2 Macabeo 2 - Samarenyo Meaning-Based Bible (1984)（MBBSAM）

Gintago ni Jeremias an Tulda han Ginoo

1“Maaram kami tikang han mga sinurat nga gintugon ni Jeremias nga manaragna an mga tawo nga ginhalin hin pagkabihag nga ira tagoon in mga kalayo nga tikang han altar, sumala han nahinabihan pala.

2Maaram liwat kami nga iya gintutdoan hira han Balaod han Dyos ngan ginpahimatngonan hira hin diri pagpalimbong han mga diyosdiyos nga rinayandayanan hin bulawan ug salapi nga ira makikita didto han tuna nga ginhalinan ha ira.

3Ngan iya gin-aghat hira hin diri gud pagbaya han Balaod.

4“Nagsusumat liwat ha amon ini ngahaw nga mga sinurat nga hi Jeremias, ha pagsugot han pagdumara han Dyos, nagsugo nga isunod ha iya hin pagdara an Tulda han Ginoo ngan an Kahon han Ginsaaran ngadto han bukid diin gintan-aw ni Moises an tuna nga iginsaad han Dyos han aton mga tawo.

5Han pag-abot ni Jeremias ngadto han bukid, hin-agian niya in usa nga dako nga lungib, ngan iya gintago didto an Tulda han Ginoo, an Kahon han Ginsaaran, ngan an altar han insyenso. Katapos iya ginsadhan an ganggang han lungib.

6“Nagtalinguha in pira nga kasangkayan ni Jeremias hin pagsunod ha iya ngan pagtigaman han aragian, kundi waray hira makaagi han lungib.

7Han paghibaroi ni Jeremias han ira ginbuhat, ginsaway niya hira hin pagsiring, ‘Kinahanglan waray gud mahibaro hiunong hini nga dapit tubtob han pagtiroka liwat han Dyos han iya mga tawo ngan ipakita ha ira an iya kalooy.

8Hito nga panahon igpapasabot niya kon diin tagoa ini nga mga butang, ngan hikikit-an didto han dampog an mabislaw nga kapawa tigaman nga aada an Dyos, sugad han nahinabo ha panahon ni Moises ngan dida hin usa nga higayon diin nag-ampo hi Solomon nga bag-ohon hin paghalad an Templo dida hin makaaramdok nga pagsaurog.’

Ginsaurog ni Solomon an Pyesta

9“Ginsumatan liwat kami hiunong han paghalad han makinaadmananon nga Hadi Solomon hin usa nga halad nga tinubod ha pagbag-o hin paghalad dida han kahuman han Templo,

10ngan dida han iya pag-ampo, kinmunsad in kalayo tikang ha langit ngan gin-ugtang an mga halad nga tinubod sugad han nahinabo han pag-ampo ni Moises ha una nga panahon.

11Iginsaysay ni Moises nga gin-ugtang hin kalayo an halad tungod hin sala, kay waray ini pagkaona.

12Ginsaurog ni Solomon an pyesta sulod hin walo ka adlaw.

May-ada hi Jeremias Kwarto hin mga Basahan

13“Hin-agian ngahaw ini nga mga kamatuoran dida han hadianon nga mga sinurat ngan dida han mga handomanan ni Nehemias nga nagtindog hin usa nga kwarto hin mga basahan, ngan nagtirok hin mga sinurat ni David, mga surat hin kahadian hiunong hin mga paghalad, ngan mga basahan hiunong han kahadian ngan mga manaragna.

14Gintirok liwat hi Judas in mga basahan nga nagsarang tungod han araway, ngan aton pa ini ginpupulsan.

15Kon nagkikinahanglan kamo hin bisan hain hini nga mga basahan, pahibaroa kami, ngan amon ini igpapadara.

Nagdapit hin Pagsaurog han Pyesta

16“Tungod kay harapit na pagsaurogon an Pyesta han Pagbag-o hin Paghalad, nagsusurat kami ha iyo, ngan nagsasagdon kami nga pagsaurogon liwat ini niyo.

