1 Hadi 15 - Samarenyo Meaning-Based Bible (1984)（MBBSAM）

Naghadi han Juda hi Abias(2 Cron. 13:1–14:1)

1Dida han ika-18 ka tuig nga pagkahadi ni Hadi Jeroboam han Israel, nahimo hi Abias nga hadi han Juda,

2ngan naghadi hiya hin tulo ka tuig ha Jerusalem. Hi Maaca nga anak ni Absalom amo an iroy niya.

3Ginbuhat niya an amo ngahaw nga mga sala nga ginbuhat han iya amay ngan waray hiya magmatinumanon han Ginoo nga iya Dyos, sugad han kamatinumanon ni David nga apoy han iya amay.

4Kundi tungod kan David naghatag an Ginoo nga iya Dyos kan Abias hin usa nga anak nga lalake nga maghahadi sunod ha iya didto ha Jerusalem ngan magpapakusog han Jerusalem.

5Ginbuhat ini han Ginoo kay ginbuhat ni David an nakalipay ha iya ngan waray gud hiya sumupak hin bisan ano han iya mga sugo, labot la han kaso hiunong kan Urias nga Hiteohanon.

6Waray hunong an pag-inaway nira Abias ug Jeroboam sulod han bug-os nga panahon han pagkahadi ni Abias.

7Nahisurat an iba pa nga nabuhat ni Abias dida han Kasaysayan han Kahadian han Juda.

8Namatay hi Abias ngan iginlubong hiya didto han Syudad ni David ngan sinmaliwan ha iya hin pagkahadi hi Asa nga iya anak.

Naghadi han Juda hi Asa(2 Cron. 15:16–16:6)

9Dida han ika-20 ka tuig nga pagkahadi ni Hadi Jeroboam han Israel nahimo nga hadi han Juda hi Asa,

10ngan naghadi hiya hin 41 ka tuig didto ha Jerusalem. Hi Maaca nga anak ni Absalom amo an iya apoy nga babaye.

11Ginbuhat ni Asa an nakalipay han Ginoo, sugad han ginbuhat ni David nga iya ginikanan.

12Ginpaiwas niya ha nasod an ngatanan nga kalalaken-an ngan kababayen-an nga magraot an dungog nga nag-aalagad didto han pagano nga mga dapit hin pagsingba, ngan ginkuha niya an ngatanan nga mga diyosdiyos nga ginhimo han mga una ha iya.

13Ginhukasan niya hin ka rayna nga iroy hi Maaca nga iya apoy, kay naghimo hiya hin malaw-ay nga ladawan ni Asera nga diyosa hin kamaanak. Gintiak ni Asa an diyosdiyos ngan ginsunog ini hirani han Kahamub-an Kidron.

14Bisan kon waray panrub-a ni Asa an ngatanan nga pagano nga mga dapit hin pagsingba, nagpabilin hiya nga matinumanon ha Ginoo ha bug-os niya nga kinabuhi.

15Iginbutang niya ha Templo an ngatanan nga mga butang nga iginhalad ha Dyos han iya amay, sugad man an mga bulawan ug salapi nga garamiton nga iginhalad niya ngahaw.

16Waray hunong an pag-inaway nira Hadi Asa han Juda ngan Hadi Baasa han Israel han mga buhi pa hira.

17Ginsulong ni Baasa an Juda ngan ginpaderan niya an Rama basi waray na makasulod ngan makagawas han Juda.

18Sanglit kinuha ni Hadi Asa an ngatanan nga salapi ug bulawan nga nahibilin ha Templo ngan ha palasyo, ngan ginpadara ini ha Damasco, pinaagi hin pira han iya mga opisyal, ngadto kan Hadi Benadad han Siria, nga anak ni Tabremon ngan apo ni Hezion, upod ini nga tugon:

19“Pagsangkay kita, sugad han aton mga amay. Regalo ko ha imo ini nga salapi ug bulawan. Utda na an imo pakigsangkay kan Hadi Baasa han Israel, basi kuhaon niya an iya mga sondalo ha akon katunaan.”

20Inmuyon hi Hadi Benadad han larang ni Asa, ngan ginsugo an iya mga kapitan ngan an ira mga kasondalohan hin pagsulong han mga syudad han Israel. Nabihag nira an Ahion, Dan, Abelbet Maaca, an distrito nga hirani han Lanaw Galilea, ngan an bug-os nga katunaan han Neftali.

21Han pakabati ni Hadi Baasa han nahinabo, hinmunong hiya hin pagpader han Rama ngan kinmadto hiya ha Terza.

22Niyan nagsugo hi Hadi Asa ha bug-os nga Juda nga bumulig gud hin waray baribad an ngatanan hin paghakot tikang ha Rama han mga bato ngan mga kahoy nga ginggamit ni Baasa hin pagpader han syudad. Ginamit ni Asa ini nga mga butang hin pagpader han Mispa ngan han Geba nga usa nga syudad didto ha katunaan han Benjamin.

23Nahisurat an ngatanan nga nabuhat ni Hadi Asa, an iya maisogon nga mga pakig-away ngan an mga bungto nga iya ginpaderan, dida han Kasaysayan han Kahadian han Juda. Kundi nalulid hiya han lagas na tungod hin sakit ha tiil.

24Namatay hi Asa ngan ginlubong hiya didto han hadianon nga mga lubnganan ha Syudad ni David, ngan sinmaliwan ha iya hin pagkahadi hi Josafat nga iya anak.

Naghadi han Israel hi Nadab

25Dida han ikaduha ka tuig nga pagkahadi ni Hadi Asa han Juda, nahimo nga hadi han Israel hi Nadab nga anak ni Hadi Jeroboam, ngan naghadi hiya hin duha ka tuig.

26Sugad han iya amay nga una ha iya, nakasala hiya han Ginoo ngan gintutdoan niya hin pakasala an Israel.

27Naglarang hin mabudhion kontra kan Nadab hi Baasa nga anak ni Ahias, han tribo han Isacar, ngan ginpatay hi Nadab han ginpapalibutan ni Nadab ngan han iya kasondalohan an syudad han Gebeton didto ha Filistia.

28Nahinabo ini dida han ikatulo ka tuig nga paghadi han Juda ni Hadi Asa. Sanglit sinmaliwan hi Baasa kan Nadab hin pagkahadi han Israel.

29Gintikangan niya dayon hin pamatay han ngatanan nga mga sakop han panimalay ni Jeroboam. Sumala han iginsiring han Ginoo pinaagi kan Ahias nga iya surugoon, nga manaragna nga taga-Silo, pinamatay an ngatanan nga mga sakop han panimalay ni Jeroboam; waray gud usa nga nahibilin nga buhi.

30Nahinabo ini kay gin-aghat ni Jeroboam an kasina han Ginoo nga Dyos han Israel, tungod han mga sala nga iya nabuhat ngan han pag-aghata niya hin pakasala an Israel.

31Nahisurat an ngatanan nga nabuhat ni Nadab dida han Kasaysayan han Kahadian han Israel.

32Waray hunong an pag-inaway nira Hadi Asa han Juda ngan Hadi Baasa han Israel han mga buhi pa hira.

Naghadi han Israel hi Baasa

33Dida han ikatulo ka tuig nga pagkahadi ni Hadi Asa han Juda, nahimo nga hadi han bug-os nga Israel hi Baasa nga anak ni Ahias, ngan naghadi hiya didto ha Tersa hin 24 ka tuig.

34Sugad kan Hadi Jeroboam nga una ha iya, nakasala hiya han Ginoo ngan gintutdoan niya hin pakasala an Israel.