo ginbuhat o makakariwa han imo paghukom.

13Aada ha ubos han imo pagmangno an ngatanan nga mga butang ngan waray na iba nga diyos nga imo sasaritan han imo mga paghukom.

14Waray hadi o punoan ha tuna mga makakagsumbong ha imo hiunong hin diri maupay nga pagkastigo mo hadto nga mga tawo.

15Matadong ka ngan naghahadi ka hin matadong han ngatanan nga mga butang. Waray ka pa maggamit han imo gahom hin paghukom ha karat-an hin usa ka tawo nga diri angay pagsirotan.

16An imo kusog amo an burabod han katadongan. Makakagpakita ka hin pagkalooy han ngatanan nga mga tawo kay ikaw man an Ginoo han ngatanan.

17Ipinapakita mo an imo kusog kon nagruruhaduha an mga tawo han imo hingpit nga gahom, ngan kinakastigo mo an bisan hin-o nga maaram na han imo gahom kundi nangangahas pa hin pagpasibaya hini.

18Bisan kon may-ada ka hingpit nga gahom, usa ka nga maloloy-on nga maghurukom. Nakakagbuhat ka man unta kontra ha amon ha bisan san-o nga imo karuyag, kundi naghahadi ka ha amon upod in dako nga pagpailob.

19Pinaagi han mga butang nga imo ginbuhat, gintutdoan mo an imo mga tawo nga kinahanglan liwat magmaloloy-on in usa ka tawo nga matadong. Gintagan mo an imo mga tawo hin dako nga paglaom pinagi hin pagtugoti ha ira hin pagbasol han ira mga sala.

20Uraura ka hin kamahirot ngan kamapinailobon ha pagkastigo han mga kaaway han imo mga tawo; bisan kon angay hira pamatayon, gintagan mo hira han ngatanan nga higayon hin pagbaya han ira makasasala nga mga paagi.

21Kundi ginhukman mo hin masigpit an kalugaringon mo nga mga tawo bisan kon naghimo ka hin mga ginsaaran han ira kaapoy-apoyan ngan nagsumpa ka hin paghatag ha ira hin mag-upay nga mga butang.

22Tinuod, ginkakastigo mo kami, kundi ginkakastigo mo an amon mga kaaway hin napulo ka yukot ka pilo, basi kon maghukom kami han iba, mahinumdom unta kami han imo pagkamaupay, ngan kon ginhuhukman kami, bilngon unta namon an pagkalooy.

Ginkastigo an mga Ehiptohanon

23Sanglit imo ginsakit hira nga baga nga kalurong hin pag-ukoy hin maraot nga kinabuhi—imo ginsakit hira pinaagi han magpakaharadlok nga mga butang nga ira ginsingba.

24Pinmahirayo hira han kamatuoran ngan nagsingba hira han magpakangingirhat ngan magpakaharadlok nga kamanampan. Masayonay la hira malimbongan sugad han gudti nga kabataan.

25Sanglit ginkastigo mo hira tungod ha ira pagkalurong, ngan an imo paghukom naghimo ha ira nga sugad hin mga lurong pagkit-on.

26Gutiay la ini nga kastigo, kundi adton diri nabali hin sugad nga mga pahimatngon, angay paabaton han bug-os nga kabug-at han paghukom han Dyos.

27Han pagkastigoha ha ira pinaagi han mga binuhat nga gin-isip nira nga kadiyosan, nagmabidoon hira hin duro ngan nakasabot hira nga an matuod nga Dyos amo hiya nga dayuday ira gindumiri hin pagkilala ha iya nga Dyos. Sanglit nag-antos hira han kataposan nga sirot.