17Gintalwas han Dyos an ngatanan niya nga mga tawo ngan iginbalik ha aton ngatanan an aton baraan nga tuna, an pagkahadi, an pagkapadi, ngan an mga pag-alagad ha Templo,

18sumala han iya iginsaad dida han iya Balaod. Gintalwas kita niya han magpakalilisang nga mga karat-an ngan ginlinisan niya an Templo, ngan natapod kita nga tungod han iya pagkalooy titirokon kita, ha diri maiha, ngadto han baraan niya nga Templo tikang han tagsa nga nasod dinhe ha kalibutan.”

Pahiuna han Tagsurat

19Iginsurat ni Jason han Cirene dida hin lima ka basahan an kasaysayan nira Judas Macabeo ngan han iya kabugtoan nga kalalaken-an, an paglinis han makaaramdok nga Templo, ngan an pagbag-o hin paghalad han altar.

20Iya iginsaysay an mga pakig-away kan Antioco Epifanes nga kan Eupator nga iya anak,

21ngan iya iginsumat an hiunong han langitnon nga mga panan-awon nga hinkit-an hadton mga mag-isog nga pakig-away ngan han ira kinasingkasing nga pag-ugop han Judiyo nga tuloohan. Gutiay la an amon kasondalohan, kundi gintikasan nira an bug-os nga nasod ngan ginpuo an pagano nga kasondalohan.

22Ginbawi nira an Templo nga bantogan ha bug-os nga kalibutan, gintalwas an Jerusalem, ngan ginpahauli an mga balaod nga ira ginhuhunahunaan na hin pagpara. Nakahimo hira hini ngatanan nga mga butang kay nalooy ngan pinmaid man ha ira an Ginoo.

23Kundi yana akon tatalinguhaon nga ibutang ko la an importante nga mga butang han lima nga basahan nga ginsurat ni Jason ngan uusaon ko la nga basahan.

24Makapoy hin duro ini para hin bisan hin-o nga karuyag magbasa han kasaysayan, tungod han kahilaba han pagsaysay ngan han kadamo nga mga butang ngan mga hinabo nga iginsusumat.

25Kundi gintalinguha ko hin pagsurat hini basi magmasayon an pagbasa para han ngatanan nga mga bumarasa; adton mabasa basi la maliaw hiya, nakakaagi hin kalipay; adton magbabasa basi masag-ulo nira an mga kamatuoran nga iginsasaysay, diri ini hira magkukuri.

26Usa nga makuri nga buruhaton an pagsurat hin sugad nga halipot nga pagsaysay. Makuri ini nga buhat nga nagkikinahanglan hin maduruto nga pagtrabaho ngan mga gab-i nga waray pagkaturog.

27Sugad ini kamakuri hin pag-andam hin usa nga kombite nga diin matunga ngan malilipay an mga tawo nga kada usa lain an ayon nga pagkaon. Kundi nalilipay ako hin pag-antos hini nga kakurian basi ako makalipay han mga magbabasa.

28An tunay nga tagsurat amo an labi nga maaram maghatag han han-ay nga kasaysayan ngan akon la tatalinguhaon in halipot nga pagsaysay han importante nga mga butang nga nanhinabo.

29Diri ako amo an tagtindog hin usa nga bag-o nga balay nga tinag-usa an panginano han ngatanan nga mga kinahanglanon para hin pagbalay, kundi usa la ako nga parapintar kanay tuyo amo la an pagpahusay han balay.

30Kinahanglan maaram gud an magsaraysay mahitungod han iya igsusumat, usisahon an tagsa nga bahin, ngan onina igsaysay ini hin maupay,

31kundi adton magsusurat la hin halipot nga pagsaysay, kinahanglan tugotan hin paghatag hin halipot la nga susumaton ngan diri an tinag-usa nga hilaba nga pagsaysay.

32Sanglit, ha waray na dugang nga kasayoran, titikangan ko na an akon susumaton. Diri maupay an pagsurat hin duro ka hilaba nga pahiuna nga tungod hini mahalipotay na la lugod an susumaton ngahaw.