Isaias 46 - Samarenyo Meaning-Based Bible (1984)（MBBSAM）

1“Amo ini an kataposan para han kadiyosan han Babilonia!

Ginsingba hadto anay nira hi Bel ug Nebo,

kundi yana ginkarga na la hira ha mga asno,

usa nga mabug-at nga darad-on para han mga taludtod hin kinakapoy nga mga mananap!

2Diri makakatalwas ha ira ngahaw an mga diyosdiyos;

ginbihag ngan gin-agaw hira.

Amo ini an kataposan han kadiyosan han Babilonia!

3“Pamati ha akon, kamo nga mga tulin ni Jacob,

an ngatanan nga nahisalin han akon mga tawo.

Ginmangnoan ko kamo tikang han iyo katawo.

4Ako an iyo Dyos, ngan mamangnoan ko kamo

tubtob han iyo kalagas ngan pag-ubana ha iyo.

Ginhimo ko kamo ngan mamangnoan ko kamo;

bubuligan ngan tatalwason ko kamo.

5“Kan kanay ako niyo itatanding?” nasiring an Ginoo,

“May-ada pa ba iba nga sugad ha akon?”

6Binubuksan hin mga tawo an ira mga pitaka ngan hinuhuwad in bulawan;

tinitimbang nira in salapi.

Nagsusuhol hira hin platero para hin paghimo hin diyos;

katapos yinuyukboan nira ngan ginsisingba ini nira!

7Pinapas-an ngan gindadara nira ini;

iginpapahimutang ini nira ngan didto natindog ini,

ngan nahadong la ha iya binubutangan.

“Kon may nag-aampo ngada hini, diri ini nakakabaton,

o diri nakakatalwas ha iya tikang hin kakurian.

8“Hinumdomi ini niyo nga mga makasasala;

painoinoha an akon ginbuhat.

9Hinumdomi an nahinabo hin maiha na;

kilalaha nga ako gudla amo an Dyos

ngan waray na gud iba nga sugad ha akon.

10Tikang ha tinikangan pa gintagna ko na an dadangatan;

hadto pa gud iginsumat ko na ngadaan an mahinanabo.

Nagsiring ako nga diri gud mapapakyas an akon mga larang;

nga pagtutumanon ko gud an ngatanan nga ginlarang ko hin pagbuhata.

11Gintawag ko in tawo hin pagkanhi tikang ha sinirangan;

mahugdon hiya sugad hin banog,

ngan pagtutumanon niya an akon ginlarang.

Iginyakan ko ini ngan pagtutumanon gud ini.

12“Pamati ha akon, kamo nga mga tawo nga magtig-a an ulo,

nga naghuhunahuna nga hirayo hin duro an pagdarag-an.

13Hiraniay na ha iyo an adlaw han pagdarag-an—

diri gud ini hirayo hin duro.

Diri malalangan an akon pagtalwas.

Tatalwason ko an Jerusalem

ngan pagpapasidunggan didto an Israel.”