Mga Salmo 109 - Samarenyo Meaning-Based Bible (1984)（MBBSAM）

Sumbong hin Tawo nga Aada ha Kasamukan

1O Dyos, ikaw an gindadayaw nakon,

an imo paghilom ayaw ipadayon!

2Ginsulong ako han magraot, buwaon,

nga nagbibinuwa hiunong ha akon.

3Magpakaharadlok nga mga butang,

an ira ha akon ginbubutangbutang;

4Ngan ira ako hin waray la hinungdan,

ginpakaraot ha ira mga yakan.

5Han maupay asay la ginbalos an maraot,

han akon paghigugma, asay la an pagdumot.

6Han akon kaaway, an magraot an papaghukma,

ngan usa han iya kaaway in magsumbong ha iya.

7Han sayop magtug-an kon paghukman na hiya,

bisan an iya pag-ampo isipon nga sala.

8Iya kinabuhi matapus na unta,

ngan an iya buhat iba an magdara.

9Magkaiilo unta an kabataan niya,

ngan mabalo na an iya asawa.

10Makilimos unta an iya kabataan,

ngan waray na balay nga ira olian.

Paiwason unta ini hira ngatanan,

tikang han nagun-ob nga ira gin-ukyan.

11Kuhaon unta an ngatanan nga iya mga butang,

hadton nga tawo nga iya nautangan;

ngan han mga langyaw hiya unta bawian,

han ngatanan nga iya ginkabudlayan.

12Waray na unta pumaid ha iya bisan la usa,

ngan manimangno han mga ilo niya.

13Mamatay unta an ngatanan niya mga katulinan,

ngan an iya ngaran ira na hingalimtan.

14Hinaut unta nga han Ginoo hinumdoman,

an karat-an han iya mga ginikanan.

Ngan hin pasaylo diri gud kahatagan,

kanan iroy niya mga kasal-anan.

15Dayuday nga diri unta hingalimtan,

han Ginoo an ira mga kasal-anan;

kundi hira ngahaw an mga ginikanan,

diri angay na hinumdoman.

16Waray hin kalooy ini nga tawo makahunahuna,

kundi ginpakurian, ginpatay niya;

an mga kablas, makalolooy ngan magluya.

17An panhimaraot iya naruyagan,

an gaba ha iya unta umumban;

dinmiri gud paghatag hin kaupayan,

hin kaupayan liwat diri hiya tagan!

18Masayunay la niya an panhimaraot,

sugad han iya bado hin pagsul-ot;

sumalopsop sugad hin tubig ha iya kalawasan,

ngan sugad hin lana ha iya mga tul-an.

19Sugad hin bado ha iya unta makaputos,

sugad hin paha ha iya mag-aalikos.

20Sugara gud hini, O Ginoo,

han akon mga kaaway an imo kastigo;

adton mga nagpapakaraot ha akon,

pinaagi han ira magpintas nga pulong.

21Kundi, Ginoo, Dyos ko, tabangi ako,

sumala hadton ha akon iginsaad nimo;

tabangi gad ako ngan imo talwason,

tungod han dako mo nga paghigugma ha akon.

22Kablas na ako ngan nagkikinahanglan,

tugob an akon kasingkasing hin kasakitan.

23Daw lambong ha gab-i, haros diri hikit-an,

napapalid ako sugad hin apan.

24Tungod hin gutom an akon tuhod magluya,

lawas ko manipis, duro hin kagasa.

25Kon nakita hira, ginyuyubit ako,

nagpipilingpiling an ira mga ulo.

26Tabangi ako, O Dyos nga akon Ginoo,

talwasa gad tungod han dayon nga gugma mo.

27Ipasabot gad han mga kaaway ko,

ikaw an natalwas ha akon hin tutoo.

28Bangin ira ako panhimaraoton,

kundi ikaw in maglilipay ha akon;

maraogdaog ha akon, imo pagdag-on,

ngan ako, surugoon mo, magmalipayon.

29Hinaut nga adton mga kaaway ko,

maputos na hira hin kaalo;

isul-ot na nira an ira kaawod nga duro,

sugad hin hilawig nga ira mga bado.

30Hin dako nga tingog ngadto han Ginoo,

magpapasalamat gud ha iya ako;

ngan hiya gud an pagdadayawon ko,

dida han katirok han mga tawo.

31Tungod kay iya gud ginpapanalipdan,

an kablas nga tawo iya inuogopan;

iya gintatalwas nga diri patayon,

han nagsirot ha iya nga maghurukom.